ناوم جیلان خەڵەف موراد (24 ساڵ)ـم، پێنج مانگە دوكانێكی دروستكردنی شیرینی و خواردەمەنیم لە ناحیەی سنونێی شنگال كردۆتەوە و ئێستا دەتوانم بڵێم؛ خاوەنكارم.
خراپی گوزەرانی خێزانەكەم لە خوێندنی دابڕیم، بەهۆی ئاوارەییشەوە نەمتوانی بگەڕێمەوە و درێژە بە خوێندن بدەم، بۆیە هەر بڕوانامەی شەشی سەرەتاییم هەیە.
من تاقانەی حەوت برام، هەندێكیان تەمەنیان بچوكە و ناتوانن كاری دەرەوە بكەن، ئەوانیتر سەرقاڵی كرێكاریین، پێكەوە هەموان لەگەڵ باوكم بژێویی دابیندەكەین.
من ماوەی سێ ساڵ شاگردی دوكانێكی دروستكردنی شیرینی بوم، نەمویست هەر وابمێنمەوە، فێری پیشەكە بوم و لەگەڵ كچێكی تردا، لە بەهاری ئەمساڵدا دوكانێكمان بە ساڵانەی ملیۆنێك دینار بەكرێ گرت و دەستمانكرد بە كاركردن.
ئێمە شیرینی وەك كێك و كولیچەمان هەیە لەگەڵ پیتزا و هەمبەرگر.
شیرینییەكانمان زیاتر لەسەر داواكاری و خواستی كڕیارە، بە تایبەت كێك بۆ یادەكانی لە دایكبون، رۆژانە 15 تا 20 هەزار دینار قازانج دەكەین.
ئێمە نیازمان نییە لەم ئاستەدا رابوەستین، ئەگەر هاوكاری حكومی یان رێكخراوەكان هەبێت، دەمانەوێت و دەتوانین پیشەكەمان فراوانتر بكەین.
