جەنگەکە تەڕ و ووشک پێکەوە دەسوتێنێت؛ شەپۆلی کاریگەریی ئۆپەراسیۆنی "توڕەیی ئەفسانەیی" ئەمریکا و ئیسرائیل بۆ سەر ئێران گەیشتۆتە زۆر شوێن، لەوانە سنوردانان بۆ ئازادیی رۆژنامەوانی لە هەرێمی کوردستانی عیراق.
دامودەزگا جیاوازەکانی دەسەڵاتی جێبەجێکردن لە هەرێمی کوردستان، لهوكاتهوهی جەنگەکە دهستپێكردووه، ههر یهكه بەگوێرەی تێگەیشتنی خۆی بۆ کاری راگەیاندن چەندین راگەیەندراو و رێنماییان بە مەبەستی رێکخستنی دەسەڵاتی چوارەم دهركردووه، ئەوەش جۆرێک لە پشێوی و پرسیاری لەسەر رەوایەتیی رێکخستنی کاری میدیا لەلایەن ئەو دامەزراوە جۆراوجۆرانەوە دروستکردووه.
هەرێمی کوردستان، لەڕووی هێرشی بەرجەستە و ئاڵوگۆڕی هەواڵ و زانیارییەوە بۆتە گۆڕەپانی جەنگی ئەمریکا و ئیسرائیل بۆ سەر ئێران كه لە کۆتایی شوباتی 2026ـەوه دهستپێكردووه. لە سایەی نەبوونی دەسەڵاتێکی تەشریعی چالاك، سەندیکایەکی چالاك، هەندێک دامەزراوەی دەسەڵاتی جێبەجێکردن لە هەرێم وەک جێگرەوەی ئەو لایەنە تایبەتمەندانە هەوڵی رێکخستنی کاری راگەیاندن دەدەن. ئهمه ههم ترس ههم سهرلێشێوانی بۆ رۆژنامهنوسان و دهزگاكانی راگهیاندن دروستكردووه، تهنانهت ههندێك لهژێر فشار و ههڕهشهكاندا روماڵكردنیان بۆ جهنگ و لێكهوتهكانی گۆڕیوه.
لەگەڵ دەرچواندنی یەکەم راگەیاندراودا، شێوازی رووماڵکردن گۆڕاوە. "بەڕاستی دۆخەکەی بۆ من زۆر ناخۆش کردووە، بۆ خۆم و هاوپیشەکانی تریشم" نەبەز رەشاد، پەیامنێری دەزگای (بوار میدیا) لە هەولێر، سەبارەت بە رێنماییەکانی رێکخستنی میدیا لە هەرێم وای ووت.
نەبەز کە لە سەرەتای هەڵگیرسانی جەنگەکەوە، رووماڵی هێرشکردنە سەر پارێزگای هەولێر و هەرێم دەکات، سەبارەت بە کاریگەری رێنماییەکان دەڵێت، "بەڵێ زۆریش کاریگەری کردۆتە سەر کاری ئێمە؛ من وەکو رۆژنامەنووس ناتوانم کارەکانم بکەم، ناتوانم زانیارییەکان بەخەڵک بگەیەنم، ئاسایش تهلهفونیان كرد و وتیان مهیكه".
بەگوێرەی راپۆرتی مەترسییە جیهانییەکانی ساڵی 2026 کە لەلایەن کۆربەندی ئابووری جیهانەوە بڵاوکراوەتەوە، "مەترسی زانیاریی هەڵەو زانیاریی چەواشە لە ریزبەندی دووەم (10) گەورەترین مەترسین کە لە ئێستادا رووبەڕووی جیهان دەبنەوە".
ئهم نیگهرانییهی نهبهز دوای ئهوه هات، كه ههریهكه له فەرمانگەی میدیا و زانیاریی حکومەتی هەرێمی کوردستان، وەزارەتی رۆشنبیری و لاوان، دەزگای ئاسایش، وەزارەتی پێشمەرگە لەو دامەزراوانەن کە رێنماییان دەربارەی رێکخستنی کاری راگەیاندن دەرکردووە، سەرەڕای سەندیکای رۆژنامەنووسانیش.
سروشتی رێنماییەکان، شێوازی رووماڵکردن، شوێنی رووماڵکردن و لیستێک لە سزای لەخۆگرتووە لەوانە، کێشانەوەی مۆڵەتی کارکردن یان داخستنی هەمیشەیی. ئەوە لەکاتێکدا، ئازادیی کاری رۆژنامەوانی لە هەرێمی کوردستان بە یاسا ریکخراوە؛ کە یاسای رۆژنامهگهری له كوردستان ژماره (35)ـی ساڵی 2007. یاساکە سەندیکای رۆژنامەنووسانی کردووە بە بەشێک لە پرۆسەی رێکخستن و کارکردنی میدیاکان.
هاوکات لە هەرێم، وەزارەتی ڕۆشنبیریش لەڕێی هەندێک رێنماییەوە، تایبەتمەندە بە کاری رۆژنامەنووسییەوە، بەتایبەتی ڕێکخستنی کاری رادیۆ و تەلەفزیۆن.
کێ باڵادەستی یاسایی هەیە راگەیاندن ڕێکبخات
لە پرسی رووماڵکردنی جەنگدا لە هەرێم دۆخەکە بەو ئاڕاستەیەدا دەڕوات، لە یەککاتدا، چەند دامەزراوەیەکی دەسەڵاتی جێبەجێکردن، سەرقاڵی کۆنتڕۆڵکردنی ئاڕاستەی کاری راگەیاندنن بەبێ ئەوەی نە تایبەتمەندی ئەوان بێت و نە پێشمەرجی یاساییان هەبێت.
سامان فەوزی، پسپۆڕی یاسای راگەیاندن دەڵێت "ئەوەی سنوور بۆ کاری میدیایی دیاری دەکات، پەرلەمانە (کوردستان)، بریتییە لە نوێنەرانی گەل، چونکە میدیا دەسەڵاتی چوارەمە، لەڕووی تیۆرییەوە، نابێت لەژێر رەحمەتی دەسەڵاتی دووەمدا بێت، کە دەسەڵاتی تەنفیزییە، لەبەر ئەوەش بوو لە عیراقدا، وەزارەتی راگەیاندن هەڵوەشێنرایەوە، چونکە وەزارەتی راگەیاندن کە سەرپەرشتی راگەیاندنی لە عیراقدا دەکرد نابێت سەر بە حکومەت بێت، هەر تەنانەت مۆڵەت وەرگرتنی راگەیاندن نابێت لەژێر دەسەڵاتی وەزارەتی رۆشنبیرییدا بێت".
"دوای پەرلەمان مەفروزە ئەرکی سەندیکا بێت، سەندیکای رۆژنامەنووسان ئەرکی تەنیا رۆژنامەنووسانی کاغەزی نییە، بەڵکو ئەرکی رادیۆ و تەلەفزیۆن و ئەوانەشە، دەتوانێت بەگوێرەی یاساکە ئەو کارە بکات" سامان فەوزی وای ووت.
دوای پەرلەمان مەفروزە ئەرکی سەندیکا بێت
لە هەرێمی كوردستان و لە 20 ساڵی رابردوودا، هەزار و 259 دەزگای راگەیاندن لە كەناڵی ئاسمانی و ناوخۆیی، رادیۆ، رۆژنامە، ماڵپەڕ و گۆڤار لە وەزارەتی رۆشنبیری و لاوان و سەندیكای رۆژنامەنووسانی كوردستان تۆماركراون. بەپێی داتاكانی سەندیكای رۆژنامەنووسانی كوردستان، كە دراون بە (كەركوك ناو)، لەو هەزار و 248 دەزگایە 51 ماڵپەڕ، 138 رادیۆ، 31 كەناڵی ئاسمانی، 85 كەناڵی ناوخۆیی، 695 گۆڤار، 259 رۆژنامە -زۆرینەی رۆژنامە و گۆڤارەكان لە ئێستادا راگیراون یان كراون بە پەیج و لە تۆڕی كۆمەڵایەتی فەیسبوك چالاكن-.
لە سەرەتای هاتنەناوەوەی ئەم دەزگایانە بۆ دەرکردنی رێنمایی، دوو پرسی سەرەکی سەریانهەڵداوە؛ یەکەم کێ چاودێریی راگەیاندن دەکات و دووەم شارەزایی ئەو دەزگایانە لە رێنماییکردنی رۆژنامەنووسان و دەزگاکانی راگەیاندن چەندە.
سەبارەت بە دەزگا ئەمنییەکان کە ئەوانیش راگەیاندراویان بڵاوکردۆتەوە، سامان فەوزی رایانگەیاند، "دەتوانن سکاڵا بەرزبکەنەوە و لایەنێک بن بۆ جوڵاندنی داواکاری گشتی، ئەگەر پێیانوایە میدیاکارێک (پەردەی لەسەر) زانیاریی سەربازی هەڵماڵیووە دەتوانن ئەوە بجوڵێنن، بەڵام ئەگەر خۆیان سزای میدیاکە بدەن، نەخێر، یان مامەڵەی راستەوخۆ لەگەڵ میدیاکارەکەدا بکەن، بەڕای من نەخێر".
شەهێن وەهاب، پەیامنێری تۆڕی میدیایی خەندان لە سلێمانی، دەڵێت "چەند جارێک بڕیار و رێنماییەکانم خوێندووەتەوە و لەگەڵ دەزگا ئەمنییەکانیش کۆبووینەتەوە و باسی ئەم بابەتانەمان کردووە".
لای ژیلیا عەلی، پەیامنێری دیپلۆماتیک لە سلێمانی، دوای رێنماییەکان رووماڵ گۆڕاوە؛ "ناوی شارەکە دەبەین بۆ نموونە دەڵێین لە سلێمانی، بەڵام ناوی شوێنی كەوتنە خوارەوەی موشەک و درۆن نابەین، هەر دەڵێین ناوچەیەکی سلێمانی بۆردومانکراوە".
ناوی شوێنی كەوتنە خوارەوەی موشەک و درۆن نابەین، هەر دەڵێین ناوچەیەک بۆردومانکراوە
(کەرکوك ناو) لەگەڵ چەند دامەزراوەیەکی تری میدیایی قسەی کردوو و ووتیان، دەزگای ئاسایش رێنماییەکانیان زۆر توندکردووە و ئێستا زۆر کەم رووماڵ دەکەن.
فەرمانگەی میدیا و زانیاری یەکێکی ترە لەو دامەزراوانەی ڕێنمایی و ئامۆژگاری بڵاودەکاتەوە، بەگوێرەی ماڵپەڕی فەرمی حكومەتی هەرێمی كوردستان، ئەو فەرمانگەیە چەندین ئەرکی هەیە، لەوانە، گەیاندنی زانیاریی لەسەر کارو چالاکییەکانی حکومەت، چاودێریکردنی کاری ڕاگەیاندن لە ئەنجومەنی وەزیران، سازدان و رێکخستنی کۆنگرەی رۆژنامەوانی، وەڵامدانەوەی پرسیار، ئاراستەکردنی وەزارەت و فەرمانگەکان دەربارەی چۆنیەتی مامەڵە کردن لەگەڵ ڕەخنە و تێبینیەکانی دەزگاکانی راگەیاندن و دروستکردنی پەیوەندی لەگەڵ ڕاگەیاندنی ناوخۆ و نێودەوڵەتییدا.
وەک دیارە لە ئەرکەکانی فەرمانگەدا، دوور و نزیک باس لە ڕێکخستنی ئازادیی کاری رۆژنامەوانی ناکات لە هەرێمی کوردستان. لەوبارەیەوە، سەرچاوەیەكی ئاگادار لە فەرمانگەی میدیا و زانیاری بە (کەرکوك ناو)ـی راگەیاند "ئەوە بڕیاری حکومەتی هەرێمی کوردستانە؛ فەرمانگەی میدیا و زانیاری لەپێناوی بەرژەوەندیی گشتی ئەو ڕێنماییانەی دەرکردووە. فەرمانگەش دامەزراوەیەکی حکومەتە، لەپێناو ئاسایشی نیشتمانی و پاراستنی دامەزراوەکان بڕیار دەدات".
راگەیەندراوێکی فەرمانگەی میدیا و زانیاری بۆ سەرجەم دەزگاکانی ڕاگەیاندن، لە 18ـی ئاداری 2026ـدا، دۆخەکەی گەیاندە ئاستێکی تر، کاتێک فەرمانگە بێ هیچ پێشینەیەکی یاسایی هەڕەشەی بێپێشینە دەکات.
لە خاڵی چوارەمی ڕاگەیەندراوەکەدا هاتووە، "هۆشداری دەدەین کە هەر دەزگایەکی ڕاگەیاندن پابەندی ئەم ڕێنماییانە نەبێت یان بە شێوازێکی ناپیشەیی ڕووماڵی هەواڵەکانی شەڕ و پەلامارەکان بکات، دەستبەجێ لە لایەن دژەتیرۆری کوردستانـەوە ڕووبەڕووی لێپیچینەوە و سزای یاسایی دەبێتەوە".
خاڵی پێنجەمیش دەڵێت، "بەرامبەر سەرپێچیکاران، ڕێکاری یاسایی و کارگێڕیی توند دەگیرێتە بەر، کە دەگاتە کێشانەوەی مۆڵەتی کارکردن یان داخستنی هەمیشەیی، بەپێی ڕاگەیەندراوی ئەنجومەنی ئاسایشی هەرێم لە 13ی ئاداری 2026".
هەر خێرا، رێنماییەکان بەسەر کەناڵی جەزیرەی قەتەریدا جێبەجێکران. کارەکانی کەناڵی جەزیرە لە هەرێمی کوردستان بۆ ماوەی دوو هەفتە ڕاگیرا. ماڵپەڕی (ئاڤا نیوز) سەر بە گرووپی میدیایی ئاڤا، رۆژی 15ـی ئادار بڵاویکردۆتەوە، "ئەم سزایە لە چوارچێوەی ئەو ڕێکارە توندانەیە کە ئەنجوومەنی ئاسایش بۆ پاراستنی ئاسایشی نیشتمانی لە کاتی جەنگدا گرتوویەتییە بەر".
سەرەڕای ئەوەش، "کێشانەوەی مۆڵەتی کارکردن یان داخستنی هەمیشەیی" پەرەسەندنێکی گەورەیە بۆ سەر کاری میدیا؛ لەکاتێکدا، تەنیا یاسای بەرکار یاسای ژماره (35) کە لە ماددهی دووهم (بڕگەی یهكهم) دەڵێت "رۆژنامه قهدهغه ناكرێ و دهستی بهسهردا ناگیرێ".
دیاری محەمەد، بەڕێوەبەری سەنتەری میترۆ دەڵێت، "هیچ دەقێکی یاسایی نییە رێبدات کەناڵی میدیایی دابخرێت".
"سەبارەت بە فەرمانگەی میدیا و زانیاری، دروستکردنی فەرمانگەکە بۆ ئەوەیە هەواڵەکانی حکومەت بگەیەنێت و چالاکی و کارەکانی حکومەت بگەیەنێت بە خەڵک، نەک سەرپەرشتیکردنی کۆی میدیاکانی دەرەوەی حکومەت، کە مەفروزە ئەم رێکخستنە لەدەستی حکومەت نەبێت، بەڵکو لە دەستی لایەنێکی تری بێلایەن بێت کە لە دەرەوەی حکومەت بێت،" سامان فەوزی وای ووت.
هەر لەو بارەیەوە، دیاری دەڵێت، "بهپێی یاساكه (یاسای رۆژنامەگەری)، كاتێك فەرمانگەی میدیا و زانیاری رێنمایی دەردەکات، ناتوانێت رێنماییهكانی ئاڕاستەی میدیاکانی بکات، چونكه فەرمانگەکە دامەزراوەیەکی فەرمی حکومەتی هەرێمی کوردستانە، ناتوانێت بێلایەنی خۆی بپارێزێت".
نەبەز بە بێزارییەوە، ووتی، "ئیتر منیشیان ئاگادارکردەوە و ووتیان کاکە مەیکە، بەڵام، بەڕاستی ئەو دۆخە زۆر خراپە، نازانم کێ لە میدیا و زانیاری ئەو فکرەیەی داڕشتووە".
منیشیان ئاگادارکردەوە و ووتیان کاکە (روماڵ) مەکە
بە تێڕوانینی سامان فەوزی، فەلسەفە و تێڕوانینی حکومەت بۆ ئازادیی بڵاوکردنەوە و میدیا جیاوازە لەوانەی لە دەرەوەی حکومەتن، بۆیە ئەرکی پەرلەمانە، بەڵام پەرلەمانی کوردستان ناکارایە و چەند ساڵێکە هیچ یاساییەکی دەرنەکردووە، "پەرلەمان بێکارە".
خانەی ئازادی (Freedom House) دامەزراوەیەکی ئەمریکییە و ساڵی 1941 دامەزراوە، ساڵانە ریزبەندیی ئازادی لەسەرتاسەری جیهاندا دەخاتەڕوو، بەگوێرەی ریزبەندیی ساڵی 2026، عیراق، کە هەرێمی کوردستانیش دەگرێتەوە، ووڵاتێکی "نائازادە"، لە تێکڕای هەڵسەنگاندنەکەدا، عیراق (31)ـ لە (100)ـی هێناوە، لە هەڵسەنگاندنی مافە سیاسییەکاندا، (16) لە (40)ـی هێناوە و لە ئازادییە مەدەنییەکاندا (15) لە (60)ـی هێناوە.
هاوکات، ئازاد حەمەدئەمین، نەقیبی سەندیکای رۆژنامەنووسانی کوردستان، بە (کەرکوك ناو)ـی راگەیاند، "ناکرێت ئاسایش و بەرژەوەندی هەرێمی کوردستان لە دۆخێکی وەهادا کە دۆخی جەنگە لە ناوچەکەدا و، پریشکی بەر کوردستانیش کەوتووە، بەناوی ئازادی ڕادەربڕین و ئازادی کاری میدیایی زیانی پێ بگەیەندرێت".
"هەموو ئەو لایەنانەی پەیوەندیدارن بە ئاسایشی نیشتمانی کوردستان، بۆیان هەیە ڕێنمایی لەچوارچێوەی یاسا کارپێکراوەکانیان دەربکەن،" نەقیبی سەندیکا ئەوەی خستەڕوو بێئەوەی پاڵپشتی یاسایی بۆ ڕێکخستنی کاری میدیایی لەلایەن ئەو دامەزراوانەوە بخاتەڕوو.
دیاری محەمەد دەڵێت، "دەبێت ئەو لایەنانەی رێنمایی دەردەکەن پشت بە یاسای ژمارە (35) ببەستن کە دەڵێت رۆژنامەگەری ئازادە و نابێت سانسۆر بکرێت... هەر دامەزراوەیەکیش رێنمایی دەربکات نابێت پێچەوانەی یاساکە بێت".
دۆخی بازاڕ چۆنە
هاوڵاتییان مافی دەستڕاگەیشتن بە زانیاریی پشتڕاستکراوەیان هەیە، بەتایبەتی لە دۆخی جەنگ و ململانێدا، تا بتوانن بریاری دروست دەربارەی ژیانیان بدەن و مامەڵەی روداوەكان بكەن.
سەردەشت حەسەن، 23 ساڵ، هاوڵاتییەکی دانیشتووی کەلارە، دەڵێت، "چاوەڕوانی ئەو هەواڵانەم کە پەیوەستن بە رەوشی ئابوری و سیاسی و ئەمنیەوە بەتایبەت ئابووری کە دۆخی بازاڕ چۆنە ...... بۆیە پێویستە دەزگاکانی راگەیاندن گرنگی تەواو بەو بابەتانە بدەن و راستی و دروستی لە زانیارییەکانیاندا هەبێت".
" خەڵکی هەولێر دڵەڕاوکێی زۆری هەیە، دەنگی تەقە و درۆنیش دێت و نابێت لە میدیاش باسبکرێت چی هەیە، ئەوە زۆر خەتەرە بەو شێوەیە،" نەبەز وای ووت.
بەشێک لە هێرشەکان بەر شوێنی مەدەنی کەوتوون و خەڵک دەبێت بزانن چی روویداوە. نەبەز دەڵێت خەڵکە مەدەنییەکە نازانێت، درۆنەکە بەر کوێ کەوتووە، نازانن چی بەسەرهاتووە، نازانن چییان بەسەر دێت. دەبێت ئەو زانیارییانە بگەن، بەتایبەتی، ئەو شوێنانەی کە مەدەنین، "دەبێت قوربانییەکان پیشانی دنیا بدەین".
بەپێی بەدواداچوونی ماڵپەڕی پەرەگراف کە رۆژی 25ـی ئادار بڵاویکردۆتەوە، لە ماوەی 26 ڕۆژی جەنگەکەدا بەهۆی بۆردومانی هەرێمی کوردستان لەلایەن ئێران و گروپە چەكدارە عیراقییەکانی نزیك لە ئێران، لانیکەم 13 کەس لە هەرێمی کوردستان کوژراون و زیاتر لە 50ـی دیکە برینداربوون. هاوکات، زیاتر لە 500 درۆن و مووشەک بەر ناوچە جیاجیاکانی هەرێم کەوتوون.
"ئیتر هەندێک جار پەیامەکان وەک خۆیان ناگەن؛ هەندێک جار میدیاکان ناتوانن بە شێوەیەکی تەندروست مامەڵە لەگەڵ رووداوەکاندا بکەن. هەندێک میدیا دەکەونە هەڵەوە". دیاری دەڵێت، "میدیا ئەرکێکی گەورەی لەسەر شانە لەم دۆخەدا، کە ترس و دڵەراوکێ بڵاونەکاتەوە، نەبێتە ئامرازێک بۆ ئەوەی دوژمن سوود لەو زانیارییە بڵاوکراوانە ببینێت".
دامهزراوهی میدیایی 964 كه له ههولێرهوه كار دهكات، چوارشهممه 25ـی ئادار، له راگهیهرناوێكدا لهبارهی ئهو رێنماییانهوه، جهختیكردهوه "قەدەغەکردنی رووماڵ، رێگری لە بڵاوبوونەوەی زانیاری نەکردووە، بەڵکو تەنیا سەرچاوەکەی گۆڕیوە، ئێستا هاوڵاتییان لەجیاتی میدیا سەرڕاست و پیشەییەکانی خۆمان، زانیارییەکانیان لە پەیجە گوماناوییەکانی تەلەگرامی تەمومژاوی و سۆشیال میدیای بێسەروبەر و میدیا بیانییەکانەوە وەردەگرن، ئەمەش زەمینە خۆش دەکات بۆ بڵاوبوونەوەی هەواڵی چەواشەکارانە و پڕوپاگەندەو تێکدانی دەروونی خەڵک".
دامهزراوهكه لهگهڵ نیشاندانی سەرسوڕمانی خۆی له ههڕهشهكانی فەرمانگەی میدیا و زانیاری به داخستن و کێشانەوەی مۆڵەت بەرامبەر دەزگاکان، دهڵێت "خەڵک گوێیان لە زرمەکەیە و دیمەنی سیستەمی بەرپەرچدانەوە دەبینن و ماڵەکەیان دەلەرێتەوە، بەڵام نازانن دوای ئەوە چی روویدا، ئەمەش سەرەنجامەکەی بێمتمانەیی لێ دەکەوێتەوە و ئاسان نییە دواتر باوەڕ بە گێڕانەوەی درەنگوەختی فەرمی بکەن". بۆیه داوا لە حکومەت دەکات پێداچوونەوە بەو بڕیارانەدا بکات.
سەرەڕای ئەوەش، شەهێن وەهاب دەڵێت، "راستە تا رادەیەک قۆرخکارییە بۆ میدیاکان و پێدانی زانیاری لەکاتی رووماڵدا، بەڵام لە لایەکی دیکەشەوە گەر بەشێوە گشتییەکەی وەک تاکێك سەیری روماڵی هەندێک میدیا بکەیت کە دەچنە شوێنی هێرشەکان بێگومان ئاسایشی گشتی و ئاسایشی کۆمەڵانی خەڵکیش تێکدەدات و کاریگەری هەیە لەسەر تێکدانی دەرونی خەڵک و ئاشکراکردنی شوێنەکان و مەترسی بۆ سەر ئاسایشی نیشتمانی دروستدەکات و زانیاری دەداتە لایەنی بەرامبەر".
"هەندێک جار ئەو فەوزایەی کە هەیە، ئەو ژمارە زۆرەی میدیایە، ئەو پارە سیاسییە زۆرەی خراوەتە میدیاوە هۆکارن بۆ ئەوەی فەوزایەک دروست بێت لە دۆخی میدیادا، بەڵام نابێت هەڕەشە هەبێت لەسەر ئازادیی کاری میدیا لە هەرێمی کوردستان،" ئەوە ووتەی بەڕێوەبەری سەنتەری میترۆیە.
دواجار سامان فەوزی جەخت لەوە دەکاتەوە، "ئەوەی پەیوەندیدارە سەندیکای رۆژنامەنووسانی کوردستانە، کە بەداخەوە ئەویش لە بارودۆخێکی نەخوازراو دایە و چەندین ساڵە کۆنگرەی نەکردووە، جۆرێک لە ساردی لە نێوان لقەکاندا هەیە. دوای ئەویش وەزارەتی رۆشنبیرییە کە مەفروزە لە رووی نەزەرییەوە لای ئەویش نەبێت، بەڵام ئەوەی روودەدات لە غیابی دەستەیەکی سەربەخۆدایە".
دیاری دەڵێت، نابێت ئەو یاسایانەی، سەرەڕای تێبینی زۆر، کە خەڵکی کوردستان شانازییان پێوەدەکەن ژێرپێ بخرێن و رێنمایی کە هێزی یاساییان نییە، جێیان بگرنەوە.
