بەرهەمهێنانی میوەیەكی ناسكی وەكو شلك لە ئاووهەوا و خاكی كفری، هیچ كاتێك جێی باوەڕی كڕیارانی عەلوە نەبوو. بەڵام دەشتی جەلال ئەوەی كرد.
دەشتی لە تەمەنی هەشت ساڵییەوە كاری جوتیاری دەكات، سەرەتا ئەویش لەو بڕوایەدا نەبووە شلك لە گەرمیان بەرهەمبهێنرێت، تا شارەزایەكی كشتوكاڵی رێنوێنی كرد و بڕیاریدا ئەو ئەزمونە تاقیبكاتەوە.
"واماندەزانی بەرهەم و ڕوەكێكی زۆر ناسكە و بەرگەی كەشوهەوا و گەرمای گەرمیان ناگرێت و خاكمان دەستنادات بۆ شلك، بەڵام وانەبوو"، لە روبەرێكی زەوییە كشتوكاڵییەكەیدا لە گوندی (هۆمربلی گەورە)ـی قەزای كفری شەتڵی شلك-ـی رواند و بەرهەمەكەیشی خستە بازاڕەوە.
دەشتی جەلال (36 ساڵ)، باوكی یەكێك بووە لە جوتیارە نمونەییەكانی ناوچەكە و لەوەوە فێری كاری جوتیاری بووە، 50 دۆنم زەوی كشتوكاڵی هەیە بە ئاودێری و دێمییەوە، بە تێچووی یەك ملیۆن و 500 هەزار دینار بەرهەمهێنانی شلك-ـی دەستپێكرد، كاتێك كۆتاییەكانی ساڵی رابردوو تۆوی چاند تا ببێتە شەتڵ و لەمساڵدا رواندی.
"یەكەمجارە لە گوندەكەی ئێمە، لە كفری و گەرمیانیش شلك بەرهەمبهێنرێت، .. پرسیارم لە شارەزایەك كرد و بۆمدەركەوت شلك تا مانگی تەمموز و گەرمای 40 پلەی سیلیزی بەرگە دەگرێت و دەتوانێت بەرهەم بدات" دەشتی بۆ (كەركوك ناو) وای وت. هەزارەها شەتڵی شیلك-ـی رواندووە و بەرهەمی پێگەیشتووە.
نرخی یەك كیلۆ لەو شلك-ـەی گوندی هۆمربل بە چوار هەزار دینارە و هەرجارە و بڕی زیاتر لە 70 كیلۆ دەخەنە بازاڕەوە.
ئەنوەر عەبدولعەزیز، ئەندازیاری كشتوكاڵی پشتگیری زانیارییەكانی دەشتی دەكات، كە یەكەمجارە شلك لەكفری، گوند و ناحیەكانی دەوربەری بڕوێنرێت، بە (كەركوك ناو)ـی وت "شلك بەباشی لە گەرمیان دەڕوێنرێت، كێشەی لەگەڵ خاك و كەشوهەوای گەرمیاندا نییە"، پێشتر و لە ناوچەیەكی تری گەرمیان جوتیارێك لە ناوی خانوی پلاستیكی شیلك-ـی بەرهەمهێناوە بەڵام بەردەوام نەبووە.
شلك لە خانوی پلاستیكی و لە زەوی كشتوكاڵیشدا دەڕوێنرێت، لە یەكەمیاندا سەركەوتنی زیاترە، دەتوانرێت باشتر كۆنتڕۆڵ بكرێت و رێگەنەدرێت زیانی پێبگات، ئەگەر بە رێگای زانستی بكرێت، لە نێویاندا دانانی سیستمی ئاودێری زیرەك. ئەنوەر وادەڵێت.
ئەو ئەندازیارەی كشتوكاڵی ئەوەشی وت "داوا لە خەڵك دەكەم بەرهەمی خۆماڵی بكڕن و چونكە پاك و بەتامترە".
هەر لەو بازاڕی عەلوەیەی پێشتر بڕوایان بە بەرهەمهێنانی شلك لە كفری نەبوو، ئێستا بەرهەمەكەی دەشتی جەلال نامێنێتەوە، یەكسەر كڕیاری هەیە و خواستی لەسەرە.
"بەرهەمەكەم بردە عەلوەی كفری و وتم بەرهەمی خۆماڵییە، بڕوایان پێنەكردم و نەیانكڕی، بەڵام دواتر زانییان كوڕی جوتیارێكی نمونەییم و تامی شلك-ـەكەیان كرد و كڕیار هاتنە سەر زەوییەكەم، ئیتر وردەوردە كڕیاری بۆ پەیدا بوو، ئێستا شلكی هۆمربل بەناوبانگە و كڕیارێكی زۆر دەیانەوێت".
دەشتی جەلال دەڵێت بەرهەمی شلكـی زەوییەكەی تام و رەنگ و بۆنی خۆشە، پلانی هەیە لە ساڵی داهاتووشدا پرۆژەكە گەورەتر بكات؛ "30 هەزار شەڵت دەڕوێنین و بەرهەمی زۆری شلك دەخەینە بازاڕەوە".
