دوو شۆفێری دەڕاسە لە سنوری داقوق سوتان و گەیەنرانە نەخۆشخانە، ئەوەش دوای گڕگرتنی دەڕاسەكانیان كە بەهۆیەوە ئاگرەكە سێ گوندی گرتۆتەوە.
ئەو روداوە دواینیوەڕۆی ئەمڕۆ هەینی 22ی ئایار رویدا، لەوكاتەی یەكێك لە دەڕاسەكان لەگوندی سەید وەلەد گڕدەگرێت و ناتوانرێت كۆنترۆڵبكرێت. بەهۆیەوە ئاگرەكە دەگاتە دەڕاسەیەكی تریش و دواتر بۆ سێ گوند پەرەدەسێنێت.
سەرچاوەیەكی ئاگادار لەو روداوە لە قەزای داقوق بە (كەركوك ناو)ی وت "هەردوو شۆفێری دەڕاسەكە بەشێك لە جەستەیان سوتاوە و لەژێر چاودێریدان لە نەخۆخشانەی گشتی داقوق".
وتیشی "ئاگرەكە بەهۆی گڕگرتنی یەكێك لە دەڕاسەكانەوە بووە و پەیوەندی بەكاری تێكدەرانەوە نەبووە".
تا ئامادەكردنی ئەم هەواڵە، نەتوانراوە ئاگرەكە كۆنترۆڵبكرێت بەهۆیەوە دەیان دۆنم زەوی دانەوێڵە لە گوندی سەید وەلەد سوتان و ئاگرەكە بۆ گوندەكانی تر لەوانەش عەرەب كۆیی و ئەلبو محەمەد پەڕیوەتەوە.
