له مانگی شوباته‌وه تا ته‌مموز، ئه‌وكاته‌ی له ماڵه‌وه كه‌ره‌نتینه بوین به‌هۆی كۆرۆناوه، نزیكه‌ی 50 ئامێری ته‌مبور-مان دروستكرد و هه‌موییم فرۆشت.
ناوم عه‌باس ئه‌لیاس قولو، ته‌مه‌نم 26 ساڵه، خه‌ڵكی ناوچه‌ی تل به‌ناتی شنگالم و شه‌ش ساڵه له كه‌مپی بێرسیڤ له قه‌زای زاخۆ ئاواره‌م.
دوو ساڵه كڕین و فرۆشتن به ئامێری موزیكی ته‌مبور-ـه‌وه ده‌كه‌م، ورده‌ورده خۆم ده‌ستمكرد به دروستی ته‌مبور، سه‌ره‌تا ته‌نیا بۆ دیاری و بۆ هاوڕێیانم، نه‌ك بۆ فرۆشتن.
له‌كاتی قه‌ده‌غه‌ی هاتوچۆ و كه‌ره‌نتینه‌دا، له‌گه‌ڵ برایه‌كمدا بیرمان له‌وه‌كرده‌وه خۆمان ته‌مبور دروستبكه‌ین، ده‌رفه‌ت بوو، ده‌ستمانپێكرد و سوپاس بۆ خوا سه‌ركه‌وتوو بوین.
سێ جۆر ته‌مبور دروستده‌كه‌ین؛ كرمانجی، سوری و توركی، خه‌ڵكی شنگال و ئاواره‌كان زیاتر حه‌ز به ته‌مبوری كرمانجی ده‌كه‌ن.
ته‌مبوره‌كانی ئێمه گه‌یشۆته زۆر شوێن، له كوردستانی سوریا، كوردستانی توركیا، ته‌نانه‌ت له ئه‌ڵمانیش خه‌ڵكی كڕیویه‌تی.
نرخی ته‌مبور به‌پێی كوالێتی و جۆره‌كه‌ی ده‌گۆڕێت، له 20 تا 125 هه‌زار دیناره.
دروستكردنی هه‌ر ته‌مبورێك، چه‌ند رۆژێكی ده‌وێت، كارێكی زۆر قورس نییه، به‌ڵام ئارامگرتنی زۆری ده‌وێت.
ئه‌مه بژێویی ئێمه‌یه، هه‌م كارده‌كه‌ین و هه‌میش جاربه‌جار ته‌مبور ده‌ژه‌نین و گۆرانی ده‌ڵێین.
