هێزە ئەمنییەكانی كەركوك، لە بەردەم دەزگای ئاسایشی نیشتیمانیی كەركوك تەقە لە "خۆكوژێك" دەكەن و بەر لە خۆتەقاندنەوەی دەیكوژن.
روداوەكە كاتژمێر 8:45 خولەكی بەیانی ئەمڕۆ پێنجشەممە 29ی نیسان رویدا، بەرلەوەی خۆكوژەكە بچێتە ناو سیاجی دەزگای ئاسایشی نیشتیمانیی كەركوك و خۆی بتەقێنێتەوە.
سەرچاوەیەك لە ئیدارەی كەركوك، بە (كەركوك ناو)ی وت "خۆكوژەكە پشتێنی بۆمبڕێژكراوی بەستبوو، هەوڵیداوە بچێتە ناو دەزگای ئاسایشی نیشتیمانیی كەركوك، بەڵام لەلایەن پاسەوانانی دەزگاكەوە تەقەی لێكراوە و تەقیوەتەوە".
دەزگای ئاسایشی نیشتیمانیی كەركوك دەكەوێتە نزیك ژوری بارزگانی و گۆڕەپانی ئاهەنگەكان لە ناوەندی شاری كەركوك.
دەزگاكە ژمارەیەك دەستگیركراوی تیایە كە تۆمەتبارن بە تیرۆر و بازرگانیكردن بە گورچیلەی هاوڵاتیانەوە.
دوای روداوەكە هێزە ئەمنییەكان، لە چەند شوێنێكی ناو شار بڵاویانپێكراوە و دەرگای چەند دەزگایەكی ئەمنییان بەكاتی داخست، لەوانەش دەزگای هەواڵگری كەركوك.
