وەزارەتی كۆچ و كۆچبەرانی عیراق هەشت هەزار كەسوكاری داعشی تێكەڵ بە كۆمەڵگە كردۆتەوە لە پارێزگا جیاوازەكان، ئەوەش دوای سێ مانگ هێشتنەوەیان لە كەمپی جدعە لە نەینەوا و ئامادەكردنیان بۆ ژیانی ناو كۆمەڵگە. سەرەڕای تێبینی بەردەوامی پەرلەمانتاران و ئەنجومەنە خۆجێیەكان.
وەزارەتەكە لە چەند رۆژی رابردودا گەڕانەوەی 150 خێزانی داعشی لە كەمپی هۆڵ لە سوریا بۆ كەمپی جدعە لە نەینەوا راگەیاند، بەوەش ژمارەی ئەو كەسانەی لەو كەمپەوە گەڕێنراونەتەوە بۆ عیراق گەیشتە 10 هەزار كەس كە دابەشبون بەسەر دوو هەزار و 600 خێزان.
شێروان دوبەردانی، ئەندامی ئەنجومەنی نوێنەرانی عیراق لە پشكی نەینەوا بە (كەركوك ناو )ی وت "ئەو خێزانانە بەبێ ئاگاداری ئێمە و ئیدارەی نەینەوا دەگوازرێنەوە، تا ئێستا 21 وەجبە لەكەمپی هۆڵەوە گەڕێنراونەتەوە بۆ عیراق و بۆ كەمپی جدعە"، زیاتر وتی "ئەو خێزانانە هەرچەندە لەژێر چاودێری دەزگا ئەمنییەكاندان، بەڵام پێمانوایە هێشتا جێگای مەترسین... بەگشتی ژن و منداڵن، دوای ماوەیەك لە كەمپی جدعە تێكەڵ بە كۆمەڵگە دەكرێنەوە، تێبینی زۆرمان لەسەر پرۆسەكە هەیە، بەڵام ئەوە كاری وەزارەتی كۆچ و كۆچبەرانە لەگەڵ دەزگا ئەمنییەكان".
پرۆسەكە بەگشتی بە هەماهەنگی دەزگای نیشتیمانیی و چەند رێكخراوێكی كۆمەڵی مەدەنی ئەنجامدەدەرێت، ئەو كەسانە سێ مانگ لە كەمپی جدعە دەهێڵدرێنەوە و ئامادەدەكرێن بۆ گەڕانەوە بۆ ناو كۆمەڵگە و تێكەڵ بە كۆمەڵگە دەكرێنەوە".
كەمپەكانی جدعە دەكەونە نەینەوا، لە ساڵانی رابردودا ئامادەكران بۆ لە خۆگرتنی ژن، منداڵ و كەسە نزیكەكانی چەكدارانی داعش كە خاوەنی رەگەزنامەی عیراقین، ئەوەش دوای هێنانەوەیان لە سوریاوە.
شێروان دوبەردانی، وتی "تا ئێستا نزیكەی هەشت هەزار كەس تێكەڵ بەكۆمەڵگە كراونەتەوە و 400 خێزانی تر لەژێر ئامادەكاریدان بۆ گەڕانەوە بۆ ناو ژیانی كۆمەڵگە، زۆربەیان خەڵكی نەینەوا، سەڵاحەدین و ئەنبارن، رەنگە بە سێ وەجبەی تر تەواوی ئەو عیراقییانەی لە كەمپی هۆڵن بگەڕێنرێنەوە بۆ عیراق".
تا ئێستا نزیكەی هەشت هەزار كەس تێكەڵ بەكۆمەڵگە كراونەتەوە
عەدنان دەراجی، بەڕێوەبەری كەمپی جدعە، ئامادەنەبوو هیچ زانیارییەك بۆ راگەیاندن بدات، كاتێك پەیامنێری (كەركوك ناو) بە تەلەفون قسەی لەگەڵ كرد.
محەمەد جاسم، سەرۆكی لیژنەی ئەمنی لە ئەنجومەنی پارێزگای نەینەوا وتی "بنكەی جدعە راستە لە سنوری پارێزگای نەینەوایە، بەڵام راستەوخۆ بە بەغداوە گرێدراوە و وەزارەتی كۆچ و كۆچبەران و دەزگای نیشتیمانی عیراق بەرپرسیارن لە هەموو شتێك لەسەر ئەو مەلەفە".
محەمەد جاسم پێیوایە كەمپەكە بەپێی پێویست نییە و وتیشی "سێ مانگ كەمە بۆ تێكەڵكردنەوەیان بە كۆمەڵگە، چونكە ئەوانە كەسوكاری چەكدارانی داعشن كۆمەڵێك بیرو هزری توندەڕەویان لە مێشكدایە كاتی زیاتری دەوێت بۆ ئامادەكردنەوەیان بۆ ناو كۆمەڵگە".
"هیوادارین ئەوانەی تێكەڵ بە كۆمەڵگە دەكرێنەوە لە ئاییندەدا نەبنە مەترسی بۆ سەر كۆمەڵگە، هەروەها هیوادارین پرسی تۆڵەكردنەوە رونەدات لەلایەن ئەوانەی كەسوكاریان لە شەڕی داعشدا كوژراون".
دەوڵەتی ئیسلامی لە عیراق و شام ناسراو بە (داعش)، لە حوەزیرانی 2014دا پارێزگای نەینەوای كۆنترۆڵكرد و پەلیكێشا بۆ پارێزگاكانی سەڵاحەدین، ئەنبار، بەشێكی كەركوك و دیالە، تا لە كۆتایی 2017دا بە تەواوی لە عیراق دەركرا.
محەمەد جاسم وتی "دەبێت دەزگا ئەمنییەكان زۆر بە وردی چاودێری ئەوانە بكەن كە تێكەڵ بە كۆمەڵگە دەكرێنەوە و رۆژانە چاودێرییان بكەن و زانیارییان لەسەر كۆبكەنەوە".
