ئەو سێ رفێنراوەی لە دواین رۆژی ئۆپەراسیۆنی هێزە عیراقییەكاندا دۆزرانەوە، لەناو قەفەسێكی ئاسندا پێكەوە بەندكرابون و تەنانەت رێگەیان پێنەدرابوو لەگەڵ یەكتردا قسەبكەن، ئەو سێ كەسە بەچاو بەستراویی بۆ ناوچەیەكی چڕی دابڕاو گوازرابونەوە.
ئەو سێ كەسە ئەمساڵ و لە سێ كاتی جیاوازدا لە ماڵەكانیان و لە شەودا بەچاوبەستراوی رفێنرابون. تا 4ی حوزەیران لەدواین رۆژی ئۆپەراسیۆنی "پاڵەوانانی عیراق - سەركەوتنی سەروەری"، كە خودی مستەفا كازمی، سەرۆك وەزیرانی عیراق سەرپەرشتی دەكرد دۆزرانەوە.
بارق هندر محەمەد (22ساڵ)، لەكاتژمێری 11ی شەوی 10ی ئایار لەلایەن چوار كەسەوە هێرشكرایە سەر ماڵەكەیان و رفێنرا، ئەوەش لەوكاتەی ئەو خەوتبوو لە ماڵەكەی خۆیاندا لە گوندی شبێچە عەبدولعەزیز، لە باشوری داقوق.
بارق وتی "هاتنەسەرمان و وتیان لەگەڵمان وەرە، هەر كە چومە دەرەوە دەست و چاویان بەستم و نزیكەی یەك كاتژمێر بەپێ رۆیشتین، دواتر بە ماتۆڕسکیل سەركەوتین، ئەو ماتۆڕەی منیان سەرخست سێ كەس بوین، من لە ناوەڕاستی دوانیان دانرام".
بە وتەی بارق، زیاتر لە دوو كاتژمێریش بە ماتۆڕ رۆیشتون، تا لەجێگەیەك كردویانەتە ناو سندوقێكی ئاسنەوە و قوفڵیان لێداوە.
"لەناو ئاسنەكە دەرەوە دیار نەبوو، دوو كەسی تری تیابوو، رێگەیان نەدەدا بەهیچ شێوەیەك قسە لەگەڵ یەكتردا بكەین، پارشێو پارچە نانێكیان پێدام، بەڵام زۆریش ئەكشەنجەیان دام". بارق وایوت.
چەكدارەكان كە بارق نازانیت بە چی ناویان بهێنێت، دەڵێت زانیارییان لەسەر ژیانی من هەبوو، "تەنانەت وتیان خۆت ناونوسكردووە بۆ ئەوەی ببیتە چەكداری حەشدی شەعبی".
ئەحمەد عەجمی ئەسعەد (20ساڵ)، یەكێكی تر بوو لە رفێنراوانی نێو ئەو قەفەسە، ئەو لە نۆی ئایاردا رفێنرا، لەوكاتەی خەریكی كاری كشتوكاڵی بوو لە گوندی بستح سەر بە ناحیەی رەشاد.
ئەو كە كوڕی شێخێكی عوبەیدە و باوكی ئەندامی ئەنجومەنی ناحیەی رەشاد بووە - بەر لە هەڵوەشانەوەی ئەو ئەنجومەنە لە كۆتایی ساڵی رابردوو-، بە (كەركوك ناو)ی وت "چەند چەکدارێک هاتنە سەرم و و پێیان وتم چەند پرسیارێکمان هەیە، دەستبەجێ لە دەرەوە چاو و دەستیان بەستم و مەودایەكی زۆر بەپێ رۆیشتین تا ئەو شوێنەی ئەو قەفەسە ئاسنەی لێبوو".
چەند چەکدارێک هاتنە سەرم و و پێیان وتم چەند پرسیارێکمان هەیە، دەستبەجێ لە دەرەوە چاو و دەستیان بەستم
"ئەشکەنجەی منیان نەدا، هەر چاوەڕێ بوین، یان بمانكوژن، یان ئازادمان بكەن".
ئەحمەد عەجمیش بەهەمان شێوە دەڵێت رێگەیان پێنەداون لەگەڵ دوو كەسەكەی تر قسە بكەن.
ئەو سێ كەسەی لەلایەن چەكدارانی حەشدی شەعبییەوە لە چوارچێوەی ئۆپەراسیۆنەكەی كازمیدا رزگاركران، 6ی حوزەیران لە كۆنگرەیەكی رۆژنامەوانیدا رادەستی كەسوكاریان كرانەوە.
ئەحمەد عەجمی ئەسعەد (20ساڵ)، یەكێكی تر بوو لە رفێنراوانی نێو ئەو قەفەسە. لە نۆی ئایاردا رفێنرا، لە گوندی بستح سەر بە ناحیەی رەشاد فۆتۆ: كاروان ساڵحی
عەلى زیاب مەحمود، كەسی سێیەمی نێو ئەو قەفەسە بووە. ئەو دانیشتوی گوندی زلە سبع-ە لە قەزای داقوق و جوتیارە، لە 20ی شوباتی ئەمساڵ لەلایەن ژمارەیەك چەكدارەوە رفێنرا.
ئەو وتی "ئەوەندەی من ئاگاداربم، چەكدارەكان قسەیان لەگەڵ كەسوكارم كردووە، وتیان لەبەرامبەر پارە ئازادت دەكەین، بەڵام نازانم داوای چەندیان كردووە و چی رویداوە، چونكە هێشتا حەشدی شەعبی ئێمەیان رادەستی كەسوكارمان نەكردوەتەوە".
ئەو لێدوانانەی ئەو سێ كەسە بۆ (كەركوك ناو) لەوكاتەدابوو كە هێشتا نەگەڕابونەوە لای كەسوكاریان.
ئەو سێ كەسە لە ناوچەی وادی چای دۆزرانەوە، كە ناوچەیەكی دابڕاوە لە نێوان هەردوو پارێزگای كەركوك و سەڵاحەدین.
ناوچەكە كە بە دۆڵی مردن-یش ناودەبرێت، تاڕادەیەك سەختە و پڕە لە دار و درەخت.
رەبو نەجم، ئامر لیواى 22ی حەشدى شەعبی، كە لەو ئۆپەراسیۆنەدا بەشداربوو، بە (كەركوك ناو)ی وت "ئەو ناوچەیەی ئەو سێ كەسەی لێ بوو، شوێنێكی مەترسیدارە، ناوچەیەكی چڕە، هەر لەوێ تونێلێكی داعش هەبون، لەگەڵ حەوت مۆڵگە و پێنج ئامێری مۆبایل و دوو پشتێنی بۆمبڕێژكراو".
هەر لەو ناوچەیە جلوبەرگی حەشدی شەعبی هەبون، بەپێی وتەی رەبو نەجم، "ئەو جلانە بۆ ئەنجامدانی كاری تێكدەرانە بەناوی حەشدی شەعبییەوە بەكارهێنراون".
