دوو هاوڵاتی نیشتەجێی قەزای كفری (كوردێك و توركمانێك)، بڕیاریانداوە خانوویەكی كۆنی خۆیان ببەخشنە شوێنەواری كفری، ئەوەش بەبێ بەرامبەر و لە پێناو خزمەتی گشتی-دا.
تەمەنی خانووەكان بۆ 140 ساڵ لەمەوبەر دەگەڕێتەوە، لەسەر دیزانێكی كۆن دروستكراون و سەرەنجڕاكێشن، بەڵام كۆن بون و پێویستیان بە نۆژەنكردنەوەیە، تا وەكو شوێنەوارێكی گرنگی قەزاكە بمێننەوە.
سوبحی عەبدوڵا توركمانە، لەگەڵ ئەیوب عەلی چایچی كوردە و هەردوكیان خەڵكی رەسەنی شارەكەن و دراوسێی یەكترن، یەكێكیان خانووەكەی 400 مەترە و ئەوەی تر 240 مەترە، پێكەوە بڕیاریاندا پارێزگاری لە مانەوەی خانووەكانیان بكەن و رادەستی شوێنەواری كفری بكەن.
سوبحی وتی "خانووەكانمان شان بە شانی قەیسەری كۆنی كفرین، خانووە 400 مەترییەكە هی منە، ماوەیەك لەمەوبەر ویستم بە 12 ملیۆن دیناری عیراقی بیفرۆشم، بەڵام كە بیرمكردەوە ئەمە مێژوی كفری دەگێڕێتەوە و پێویستە بمێنێتەوە، بۆیە ئێستا بە 100 ملیۆن دیناریش نایفرۆشم".
قه‌زای كفری، كه مێژوی دروستبونی لە شوێنی ئێستایدا بۆ نزیکەی دووسەد ساڵ لەمەوپێش ده‌گه‌ڕێته‌وه، یه‌كێكه له شاره مێژوییه‌كانی “ناوچه‌كانی جێناكۆك".
ناوەندی كفری چه‌ندین شوێنی مێژویی گرنگی تێدایه، له‌وانه سه‌رای كفری، كه له ساڵی 1919دا له‌لایه‌ن ئینگلیزه‌كانه‌وه دروستكراوه، به‌ڵام ئێستا تاڕاده‌یه‌ك به پشتگوێخراوی جێهێڵدراوه. هێشتا شوێنه‌وار و خانوو و بینای والییه‌كانی عوسمانی و میرنیشنه‌كانی كورد له قه‌زاكه‌دا ماون.
بڕیارمانداوە بیكەینە مۆزەخانە بۆ شارەكەم و كلیلەكانی رادەستی شوێنەواری كفری بكەین
سوبحی وتی "بڕیارمانداوە بیكەینە مۆزەخانە بۆ شارەكەم و كلیلەكانی رادەستی شوێنەواری كفری بكەین، ئامانجمان تەنیا خزمەتی گشتییە نەك قازانجی گیرفانی خۆمان..."، زیاتر وتی "خانوەكانمان لە گەڕەكە كۆنەكانی كفریە و هەردوو خانووەكە تاپۆی رەشمان هەیە، داوا لە خێرخوازان و لایەنی پەیوەندیدار و حكومەت و رێكخراوەكان دەكەین، نۆژەنی بكەنەوە و بیكەنە مۆزەخانەیەكی كەلەپوری بۆ ئەوەی گەشتیاران سەردانی بكەن".
بەپێی وتەی سوبحی پێداویستییەكانی هەردوو خانووەكە لە بەرد و گەچ و كەرەستەی خۆماڵی كفری دروستكراون، وەستای خۆماڵیش دروستیكردون، هەر بۆیە وتی "گرنگە ئەم مێژووە گرنگە بۆ نەوەكانی داهاتوو بەجێبھێڵین".
"دوای بریارەكەی ئێمە، چەند هاوڵاتییەكی دەوروبەر پێشوازییان لەو بڕیارە كردووە و ئەوانیش لە بیركردنەوەدان بە هەنگاوی هاوشێوە".
