كه‌ركوك؛ پێنج كه‌سی خێزانێك به‌ كۆرۆنا گیانیانله‌ده‌ستداوه‌

كۆچكردوانی یه‌ك خێزان به‌هۆی كۆرۆناوه‌، له‌ لای راسته‌وه‌: دیاره‌، ئاواز، به‌سیره‌، به‌كر، عومه‌ر

كه‌ركوك ناو – كه‌ركوك

پێنج كه‌س له‌ خێزانێكی كه‌ركوكی گیانیانله‌ده‌ستداوه‌، به‌هۆی توشبونیان به‌ ڤایرۆسی كۆرۆنا، ئه‌وه‌ش ته‌نیا له‌ ماوه‌ی 15 رۆژدا.

به‌پێی دوایین ئاماره‌كانی وه‌زاره‌تی ته‌ندروستی عیراق، ئه‌مڕۆ هه‌ینی 26ی حوزه‌یران هه‌شت حاڵه‌تی گیانله‌ده‌ستدان به‌ كۆرۆنا له‌ كه‌ركوك تۆماركراون، دوو له‌و كه‌سانه‌ش دایك و كچێك بون.

"ئه‌و دایك و كچه‌؛ پور و پورزای من بون، به‌وه‌ش ژماره‌ی كۆچكردوانی خانه‌واده‌كه‌مان به‌هۆی كۆرۆناوه‌ گه‌یشته‌ پێنج كه‌س" به‌وته‌ی سدیق شه‌فیق.

سدیق شه‌فیق (53 ساڵ)، دانیشتوی شاری كه‌ركوكه‌ و بۆ (كه‌ركوك ناو) باسی له‌وه‌كرد ته‌نیا له‌ ماوه‌ی 15 رۆژدا، سێ پور، دوو خاڵ و پورزایه‌كی توشی كۆرۆنا بون و هه‌ر به‌هۆی ڤایرۆسه‌كه‌شه‌وه‌ گیانیانله‌ده‌ستداوه‌.

"12 بۆ 18ی حوزه‌یران دوو خاڵم (عومه‌ر ئه‌حمه‌د ئه‌مین – 56 ساڵ) و (به‌كر ئه‌حمه‌د ئه‌مین – 57 ساڵ) له‌گه‌ڵ پورێكم (به‌سیره‌ ئه‌حمه‌د ئه‌مین - 58) كه‌ دانیشتوی گه‌ڕه‌كی ئازادی بون له‌ نه‌خۆشخانه‌ گیانیانله‌ده‌ستدا".

سدیق ده‌ڵێت به‌ره‌به‌یانی ئه‌مڕۆ هه‌ینی 26ی حوزه‌یران پورێكی دیكه‌ی به‌ناوی (ئاواز ئه‌حمه‌د ئه‌مین – 60 ساڵ) كه‌ له‌ ماڵه‌وه‌ خۆی كه‌ره‌نتینه‌ كردبوو له‌گه‌ڵ كچی پوری (دیاره‌ - 42 ساڵ) كه‌ خێزانداره‌ و له‌ بازیان نیشته‌جێیه‌ به‌ كۆرۆنا گیانیانله‌ده‌ستدا.

پێشتر باوه‌ڕمان به‌ كۆرۆنا نه‌بوو تا ئازیزانمان توشی په‌تاكه‌ بون، بۆیه‌ تكایه‌ خۆتان بپارێزن

ئه‌و پێنج هاوڵاتییه‌ی گیانیانله‌ده‌ستداوه‌ جگه‌ له‌ كۆرۆنا نه‌خۆشی تری درێژخایه‌نی وه‌ك شه‌كره‌ و فشاری خوێنیان هه‌بووه‌.

سدیق شه‌فیق دوای مه‌رگی ئازیزانی داوای خۆپارێزی له‌ هاوڵاتیان ده‌كات، وه‌ك ئه‌و وتی "پێشتر باوه‌ڕم به‌ كۆرۆنا نه‌بوو تا بینیمان كه‌سوكارمان توش بوو، بۆیه‌ تكایه‌ خۆتان بپارێزن".

ئه‌و خێزانه‌ گومانیان هه‌یه‌ سه‌ره‌تای گه‌یشتنی ڤایرۆسه‌كه‌ له‌ رێی ئه‌ندامێكی خێزانه‌كه‌یانه‌وه‌ بێت كه‌ بۆ چاره‌سه‌ری پزیشكی پێشتر سه‌ردانی به‌غدای كردووه‌.

كۆی ژماره‌ی توشبوانی كۆرۆنا له‌ كه‌ركوك گه‌یشتۆته‌ هه‌زار و 43 كه‌س، له‌و ژماره‌یه‌ 328 كه‌س چاكبونه‌ته‌وه، 672 توشبوو چاره‌سه‌ر وه‌رده‌گرن و 43 هاوڵاتی هه‌ڵگری ڤایرۆسه‌كه‌ش گیانیانله‌ده‌ستداوه.

coronakirkuk
كه‌ركوك، ئایاری 2020، نه‌خۆشخانه‌ی تایبه‌ت به‌ توشبوانی كۆرۆنا فۆتۆ: راگه‌یاندنی ته‌ندروستی

سەباح نامیق، به‌ڕێوه‌به‌ری ته‌ندروستی گشتی له‌ فه‌رمانگه‌ی ته‌ندروستی كه‌ركوك به‌ (كه‌ركوك ناو)ی وت "ئێستا ڤایرۆسی كۆرۆنا لە زۆربەی شوێنەكانی شاره‌كه‌ بڵاوبۆته‌وه‌، ئه‌وانه‌ی گیانیانله‌ده‌ستداوه‌ زۆرینه‌ ته‌مه‌نیان له‌سه‌رو 60 ساڵییه‌وه‌یه‌، له‌گه‌ڵ چه‌ند حاڵه‌تێكی ته‌مه‌ن 30 ساڵان بێ ئه‌وه‌ی هیچ نەخۆشییەكی دیكەیان هەبوبێت".

ژماره‌ی توشبوانی كۆرۆنا له‌ هه‌ڵكشاندایه‌ و له چه‌ند رۆژی رابردودا ته‌ندروستی كه‌ركوك نه‌خۆشخانه‌ی گشتی شاره‌كه‌ی بۆ چاره‌سه‌ری هه‌ڵگرانی ڤایرۆسه‌كه‌ ته‌رخانكرد.

سه‌باح نامیق رونیكرده‌وه‌ بڕیاریانداوه‌ توشبوانی كۆرۆنا كه‌ نیشانه‌كانی په‌تاكه‌یان به‌ سوكی تێدا ده‌ركه‌وتووه‌ و بارودۆخی ته‌ندروستییان جێگیره‌، له‌ ماڵه‌كانی خۆیاندا كه‌ره‌نتینه‌ بكرێن نه‌ك له‌ نه‌خۆشخانه‌، به‌ڵام رۆژانه‌ تیمه‌ ته‌ندروستییه‌كان له‌ ماڵه‌وه‌ سه‌ردانیان بكه‌ن و پشكنینیان بۆ بكه‌ن.

ژماره‌ی توشبوانی كۆرۆنا له‌ عیراق گه‌یشتۆته‌ 41 هه‌زار و 193 كه‌س، له‌و ژماره‌یه‌ 18 هه‌زار و 859 كه‌س چاكبونه‌ته‌وه‌، هه‌زار و 559 هاوڵاتی هه‌ڵگری ڤایرۆسه‌كه‌ش گیانیانله‌ده‌ستداوه‌.

  • FB
  • Instagram
  • Twitter
  • YT