من ناوم عەمار یاسرە، شەش ساڵم و قوتابی پۆلی یەکەمی سەرەتاییم، هەردوو دەست و هەردوو قاچم بەشێوەیەکی ئاسایی کارناكەن.
ناتوانم لەسەر پێیەکانی خۆم بوەستم، ناشتوانم بە دەستەكانم نان بخۆم و نوسین و ئەرکەکانی قوتابخانەم جێبەجێ بكەم.
قەڵەمەکە توند بە دەمم دەگرم و ئەو ئەرکانەی مامۆستا پێم دەدات لە ماڵەوە دەینوسمەوە، دەتوانم هەر بە دەمم مۆبایل بەکاربهێنم و یارییه ئەلیکترۆنییەکان بە دەم و زمانم دەكەم.
دایکم رۆژانە بۆ قوتابخانە دەمبات و دەمهێنێتەوە، هاوڕێیەکانم منیان خۆشدەوێت و منیش ئەوانم خۆشدەوێت.
حەز دەکەم وەک هەر منداڵێکی دیکە بە پێیەکانی خۆم بەڕێگادا بڕۆم و بچم بۆ قوتابخانە، زۆرم حەز لێیە بچمە کۆڵان و لەگەڵ منداڵانی گەڕەک یاری بکەم.
دەڵێن نەخۆشییەکەم چارەسەری هەیە، داواکارم لە حکومەت و خێرخوازان یارمەتیم بدەن و بتوانم نەشتەرگەری بکەم، چونكە بە تەنیا دایك و باوكم ناتوانن چارەسەری نەخۆشییەكەم بكەن.
زۆرم حەز بە خواردنی خۆشە و بەتایبەتی گوڵەبەڕۆژە، بە زمانم ناوکە گوڵەبەڕۆژەکە هەڵدەگرم و دەیخەمە دەممەوە و دەیقرتێنم.
