ناوم خالید محەمەد عەلىیە، لە ساڵى 1949 لە شارى کەرکوک لە دایکبوم و ساڵی 1970 دەستم بەكاری دارتاشی كرد لە گەڕەكی رەحیماوا.
کەرەستەکانی نێو ماڵ، کورسى دەسکدار و بێدەسک، و تاخمی دانیشتن، نوستن و خواردن، لەگەڵ دۆڵاب و جامخانە و شوێنى پێخەف هەڵگرتن دروستدەكەم. هەر شتیك بەدار دروستبكرێت دروستی دەكەم.
پیشەكەم زۆر خۆشدەوێت و ئەزمونێكی باشم پەیداكردووە.
لە ساڵانى هەشتاکانەوە ژورى بازرگانى کەرکوک، وەکو هاندانێک بۆ کارەکەمان و كارئاسانی بۆ دارتاشەكان، زۆرێك لە پێداویستییەكانی بۆ دابیندەكردین، لەوانە (سپرتۆ، دارى ساج و فایبەر، هەروەها بزمار)، بەڵام ئیتر لە ساڵی 2003ەوە ئەوە نەما.
پێشتر کارى دارتاشى زۆر بوو، بەڵام ئێستا وانییە، كارەكە سست بووە و خەڵكی زۆر دەستبەرداری ئەم پیشەیە بون.
كەلوپەلی توركی، بازاڕی نەهێشتین، خەڵك نازانێت شتی توركی هەر دیكۆرە، ئێمە كورسی دروستدەكەین و گرەنتی 10 ساڵی دەكەین.
خەریكە بەرەو ئەوە دەچین، نەتوانین بژێوی خۆمان و تەنانەت کرێی دوکانەکەش دەربكەین، بەڵام من خۆشەویستیم بۆ كارەكەم وایكردووە جارێ بەردەوامبم و وازی لێنەهێنم.
