چوار منداڵی خێزانێك دوای لەدەستدانی باوك و زیندانیكردنی دایكیان، سەرگەردان بون، خواردنی رۆژانەیان نییە و لە سۆزی دایك و باوك بێبەشن، لەگەڵئەوەشدا لە ژورێكدا دەژن كە تەنیا چەند بەتانییەكی لێییە.
ئەو چیرۆكە مانگى نیسانى ئەمساڵ لە ناحیەی پردێ لە كەركوك دەستیپێكرد، كاتێك یونس عەوڵا، باوكی حەوت منداڵ لەلایەن دایكیان و چەند كەسێكی تر بە پاچ (قازمە) كوژرا.
دوای روداوەكە، خێزانەكەی یونس لەگەڵ كچ و كوڕێكی دەستگیركران و تا ئیستا ئازانەكراون.
لەو حەوت منداڵە، دوانیان بە تۆمەتی بەشداربون لە كوشتنی باوكیان، لەگەڵ دایكیان زیندانین، منداڵێكی یەك ساڵیشیان لای مامێكێتیی و ئەو چوارەی تر لە تەنیا ژورێكدا دەژین.
"باوكێكی توندوتیژ"
كامیل (14 ساڵ)، باس لە باوكی دەكات و بە "توندوتیژ" ناوی دەبات، وتی "جارێكیان بە خاكەناز لێیدام و گوێیەكی تەقاندم، یان بە شیشی كەباب داخی دەكردین"، بەهۆیەوە ژیانیان ئاسایی نەبووە.
هەروەها وتی كە هەمان ئەو مامەڵەیەی لەگەڵ دایكیان كردووە و ئازاری داون.
ئەو مامەڵەیەی باوكی بەردەوامدەبێت، وەك منداڵەكانی دەڵێن بەهۆیەوە چەند جارێك دایكیان ماڵی جێهێشتووە و دواتر گەڕاوەتەوە، بەڵام ئەوە نەبۆتەهۆی ئەوەی مامەڵەی باوكیان باشتر بێت.
سەمیر یونس (22 ساڵ) کوڕە گەورەى ئەو خێزانە، لە ئێستادا سەرپەرشتی خوشك و براكانی دەكات، وتی "باوك مامەڵەی زۆر ناخۆش بوو، ئەشكەنجەی ئێمە و دایكمی دەدا و شەوان بە بێهۆشی دەگەڕایەوە ماڵ و شەڕی پێدەفرۆشتین".
بۆیە سەمیر چەند جارێك لە ترسی باوكی ماڵی جێهێشتووە.
منداڵەكان قوربانین
نیسانی ئەمساڵ، كۆتایی بە پێكەوەیی ئەو خێزانە دێت، كاتێك یونس عەوڵا دێت بە دەستی دایكیان و كەسێكی تر دەكوژرێت و تەرمەكەیان لە گوندى نەبیاوەى سەر بە پردێ ناحیەى فڕێدا.
دوای روداوەكە و دەستگیركردنی دایك و دوو منداڵی، پێنج منداڵەكەی تر دەچنە هەولێر بۆ لای مامێكیان، بەڵام مامیان دەریاندەكات و تەنیا كچێكی یەك ساڵیان لای خۆی دەهێڵێتەوە.
سەمیر وتی "مامم دەریكردین و وتی ئێوەم پێ بەخێوناكرێت، تەنیا نوری خوشكم كە تەمەنی یەك ساڵە لای ئەو ماوەتەوە".
دوای دەركردنی ئەو چوار منداڵە، لە هەولێرەوە دەگەڕێنەوە پردێ و لە نێو ژورێكدا كە كامیل پێشتربەهۆی كارەكەیەوە لێی دەمایەوە، لێی نیشتەجێ بون.
ژوورەكە تەنیا یەك ئامێری فێنكەرەوەی پانكەی تیایە لەگەڵ چەند بەتانییەك. نیوەڕوان ئەگەر پارەیان پێبێت فەلافل دەكڕن و دەیخۆن، بەیانیانیش خواردن نییە.
سەمیر وتی "هەفتەیەکە سەرقاڵى کارکردنم لە کۆمپانیای هارمۆنى بۆ دروستکردنى پێداویستى نێو ماڵ، ئەوە هاوكاری باشدەبێت بۆ ئێمە".
ئەو خێزانە ئێستا بە تەواوی پەرتەوازە بون، هەریەكە لە سەمیر 22 ساڵ، كامیل 14 ساڵ، وەنەوشە 10 ساڵ و رەوەند هەشت ساڵ، پێكەوە لەو ژورە دەژین، ئەمیر 19 ساڵ و نەورۆز 18 ساڵ لە زیندانن لەگەڵ دایكیان، نوری یەك ساڵیش لە ماڵی باوكیەتی.
وەنەوشە 10 ساڵ، دەڵێت زۆر حەزی لە خوێندن بووە، بەڵام باوكی رێگریی لێكردون و وتویەتی "من نەمخوێندووە، نابێت ئێوەش بخوێنن".
ئەو كچە، لە ئێستادا بیر لەوە دەكاتەوە خۆی فێری چێشتلێنان بكات، تا خواردن بۆ براكانی دروستبكات. بە (كەركوك ناو)ی وت "ئەگەر بێت و تەباخمان هەبێت، هەوڵدەدەم فێرى دروستكردنی خواردن بم".
هەوار محەمەد، كە پیشەی رۆژنامەنوسییە، سەرقاڵی كۆكردنەوەی كۆمەكە بۆ ئەو خێزانە، بۆ ئەو مەبەستەش لەڕێی ئەكاونەتەكەی خۆیەوە ئاگاداری بڵاوكردۆتەوە.
