وه‌قفی سونی كه‌ركوك داده‌خرێت: چوار مامۆستای ئایینی به‌ كۆرۆنا گیانیانله‌ده‌ستداوه‌

كه‌ركوك، ئاداری 2020، هه‌ڵمه‌تی پاككردنه‌وه‌ و ده‌رمانڕشتن له‌ مزگه‌وت و شوێنه‌ ئاینییه‌كان بۆ خۆپارێزی له‌ كۆرۆنا فۆتۆ: راگه‌یاندنی ئیداره‌ی كه‌ركوك

كاروان ساڵحی – كه‌ركوك

وه‌قفی سونی له‌ كه‌ركوك، بڕیاریدا تا كاتێكی نادیار ده‌رگای به‌ڕێوه‌به‌رایه‌تییه‌كه‌ی دابخات به‌هۆی مه‌ترسی كۆرۆناوه‌، ئه‌وه‌ش دوای گیانله‌ده‌ستدانی چوار مامۆستای ئایینی و توشبونی ژماره‌یه‌ك فه‌رمانبه‌ری دیكه‌یان به‌ ڤایرۆسه‌كه‌.

له‌ مانگی حوزه‌یران و سه‌ره‌تای ته‌مموزدا، چوار پێشنوێژ و مامۆستای ئایینی له‌ شاری كه‌ركوك دوای توشبونیان به‌ ڤایرۆسی كۆرۆنا گیانیانله‌ده‌ستداوه‌.

ئه‌حمه‌د موده‌ریس، به‌ڕێوه‌به‌ری وه‌قفی سونی له‌ كه‌ركوك به‌ (كه‌ركوك ناو)ی وت "ئه‌و چوار پێشنوێژ و وتارخوێنه‌ی گیانیانله‌ده‌ستداوه‌ هه‌ریه‌ك له‌ شێح حسێن به‌رزنجی، جه‌مال حافز، محه‌مه‌د فاتیح جه‌باری و مامۆستا ئه‌حمه‌د بون".

وه‌ك ئه‌و ده‌ڵێت چوار مامۆستاكه‌ ته‌مه‌نیان هه‌بووه‌ به‌ڵام هۆكاری سه‌ره‌كی گیانیانله‌ده‌ستدانیان ڤایرۆسی كۆرۆنا بووه‌.

هه‌روه‌ها وتی "شه‌ش فه‌رمانبه‌ری كارگێڕی ناو وه‌قفی سونیش توشی كۆرۆنا بوین و به‌پێی رێكاره‌ ته‌ندروستییه‌كان كه‌ره‌نتینه‌ كراون".

waqfi swnni
به‌ڕێوه‌به‌رایه‌تی وه‌قفی سونی له‌ كه‌ركوك تا كاتێكی نادیار داده‌خرێت فۆتۆ: كه‌ركوك ناو

به‌ڕێوه‌به‌ری وه‌قفی سونی كه‌ركوك ده‌ڵێت له‌ پێناو رێگری له‌ بڵاوبونه‌وه‌ی زیاتری كۆرۆنا و مه‌ترسییه‌كانی، بڕیاریانداوه‌ به‌ڕێوه‌به‌رایه‌تییه‌كه‌یان تا كاتێكی نادیار دابخرێت، دوای هه‌ڵمه‌تی ده‌رمانڕشتن و مادده‌ی دژه‌ ڤایرۆس.

لەگەڵ بڕیاری قەدەغەی هاتوچۆ لە ناوەڕاستی ئاداری رابردوو، ته‌واوی مزگه‌وت، كڵێسا، په‌رستگا و شوێنه‌ ئاینییه‌كانی تر له‌ عیراق و هه‌رێمی كوردستان به‌روی نوێژخوێنان و زیاره‌تكارانیاندا داخران، به‌ ئامانجی خۆپارێزی و رێگری له‌ بڵاوبونه‌وه‌ی زیاتری ڤایرۆسی كۆرۆنا.

له‌ هه‌فته‌ی رابردوشدا به‌پێی چه‌ند رێكار و مه‌رجێك له‌ كۆی 800 مزگه‌وتی كه‌ركوك ژماره‌یان كرانه‌وه‌.

ژماره‌ی توشبوانی كۆرۆنا له‌ كه‌ركوك گه‌یشتۆته‌ هه‌زار و 661 كه‌س، له‌و ژماره‌یه‌ 666 كه‌س چاكبونه‌ته‌وه‌، 87 هاوڵاتی گیانیانله‌ده‌ستداوه‌ و 908 توشبوو چاره‌سه‌ر وه‌رده‌گرن.

  • FB
  • Instagram
  • Twitter
  • YT