زۆرینه‌ی دانیشتوانی سلێمانبه‌گ و 55 گوندی هێشتا ئاواره‌ن

كه‌مپێكی ئاواره‌كانی ناوخۆی عیراق فۆتۆ: كه‌ركوك ناو

له‌یلا ئه‌حمه‌د – سەڵاحەدین

ناوه‌ندی ناحیه‌ی سلێمانبه‌گ و ده‌یانی گوندی ئه‌و سنوره‌، هێشتا زۆرینه‌ی دانیشتوانه‌كه‌ی نه‌گه‌ڕاونه‌ته‌وه‌ و له‌ ئاواره‌ییدا ده‌ژین، به‌هۆی كه‌می خزمه‌تگوزاری و مه‌ترسییه‌ ئه‌منییه‌كانه‌وه‌.

ئه‌و ناحیه‌ی له‌ قەزای دوزخورماتوو سەر بە پارێزگای سەڵاحەدین، دوای سێ ساڵ له‌ كۆنتڕۆڵكردنه‌وه‌یی و له‌ سه‌ره‌تای 2018دا، هێزه‌ ئه‌منییه‌كان رێگه‌ی گه‌ڕانه‌وه‌یان بۆ خه‌ڵكه‌كه‌ی كرده‌وه‌، به‌ڵام هێشتا ئاواره‌كان متمانه‌یان نیه‌ تا خێوه‌ته‌كانی ئاواره‌یی به‌جێبهێڵن.

ئه‌حمه‌د دله‌یان، چه‌ند ساڵێك له‌مه‌وبه‌ر به‌هۆی شه‌ڕی داعشه‌وه‌ ئاواره‌ی قه‌زای كفری بووه‌ و هێشتا ئاماده‌ی گه‌ڕانه‌وه‌ نیه‌ بۆ ماڵه‌كه‌ی خۆی له‌ سلێمانبه‌گ، "له‌به‌ر خراپی باری ئه‌منی و به‌ تایبه‌ت ترسمان له‌ داعش هه‌یه‌ و ئینجا حه‌شدی شه‌عبی" ئه‌و هاوڵاتییه‌ بۆ (كه‌ركوك ناو) واده‌ڵێت.

پێشتر لێپرسراوانی ئەمنی و بە تایبەت حەشدی شەعبی، رێگرییان ده‌كرد له‌ گه‌ڕانه‌وه‌ی خه‌ڵكی سلێمانبه‌گ، ئه‌وه‌ش به‌ پاساوی ناسەقامگیری باری ئەمنی و پێویستی ئەنجامدانی وردبینی بۆ ئاواره‌كان.

ئه‌حمه‌د، له‌ ئاواره‌ییدا ئه‌وه‌نده‌ی تر بارودۆخی ئابوری خراپ بووه‌، باوكی 9 منداڵه‌ و هه‌موویانی له‌به‌ر خوێندن ده‌ركردووه‌، چونكه‌ له‌ خانوی كرێدایه‌ و وه‌ك ئه‌و وتی، بژێویی و كاریشی نییه‌.

ئه‌وه‌ ئاماده‌یه‌ بۆ گه‌رانه‌وه‌، به‌ مه‌رجێك، "ئه‌گه‌ر زێدی خۆم ئارام بێت".

زۆرینه‌ی دانیشتوانی سنوری سلێمانبه‌گ و 55 گوندی ده‌وروبه‌ری، ئاواره‌ی قه‌زای كفری له‌ پارێزگای دیاله‌ و ناوچه‌كانی هه‌رێمی كوردستان بون.

تاڵب محه‌مه‌د مستەفا، بەڕێوه‌بەری ناحیەی سلێمانبەگ به‌ (كه‌ركوك ناو)ی وت "لە 2014وه‌ سلێمانبه‌گ و گونده‌كانی دانیشتوانه‌كه‌ی له‌ عه‌ره‌بی سونه‌ ئاواره‌ن و نه‌گه‌ڕاونه‌ته‌وه‌، چونكه‌ سنوره‌كه‌ ئارام نیه‌ و كه‌سیش نییه‌ بیانپارێزێت".

داعش لە ناوەڕاستی 2014دا، بۆ ماوەی زیاتر لە دوو مانگ گەمارۆی توندی خستە سەر سلێمان بەگ، تا لە مانگەكانی كۆتایی هەمان ساڵدا كۆنتڕۆڵكرایەوە، بەهۆی بارگرژیی و پێكدادانەكانیشەوە هەزاران خێزان ئاوارە بوون.

له‌ سه‌نته‌ری ناحیه‌ی سلێمانبه‌گ 24 هه‌زار خێزان و له‌ نزیكه‌ی 14 گوندی سنوره‌كه‌شدا 18 هه‌زار خێزان هێشتا ئاواره‌ن، به‌پێی ئاماره‌كانی به‌ڕێوه‌به‌رایه‌تی ناحیه‌كه‌.

تاڵب محه‌مه‌د ده‌ڵێت بارودۆخی ئاواره‌كان له‌ كفری و ده‌وروبه‌ری خراپه‌، هه‌ردوو حكومه‌تی عیراق و هه‌رێمی كوردستان هاوكارییان ناكه‌ن، له‌كاتێكدا خانوه‌كانیان له‌ زێدی خۆشیاندا روخاون و زیانی زۆریان به‌ركه‌وتووه‌.

دانیشتوانە ئاوارەكەی ناحیەی سلێمانبەگ، لەعەرەب‌و توركمانی سونە پێكهاتوون، تا سه‌ره‌تای ساڵی 2018 ناحیەكەیان ته‌نیا هێزەكانی حەشدی شەعبی تێدا جێگیركرا و وەك ناوچەی سەربازی داخراو، هیچ هاوڵاتیەكی تێدا نیشته‌جی نه‌بوو.

  • FB
  • Instagram
  • Twitter
  • YT