لەسەر پشتی راكشاوە و دەمامكی ئامێری هەناسەدانەكە دەموچاوی شێواوی داپۆشیووە، كاتێك هەناسە دەدات بە دەنگی زبری سنگی ئارامی ژورەكە تێكدەدات، لە تەنیشتیەوە هاوسەرەكەی بە توندی فشار دەكاتە سەر سنگی و دەپاڕێتەوە تا هەناسەیەكی قوڵ هەڵمژێت.
روەیدا (50 ساڵ) هاوسەری (خالید)-ـە، سێ دەمامك بەستووە و دەستكێشێكی شینی لەدەستدایە، "نازانم چی بكەم، پزیشكەكە دەڵێت پێویستی بە ئۆكسجینە، بەڵام نەخۆشخانەكە پڕ بووە و خزمەتگوزارییەكانیش باش نین، بۆیە چاوەڕێی هاتنی عەبدوڵا دەكەین، كە بوتڵی ئۆكسجین دەگەیەنێتە ماڵان".
نەخۆشخانەكان وێرانەن
نەخۆشخانەكانی موسڵ لە توانایاندا نەبوو ژمارەیەكی زۆر لە توشبوانی ڤایرۆسی كۆرۆنا لەخۆبگرن.
باڵەخانەی نەخۆشخانە گەورەكان لە شەڕی دژ بە "دەوڵەتی ئیسلامی لە عیراق و شام - داعش" بەهۆی بۆردومانەوە خاپور بون و كەرەڤانە دانراون كە بە ئەستەم ژمارەیەكی كەم نەخۆش دەگرن، ئەوەش بەبێ یاوەری نەخۆش.
پێنج ساڵ بەسەر كۆنتڕۆڵكردنەوەی شارەكەدا تێدەپەڕێت، بەڵام هێشتا كەرتی تەندروستی پشتگوێخراوە، لە چوار نەخۆشخانە سەرەكییەكەی موسڵ تائێستا هیچ یەكێكیان بنیاتنەنراوەتەوە، لەوانە نەخۆشخانەی ئیبن سینا، كە دوەم گەورەترین نەخۆشخانەیە لە عیراق و هاوشێوەی كۆمەڵگەی پزیشكی بەغدادە.
هەوڵ و كۆششی كەسی
زۆرێك لە هاوڵاتیانی كەمدەرامەت و هەژار، كەوتونەتە ژێر كاریگەری ئەو بۆشاییەی شەڕ لە كەرتی تەندروستیدا دروستیكرد، لەكاتێكدا خزمەتگوزاری تەندروستی ئەهلیش لە توانای گیرفانی زۆربەی توێژەكانی موسڵدا نییە.
ئەو بارودۆخە وا لە عەبدوڵا، یەكێك لە گەنجەكانی موسڵ دەكات كلینیكی خۆڕایی بكاتەوە و بە هاوكاری بەخشەران پێداویستی تایبەت بە چاودێری توشبوانی كۆرۆنا دبینبكات، لەوانە بوتڵی ئۆكسجین، كە لە كلینیكەكەی ئەو پڕ دەكرێنەوە و بە هاوڵاتیان دەدرێن، تا دوای بەكارهێنان و كاتێك پێویستیان پێی نامێنێت، دوبارە بوتڵەكان بگەڕێننەوە.
عەبدوڵا تا درەنگانی شەو لە كلینیكە بچوكەكەیدا دەمێنێتەوە و چاوەڕێی هەر كەسێك دەكات پێویستی بە بوتڵی ئۆكسجین بێت و لەوێ وەریبگرێت.
بەشێك لە توشبوانی كۆرۆنا بەهۆی هەوكردنی سییەكانیانەوە پێویستیان بە ئۆكسجین و هەناسەدانی دەستكرد هەیە.
وەلید ئۆتۆمبێلەكەی لە بەردەم كلینیكەكەدا رادەگرێت و بە هاوكاری عەبدوڵا بوتڵی ئۆكسجین سەردەخات، "لە پۆستێكی عەبدوڵاوە لە فەیسبوك ژمارەی مۆبایلەكەیم وەرگرت و لای خۆم پاراستم، چونكە دڵنیابوم باوكە بە تەمەنەكەم توشی كۆرۆنا دەبێت، لەوكاتەشدا دوایین شت كە بیری لێبكەمەوە ئەوەیە بچمە نەخۆشخانە" وەلید بۆ (كەركوك ناو) وای وت.
لە سەرەتای سەرهەڵدانی كۆرۆناوە عەبدوڵا هاوكاری زیاتر لە 100 حاڵەتی توشبوو بە كۆرۆنای كردووە.
عەبدوڵا، كە دەرچوی كۆلێژی یاسای زانكۆی موسڵە بە (كەركوك ناو)ـی وت "نەمتوانی دەستەوەستان بم و تەنیا تەماشا بكەم، لە كاتێكدا ئازارم دەچەشت كە دەمبینی هاوڵاتیان لە نەخۆشخانەكاندا شوێن نەبوو بیانگرێتەخۆ و لە كەمی ئۆكسجین دەترسان، بۆیە ئەم كلینیكەم بە سەرپەرشتی پزیشكانی پسپۆڕ كردەوە".
زەنگی مۆبایلەكەی عەبدوڵا ناوەستێت؛ كاتێك (كەركوك ناو) بۆ ئامادەكردنی ئەم راپۆرتە قسەی لەگەڵدا دەكرد، زیاتر لە 10 پەیوەندی پێوەكرا لە نێویاندا ئەو كەسانەی داوای بوتڵی ئۆكسجینیان دەكرد.
"زۆربەی ئەو حاڵەتانەی دێتە لای ئێمە پاڵپشت بە قسەی پزیشك پێویستیان بە ئۆكسجینە، بۆیە بە سەرپەرشتی پزیشكانی پسپۆڕ فێربوم چۆن ئامێری ئۆكسجین ببەستم و كات و شێوازی دانانی رێكبخەم، بەڵام بەداخەوە هەندێك حاڵەت هەبون چارەسەر نەكران، چونكە درەنگ بەدەم نەخۆشەكەوە رۆیشتون" عەبدوڵا وادەڵێت.
ئەو دەڵێت كارەكەی دورە لە پسپۆڕییەكەی خۆی، سەرباری ئەوەش بیر لە دامەزراندن ناكاتەوە، چونكە دامەزراندن بۆ گەنجان لە خەونیشدا نییە.
خۆبەخشەكانیش پارێزراو نەبون
لە شەوێكی ساردی تاریكدا، گەنجێك دەچێتە بەر دەرگای كلینیكەكەی عەبدوڵا و بە دەنگێكی توندی هەڕەشەئامێز پێیدەڵێت نەخۆشەكەیان مردووە و ئەو هۆكار بووە، "لەوكاتەدا بیرم لەوەكردەوە واز لەم كارە بهێنم چونكە بەرپرسیارێتی مردنی نەخۆشەكەیان كردە سەر من، بەڵام بیرم لەو كەسانە كردەوە كە جگە لە من كەسیان نییە هاوكارییان بكات"، عەبدوڵا وای وت.
دكتۆر ئیسار تائی بە (كەركوك ناو)ـی وت "ئێمە وەك پزیشكان لە هێرش و پەلاماردان پارێزراو نەبوین وەك فەرمانبەری حكومی ئیتر چۆن خۆبەخشێك پارێزراو دەبێت كە سەر بە هیچ دامەزراوەیەك نییە بیپارێزێت".
تائی لە بارەی عەبدوڵاوە دەڵێت "لەسەرەتای كۆرۆناوە ناویم بیستووە و دەزانم پزیشكەكان هاوكارین و بەخۆڕایی خزمەتگوزاری پزیشكی پێشكەشدەكەن بەهۆی خراپی بارودۆخی تەندروستی و گرانی نرخی چارەسەر".
عەبدوڵا پێیوایە خالد، ئەو نەخۆشەی لە بارودۆخێكی خراپدا، یەكێكە لەو نمونانەی وایلێدەكات بەردەوامبێت، چونكە ئێستا لە تەندروستییەكی باشدایە دوای تەحەدای كۆرۆنا، كە بەهۆیەوە رێژەی ئۆكسجینی بۆ كەمتر لە سەدا 70 دابەزی، بەڵام ئەو جێینەهێشت و هاوكاری كرد تا لەو نەخۆشییە رزگاری بوو، ئێستاش ناوبەناو سەردانی كلینیكەكەی دەكات.
خالد (70 ساڵ)، دەستی دەخاتە سەر دەمی لەكاتی كۆكیندا و دەڵێت "چاوەڕێ نەبوم هەناسەدانم ئاسایی ببێتەوە.. روخساری عەبودیم لەسەر سەرم بە ناڕونی دەبینی بەڵام جێینەهێشتم".
دوو ساڵ دوای سەردانی كۆرۆنا
داواكاری لە عەبدوڵا-ـیی خۆبەخش هێشتا كۆتایی نەهاتووە، هەرچەندە زیاتر لە دوو ساڵە كۆرۆنا سەریهەڵداوە، ئەو كلینیكەكەی بەهۆی نەبونی توانای كرێوە داخستووە، بەڵام ماڵەكەی كردۆتە كلینیكێكی پڕ لە بوتڵی ئۆكسجین.
دایكی عەبدوڵا دەڵێت "دەترسام توشی كۆرۆنا بێت، سەرباری ئەوەی زۆر بە كەمیش دەهاتەوە بۆ ماڵەوە بەڵام ئێستا هانی دەدەم كاری خێرخوازی ئاوا بكات".
گەشتێك لەگەڵ توشبوانی شێرپەنجە
عەبدوڵا لەم دواییانەدا لەڕێی بەخشەرانەوە توانی دەوروبەری 50 ملیۆن دیناری عیراقی كۆبكاتەوە بۆ چارەسەری توشبوانی شێرپەنجە، هەوڵیدا لەڕوی میدیاییشەوە سەرنجەكان بۆ پارێزگای نەینەوا رابكێشێت كە ژمارەی دانیشتوانی زیاتر لە چوار ملیۆن كەسە و تائێستا ئامێری تایبەت بە چارەسەری تیشكی شێرپەنجەی نییە.
بەهۆی نەبونی ئەو ئامێرەوە توشبوانی شێرپەنجە بە ناچاری دەچنە بەغداد، یان پارێزگای هەولێر، كە خەرجی هاتوچۆ و چارەسەریش لانیكەم سێ ملیۆن دینار (دوو هەزار دۆلار)ی دەوێت.
عەبدوڵا دەڵێت "هەموو رۆژێك بانگەواز دەكەم تا ئامێری چارەسەری تیشك بۆ موسڵ دابینبكرێت كە بەهۆیەوە سەدان نەخۆش دەچنە پارێزگاكانی تر و لەوێ چارەسەر وەرگرن و زۆر لەسەر كەسوكاریان دەكەوێت".
لە دوای كۆنتڕۆڵكردنەوەی موسڵ لە دەستی داعش، چەندین دەستپێشخەری كراون بە ئامانجی گەڕانەوەی ژیان بۆ ئەو شارەی لەلایەن حكومەتەوە پشتگوێخراوە، لە نێویاندا دەستپێشخەرییەكەی عەبدوڵا یەكێكیانە، تا هاوكاری ئەو هاوڵاتییانە بكەن لە هەژاریدا هێندەی دیكە كەوتنە ژێر كاریگەرییەكانی شەڕ و لێكەوتەكانی كۆرۆناوە.
