پرۆفایل؛ ته‌نیا رۆژێك جه‌ژنی منداڵان نییه‌

كه‌ركوك، شوباتی 2019، منداڵێكی ئاواره‌ی خه‌ڵكی حه‌ویجه‌ دوای هه‌ڵاتنی له‌حوكمڕانی داعش فۆتۆ: كاروان ساڵحی

كه‌ركوك ناو

پێچه‌وانه‌ی ژمارەیەكی زۆر لەو جەژنانەی تایبەتن بەتوێژێكی دیاریكراو و تیایاندا چالاكیی ‌و ئاهەنگ سازدەكرێن، ڕۆژی منداڵان دیارییكراو نییە‌ و لەچەند ڕۆژێكی جیاوازدا بەرز ڕادەگیرێت.

پێدەچێت ئەو جیاوازییەش لەگەڵ سروشتی منداڵاندا یەكبگرێتەوە چونكە لای ئەوان هەموو ڕۆژێك جەژنە، ئەگەر پێداویستییە سەرەكییەكانیان بۆ دابینكرابێت.

چەند ڕاستییەك دەربارەی جەژنی منداڵان:

كۆنفرانسی جیهانیی بۆ مافەكانی منداڵان كە لەشاری (ژنێڤ)ی سویسرا لەساڵی 1925دا بەڕێوەچوو، بڕیاریدا ڕۆژی (یەكی حوزەیران)ی هەموو ساڵێك جەژنی منداڵان دەبێت لەجیهاندا، ژمارەیەكی زۆر لەوڵاتان لەوانە عیراق‌ و چین ساڵانە لەو ڕێكەوتەدا جەژنی منداڵان بەرزڕادەگرن.

یەكێكی تر لەو ڕۆژانە كە بەڕۆژی منداڵان ناسراوە، (20ی تشرینی دووەم)ی هەموو ساڵێكە, ئەو وادەیە لەساڵی 1954 لەلایەن ئەنجومەنی گشتیی ڕێكخراوی نەتەوە یەكگرتووەكانەوە دیاریكراوە لەپێناو هاندانی وڵاتان بۆ لێكتێگەیشتنی زیاتر دەربارەی منداڵان‌ و خۆشگوزەرانیيان.

جگە لەو دوو مێژووە چەندین ڕۆژی جیاوازی تر هەن كە لەچەندین وڵاتی تر دیاریكراون بۆ ئاهەنگگێڕان بە بۆنەی جەژنی منداڵانەوە؛ لە بەنگلادیش، (17ی ئادار)، لە بەرازیل (12ی تشرینی یەكەم)‌ و لە بۆلیڤیا (12ی نیسان) جەژنی منداڵانە.

سەرەڕای جیاوازی ڕۆژەكانی ئاهەنگگێڕان، بەڵام چەندین چالاكی جیاواز بەو بۆنەیەوە رێكدەخرێن، لەوانە كۆنسێرت، وتارخوێندنەوە، پیرۆزباییكردن لەمنداڵان لەڕێی ناردنی پۆستكارت‌ و چەندینی تر.

  • FB
  • Instagram
  • Twitter
  • YT