خواستی زۆرم هەیە ببمە باڵیۆزی نەتەوە یەكگرتووەكان و دەستكراوەتر بم بۆ كاری مرۆیی
خواستی زۆرم هەیە ببمە باڵیۆزی نەتەوە یەكگرتووەكان و دەستكراوەتر بم بۆ كاری مرۆیی
ئەمیرە لەگەڵ منداڵاندا مامۆستایە، تا بە دوای خولیا و بەهرەكانیاندا بڕۆن؛ بۆ ستەملێکراوانیش بەرگریكاریی مافەكانی مرۆڤە و دەیەوێت كاریگەریی توندوتیژییەكانی شەڕی داعش بسڕێتەوە.
ئەو كچە ئێزیدییە لەوەتەی لە دەستی چەكدارانی "دەوڵەتی ئیسلامی لە عیراق و شام – داعش" هەڵاتووە، بەردەوام لە گەڕان و هەوڵیی فێربوندایە، لە زۆر دەرگا دەدات بۆ گەیاندنی دۆسیەی رفێنراوانی پێكهاتەكەی و بە نێودەوڵەتیكردنیی روداوەكانی 3ـی ئابی 2014.
لەو ساڵەدا، كاتێك داعش دەستی بەسەر قەزای شنگال و ناوچەكانی دیكەی نەینەودا گرت، جگە لە كوشتنی سەدان هاوڵاتی، زیاتر لە شەش هەزار ئێزیدیی رفاند، كە هێشتا چارەنوسی زیاتر لە دوو هەزار و 700 كەسیان نادیارە، بەهۆیەوە هەزاران خێزانیش ئاوارە بون.
"سەرباریی ئاوارەیی و ئازار و ئاستەنگەكانی ژیانیی ناو كەمپ، بەڵام بڕیارمدا وەك خۆبەخش كار بۆ هاوكاریكردنی لێقەوماوانی كارەساتەكە بكەم" ئەمیرە عەتۆ سلێمان بۆ (كەركوك ناو) وای وت.
ئەمیرە (28 ساڵ) لەگەڵ خێزانەكەی خەڵكی كۆمەڵگەی خانەسۆر-ـی شنگالن، ئەوكات بە ئاستەنگ و مەترسییەكاندا تێدەپەڕن، تا دەگەنە چیای شنگال و دواتر دەچنە سوریا و پاشان بەرەو دهۆك بەڕێدەكەون، لەوكاتەوە هەشت ساڵە لە كەمپی بێرسڤی زاخۆ نیشتەجێن.
"دوو هەفتەی یەكەممان لە كەمپ زۆر زەحمەت بوو، دڵتەنگیی و ئازارەكانیی ئەو روداوە هێشتا نوێ بون، كاتێك پەیوەندیم بە رێكخراوە مرۆییەكانەوە كرد و ویستم وەك بەریگارێكی مافەكانی مرۆڤ كاربكەم"، لەو هەنگاوەیدا ئامانجی گەیاندنیی چیرۆكە نەبیستراوەكانی شنگالە، نیشاندانیی ئەو دیمەنانەیە وەك ئەو دەڵێت؛ بە بەرچاویەوە منداڵ، پیر و پەككەوتە بەهۆی برسێتیی و تینوێتییەوە دەمردن.
بەشداری لە ژمارەیەك خولی راھێنان و فێربون دەكات، بەئامانجی هاوكارییكردنی ئاوارە و پاڵپشتیی دەرونیی و كۆمەڵایەتیی زیانلێكەوتوانیی توندوتیژیی داعش.
"نەمهێشت ئاوارەیی بمخات و خۆم دەستپێشخەربوم تا وەک خۆبەخش لەگەڵ رێكخراوە بیانیی و ناوخۆییەكانی ناو كەمپدا كاربكەم".
ئەو كەمپەی ئەمیرەی تێدا نیشتەجێیە، بێرسڤی دوو، دانیشتوانەكەی زیاتر لە حەوت هەزار كەسن، ئەوەش لە كۆی 664 هەزار ئاوارەی نیشتەجێی هەرێمی كوردستان كە زۆرینە خەڵكیی نەینەوان و سەدا 30ـیان ئێزیدین، بەپێی ئامارە رەسمییەكانی حكومەتی هەرێمی كوردستان.
ئەو كتێبخانەیە دەرفەتێك بوو تا چەندین خولی راهێنان بۆ ئاوارەكان بكەینەوە
"دوو مانگی یەكەمی ئاوارەیی وەك خۆبەخش كارمكرد و تێگەیشتم چۆن لەناو كەمپ كاربكەین، پاشان خولی زیاترم بینی و توانای خۆم سەلماند، ئەوەش سەرەتای گەشەپێدان و دەركەوتنی تواناكانیی من بون" ئەمیرە وادەڵێت.
هەڵپەی ئەمیرە بۆ هاوكاریكردنیی ئاوارە و رزگاربوانی دەستیی داعش لە كاتێكدایە، لە خێزانەكەی خۆی كەسیان نەكەوتۆتە دەستی ئەو رێكخراوە، لەگەڵ دایك و باوكی و خوشكەكانیدا بە سەلامەتی دەرچون، بەڵام لە خانەوادەكەیاندا كوژرا و رفێنراویش هەن.
چەند ساڵێك وەكو بەڕێوەبەریی پاڵپشتیی دەرونی و كۆمەڵایەتیی لەگەڵ رێكخراوی شنگال بۆ گەشەپێدانیی كۆمەڵایەتی (SOSD)–رێكخراوێكی ناحكومی ناوخۆییە و لە 2013 دامەزراوە- كاردەكات.
ئەمیرە پێویستیی بە هەوڵیی زیاتر هەیە و پێیوایە دەتوانێت بە شێوازێكیی دیكە هاریكاریی باشتری زوڵملێكراوانی ئێزیدیی بكات، جێبەجێكرنی ئەو خواستەش لە كردنەوەی كتێبخانەیەكدا دەبینێتەوە.
"كتێبخانەی ئەمیرە شنگالیی-ـم كردەوە، بۆ خوێندنەوە و خواستنی كتێب، لەوەشدا چەند ئامانجێكم هەبوو؛ گرنگترینیان هاندانیی منداڵان و گەنجان بۆ خوێندنەوە و تەواوكردنی خوێندن، لەگەڵ پاڵپشتیكردنی دەروونی و كۆمەڵایەتی زیانلێكەوتوانی شەڕ".
كتێبخانەی ئەمیرە شنگالی، زیاتر لە كۆمەڵگەیەكی پەروەردەیی دەچێت، دوو ژووری گەورەی پڕ لە كتێب، سێ هۆڵ و حەوشەیەكی چوارگۆشەی تێدایە، هەموی بە كابینە ساڵی 2019 لە كەمپی بێرسڤی دوو بنیاتنراوە، لەوێ زیاتر لە 50 هەزار كتێب و گۆڤار هەن، جاربەجار چیرۆك و كتێبیی منداڵانیش بۆ منداڵانیی ئاوارە دەكاتە دیاری.
بە هەوڵی تایبەتی خۆی لە موسڵ، بەغداد، دهۆك و هەولێر و شارەكانی ترەوە كتێبی كۆكردۆتەوە و تائێستا هیچ رێكخراو و لایەنێك لە كردنەوە و بەڕێوەبردنی ئەو كتێبیخانەیەدا هاوكارییان نەكردووە.
"ئەو كتێبخانەیە دەرفەتێك بوو تا چەندین خولی راهێنان بۆ ئاوارەكان بكەینەوە، لەوانە خولی خوێندنەوە و خوێندەواری بۆ ژنانی نەخوێندەوار، فێربونی زمانیی ئینگلیزی، بەرگدوری، وێنەكێشان، كاری دەستیی و وەرزش، زۆربەی كارەكانیش بە كڕینی كتێبەوە هەر لەسەر گیرفانیی خۆم بون".
كتێبخانەكەی زیاتر لە 200 خولی راهێنانی جیاوازی هەبووە و زیاتر لە دوو هەزار كەس لە چالاكیی و خولەكانیان سودمەندبون.
زۆر مەبەستم بوو هاوكاری ژنانی رزگاربوو بكەم تا لەو بارودۆخە دەرونییەی تێیدان دەربچن و كەمێك ئارامببنەوە
"زۆر مەبەستم بوو هاوكاری ژنانی رزگاربوو بكەم تا لەو بارودۆخە دەرونییەی تێیدان دەربچن و كەمێك ئارامببنەوە، بۆیە بەردەوام هانیاندەدەم سەردانی كتێبخانەكە بكەن، فێری خوێندنەوە و نوسین بن، هەموو كاتێكیش خول یان هەڵمەتی هۆشیاریمان لەژێر ناو و ناونیشانی جیاوازدا هەبووە" ئەمیرە وای وت.
لەكاتێكدا هەموو هەوڵێكی بۆ منداڵان و ئاوارەكانی ئێزیدییە تا بەدوای خەونەكانیاندا بڕۆن و لەروی دەرونییەوە هاوكارییان بكات، بەڵام خۆی هەرچیی خەونی منداڵی و هەرزەكاری هەبووە لەدەستی چون، لە قۆناغی ناوەندی و بەهۆی شەڕی داعشەوە وازی لە خوێندن هێناوە و دەرفەتی گەڕانەوەی نەبووە.
"دایكم حەزی دەكرد ببمە پزیشک، بەڵام من ئارەزووم دەكرد ببمە ئەفسەر لە سوپا، یانیش فڕۆكەوان و بە فڕۆكەكەم گەشتی هەموو دنیا بكەم.. بەڵام ئاوارەیی هەموو خەونەكانی لەناوبردم"، ئەو دەڵێت حەزی بە تۆپی پێ و تۆپی دەست هەبووە، هەندێكجار ویستویەتی ببێتە نمایشكاری جلوبەرگ یاخود وەكو گەڕیدەیەك هەموو دنیا بگەڕێت.
ئەمیرە لە بارودۆخی ئێستای پەشیمان نییە و سەركەوتنی خۆی لەوەدا دەبینێتەوە ئاوارەیی كۆڵی پێنەدا، نمونەی ئەو سەركەوتنە دەستخۆشیی و نازناوی ناوەند و رێكخراوەكانە بۆ هەوڵ و ماندوبونەكانی، چونكە ئەندامی فەخری چەندین رێكخراویی بیانییە، لەلایەن ئەنجومەنی ئاشتیی نێودەوڵەتییەوە كراوە بە باڵێوزی ئاشتی، نازناوی باڵێوزی نیازپاکی كۆمەڵەی پزیشكانی سوریا وەرگرتووە. رێزلێنان و بڕوانامە فەخرییەكانی ئەمیرە زۆرن؛ لە دەستخۆشی و دیاریكردنی وەك یەكێك لە كەسایەتییەكانی ساڵیی تێدایە تا دەگاتە بەخشینی دكتۆرای فەخری.
لە چالاكوانی و كاری مرۆییەوە بۆ پێشبڕكێی شاجوانی عیراق، ئەمیرە بە دەرفەتیی دەزانێت لەو ڕێگایەوە باشتر خزمەت بە دۆسیەی ئێزیدییەكان بكات، "شاجوانیی تەنیا روخسار نییە، بەڵكو هاوكاریكردنی خەڵك و كاری مرۆییشە".
لە هەڵبژاردنی شاجوانی ساڵی 2021ـی عیراق، ئەمیرە ئەو چانسەی نەبوو نازناوەكە بەدەستبهێنێت بەڵام زۆر كەس لەنێو خەڵكی كەمپەكەیی و دەرەوەی كەمپیش وەك شاجوانی زاخۆ ناوی دەهێنن.
خێزانەكەی هێشتا لە كەمپی ئاوارەیین و بەهۆی وێرانكارییەكانی شەڕ و زیانیی خانوەكەیانەوە ناتوانن بگەڕێنەوە.
ئەمیرە هەوڵدەدەت دەرفەتی زیاتر لە مانەوەی وەربگرێت؛ ئێستا زۆربەی كاتەكانی بۆ كتێبخانەكەیەتی و پلانی هەیە فراوانتری بكات، تەنیا لە كەمپدا نەمێنێتەوە و چالاكییەكانی بە شوێنیی دیكەش بگات، بەڵام پێویستیی بە هاوكاریی هەیە، "نەك هەر ئەو پلانە، بەڵكو خواستی زۆرم هەیە ببمە باڵیۆزی نەتەوە یەكگرتووەكان و دەستكراوەتر بم بۆ كاری مرۆیی، بەڵام ئەو دەستكەوتە كاری زۆرتری دەوێت و هیچ شتێك بەلای منیشەوە مەحاڵ نییە".
فەرمان سادق
