ئاسایشی هەولێر بەبێ بڕیاری دادوەر و بەبێ ئەوەی "هیچ پەڕاوێك" بۆ ئیدریسی نانەوا بكاتەوە، ناوبراویان بۆ ماوەی 18 سەعات دەستگیركرد، هەر بەبێ بڕیاری دادوەریش ئازادكرا، دوای ئەوەی ناڕەزایی لە دەستگیركردنەكەی تۆڕە كۆمەڵایەتییەكانی تەنی.
ئیدریس مەسعود (ئیدریسی نانەوا)، دووشەممە 8ی کانونی دووەم، لەگەڵ ژمارەیەك خاوەن نانەواخانە و سەمونخانە، لەبەردەم بینای پارێزگای هەولێر گردبونەوە، دژی هەرزانكردنی نرخی نان لە هەشت نان بە هەزار دینارەوە بۆ 10 نان بە هەمان نرخ.
لەكاتی قسەكردنیدا لەبەردەم رۆژنامەنوسان، ئیدریس وتی "بە خۆم و منداڵەكەم رۆژانە ئیش دەكەین 35 هەزار دینار پەیدادەكەین، ئەگەر ئەو بڕیارە جێبەجێ بكەم رۆژانە 50 هەزار دینار زەرەر دەكەم"، روی دەمی كردە حكومەت و وتی "ئەگەر تۆ چاكسازیی دەكەیت لە ماڵی خۆت و براو كەسوكاری خۆتەوە دەستپێبكە... بڕۆ لەناو سەرۆك عەشیرەت و جاشەكانەوە دەستپێبكە. بڕۆ لە نەوت و غازەوە دەستپێبكە... بۆ دەبێت تەنیا فەقیر باجەكەی بدات؟".
كاتێك مانگرتووانی تری بەردەم بینای پارێزگار ویستیان قسەكانی پێ ببڕن، ئیدریس دەنگی بەرزتر كردەوە و وتی "هەولێر شاری هۆلاكۆ بەزێن بوو، ئێستا بۆتە جێی كۆیلە، ئایا ئێوە غیرەتتان نییە".
ڤیدیۆی وتەكانی ئیدریس هەرزوو تۆڕە كۆمەڵایەتییەكانی تەنی و زۆرێك دەستخۆشییان لە قسەكانی دەكرد. كاتژمێر 5ی ئێوارەی هەمان رۆژ ئاسایشی هەولێر چونە سەر ماڵەكەیی و دەستگیریان كرد.
ئیدریس دوای ئازادكردنی - پێشنیوەڕۆی 9ی كانونی دووەم-، لە لێدوانێكیدا بە (كەركوك ناو)ی وت "كاتێك ئاسایش هاتنە ماڵەكەم و دەستگیریان كردم، وتیان بڕیاری دادوەرمان پێیە بۆ دەستگیركردنت"، بەبێ ئەوەی هیچ بڕیارێكی پێ نیشان بدەن.
كاتێك ئاسایش هاتنە ماڵەكەم و دەستگیریان كردم، وتیان بڕیاری دادوەرمان پێیە بۆ دەستگیركردنت
ئەنجومەنی وەزیران، لە 7ی كانونی یەكەمی رابردوو بڕیاریدا بە هەرزانكردنی نان و سەمون و هەردوو وەزارەتی ناوخۆ و بازرگانی راسپارد بۆ جێبەجێكردنی.
هەفتەی رابردوو، قایمقامی قەزای ناوەندی هەولێر جێبەجێكردنی بڕیارەكەی بۆ ئەم هەفتەیە راگەیاند و جەختیكردەوە لە بەرامبەردا لەسەدا 50 کرێی کارەبای نانەواخانە و سەمونخانەکان کەم دەکرێتەوە، هەروەها بەهەمان شێوە بریاریدا بڕی پێدانی غاز بەو شوێنانە بۆ لەسەدا 50 كەمبكاتەوە.
هەر لە بڕیارەكەدا هاتووە كە نرخی فەردەی ئاردیان لە 29 هەزار دینارەوە بۆ دەکرێتە 24 هەزار و بۆ هەر تۆنێكیش فەردەیەك ئاردیان بەخۆڕایی پێدەدرێت. ئەوانەشیان وەک پاڵپشتی حکومەت بۆ هەرزانكردنی نان لێكدایەوە.
بەگشتی لە سنوری هەولێر 1800 نانەواخانەو سەمونخانە هەن و بەشێكی كەم لە ئەوان چونە بەردەم بینای پارێزگای هەولێر و دژی بڕیارەكە وەستانەوە.
ئیدریس وتی "بەو شێوەیە بێت ئێمە زەرەر دەكەین، بۆ دەبێت فەقیر باجی چاكسازیی حكومەت بدات".
دەستگیركردنی ئیدریس و ئاشكرانەكردنی ئەو دۆسییەی ناوبراوی پێ دەستگیركراوە، شەوی رابردوو تۆڕە كۆمەڵایەتییەكانی تەنیو بە كپكردنی ئازادی دەربڕین و رەخنە لێكدرایەوە.
هەر شەوی رابردوو 24 پارێزەر ئامادەیی خۆیان نیشاندا بەبێ بەرامبەر بەرگری لە دۆسییەی ئیدریس مەسعود بكەن.
هاوكات زۆرینەی حزبە سیاسییەكانی كوردستان، لەڕێی بەیاننامەوە ناڕەزاییان لەو بڕیارەی ئاسایش نیشاندا و بە رەفتارێكی "قێزەون" و "باج خستنەسەر قسە" ناویان برد. جگە لە پارتی دیموكراتی كوردستان، كە بێدەنگی هەڵبژارد لەكاتێكدا سەرۆكی حكومەتی بەدەستە و دەسەڵاتی رەهای هەیە لە پارێزگای هەولێر.
ئاسۆ هاشم، یەكەم پارێزەر بوو لەڕێی تۆڕی كۆمەڵایەتی فەیسبوكەوە ئامادەیی خۆی نیشاندا بە خۆبەخشی پارێزەرایەتی بۆ ئیدریسی نانەوا بكات و هەر ئەویش بەیانی ئەمڕۆ یەكەم پارێزەر بوو گەیشتە ئاسایشی هەولێر بۆ ئەو مەبەستە.
ئاسۆ هاشم بە (كەركوك ناو)ی وت "كاتێك چومە ئاسایش بۆ ئەوەی ببمە پارێزەری ئیدریس و كەیسەكە ببینم، دادوەری لێکۆڵینەوە پێی وتم ئیدریس هیچ پەڕاوێکی نییە... تەنانەت بڕیاری دەستگیرکردنیشی نەدراوە تاوەکو پەڕاوی بۆ بکرێتەوە".
ئیدریس مەسعود، لەڕێی تەلەفونەوە بە (كەركوك ناو)ی وت كە هێزەكانی ئاسایش "بەڕێزەوە" مامەڵەیان لەگەڵدا كردووە، كاتێك شەوی رابردوو لەزیندان بووە.
وتیشی كە نازانێت بۆچی دەستگیركراوە، "منیان نەبردە بەردەم دادوەر، هێندە دەزانم کاتژمێر 11ی پێشنیوەڕۆ ئازادیان كردم... من نازانم بە چ مادەیەکی یاسایی دەستگیرکرام و بە چ مادەیەکی یاسایی ئازاد کراوم، تەنانەت داوای کەفیلیشیان نەکرد...".
بەڵام لەكاتی ئازادكردنیدا وتویانە "كەی بمانەوێت ئەوا دەتهێنینەوە بۆ ئاسایش"، ئیدریس وای وت.
كەی بمانەوێت ئەوا دەتهێنینەوە بۆ ئاسایش
ئیدریس مەسعود، خاوەنی نانەواخانەی (نیل)ە کە دەکەوێتە گەڕەکی کوردستان لە ناوەندی شاری هەولێر.
ئاسایشی هەولێر هیچ رونكردنەوەیەكی لەسەر ئەو روداوە نەداوە، هەروەك لێپرسراوی راگەیاندنی ئاسایش ئامادەنەبوو لەسەر ئەو پرسە قسە بۆ (كەركوك ناو) بكات.
ئومێد خۆشناو، پارێزگاری هەولێر، لە كۆنگرەیەكی رۆژنامەوانیدا، كە تایبەت بوو بەو پرسە، وتی "هەندێك كەس بابەتەكەیان زۆر شێواند، ئەو بەڕێزە هەر رەخنەیەكی لە حكومەت گرتووە ئاساییە، ئێمە لە وڵاتێكی دیموكراسیداین، هەر بۆچون و رەخنەیەكی هەیە لە چوارچێوەی دەربڕێنێكی لۆژیكیدا، ئەوە دەوڵەمەندمان دەكات".
لەبارەی هۆكاری دەستگیركردنی، وتی "ئەو گەنجە تۆزێك سەرگەرمانە هەڵسوكەوتی كرد، نەدەبوو هەندێك قسە بكات لەبارەی شارەكە و خەڵكەكەی، لەو چوارچێوەیە لێكۆڵینەوەی لەگەڵدا كراوە و ئێستاش ئازادە و داوای لێبوردنی لە خەڵكی هەولێر كرد".
"حكومەت و دامودەزگاكانی لە هیچ كەسێك قبوڵناكات، تەشهیر بە شارێك بكات".
لەكاتی ئازادكردنیدا، ئیدریس ڤیدیۆیەكی بڵاوكردەوە و لە بەشێكیدا وتی "داوای لێبوردن لە خەڵكی هەولێر دەكەم ئەگەر هەر ووشەیەكی نەشیاوم وتووە ئەوا لەكاتی توڕەبونمدا بووە".
ئیدریس دوای ئازادبونی، جارێكی تر جەختیكردەوە "حكومەت بڕیارێكی هەڵەیداوە، نابێت ئێمە باجی هەرزانكردنی نان بدەین، دەبێت حكومەت پاڵپشتیمان بكات".
لە كۆتاییدا وتی "ئێستاش دەڵێم ئەگەر بڕیارەكە بەوشێوەیە بڕوات، ناتوانم ئەو ئیشە بكەم و وازدەهێنم".
