سەوسەن عەبدولواحد جەدوع، ئەندامی ئەنجومەنی پارێزگای كەركوك لە كوتلەی بەرەی توركمانی جەختیكردەوە لە بەردەوامی بایكۆتی دانیشتنەكانی ئەنجومەن تا مافەكانیان بەدەستدەهێنن و پێشیوانییە ئەو هەنگاوە كاریگەری لەسەر دۆسیەی خزمەتگوزارییەكان دابنێت.
لەم چاوپێكەوتنەدا لەگەڵ (كەركوك ناو)، جەدوع باس لە لێكەوتەكانی بایكۆت دەكات و دەڵێت چاوەڕێی بڕیاری یەكلاییكەرەوەی دادگای فیدراڵی دەكەن، بەڵام كارەكانیان رانەگرتووە و لە ئەنجومەن دەوام دەكات، بۆ پێشوازیكردن لە هاوڵاتیان و گوێگرتن لە كێشەكانیان، سەرباری سەردانیكردنی فەرمانگە خزمەتگوزارییەكان.
كەركوك ناو: ئەنجومەنی پارێزگا پێویستی بە پێكهێنانی لیژنەكان و بودجە هەیە تا كارەكانی بكات، بایكۆتی توركمان كاریگەری لەسەر تەواونەبونی ئەو رێكارانە نەبووە؟
سەوسەن جەدوع: ئەو هاوڵاتییانەی دەنگیان بە ئێمە داوە مافیان بەسەرمانەوە هەیە، بە ئامانجی خزمەتكردنی هاوڵاتیان و پارێزگاكەمان چوینە هەڵبژاردنەوە، لە پێشەنگی كارەكانیشماندا پێشكەشكردنی خزمەتگوزارییە.. ئەوەش ئەو دوو كار و هەنگاوەیە كە پارێزگای كەركوك لە ساڵی 2003ـەوە بەدەستیەوە دەناڵێنێت، كەركوك هاوشێوەی عیراقێكی بچوككراوەیە، شارێكی دەوڵەمەند بە زێڕی رەش (نەوت)ـە، بەڵام سودی لە خێروبێرەكەی وەرنەگرتووە، پارێزگاكە خزمەتگوزاری و پرۆژە و بنیاتنانی بەخۆیەوە نەبینیووە.
بایكۆتی توركمان بەهۆی نەبونی تەوافوقی سیاسییەوەیە، كە لەو رێیەوە بتوانێت خزمەتگوزاری راستەقینە پێشكەش بە پارێزگاكە بكات، سەرباری ئەوەش نارونی لە پێكهێنانی حكومەتی خۆجێییدا هەیە و پێچەوانەی یاسا و هەموو تەوافوقە سیاسییەكان بوو، ئێمە ماف و شایستەكانمان دەوێت، مافی هیچ پێ:هاتەیەكی دیكە نابەین بەڵام نامەوێت مافمان بخورێت وەكو پێكهاتەی توركمان، بۆیە بەڕێوەبردنی دانیشتنی ئەنجومەن بەبێ توركمان وەكو پەراوێز و پشتگوێخستن و سڕینەوەی پێكهاتەكە و دەركردنی لە خزمەت هەژماردەكەین، ئەمەش رەتدەكەینەوە، چونكە دەنگدەرانمان چاوەڕێی خزمەتگوزاری لە ئێمە دەكەن.
كەركوك ناو: توركمان تا كەی بایكۆتی دانیشتنەكانی ئەنجومەن دەكات؟
سەوسەن جەدوع: دۆسیەكەمان (سكاڵا دژی دانیشتنی ئەنجومەن بۆ پێكهێنانی حكومەتی خۆجێیی) لە دادگای فیدراڵی بۆ 6ـی تشرینی دوەمی 2024 دواخراوە، ئەگەر ئەنجامەكەی جێی رەزامەندیمان نەبێت، ئەوا رێگای دیكە هەیە و روو لە دادگای ئیداری دەكەین، ئێمە چاوەڕێین و بە هەموو توانامانەوە كاردەكەین توركمان بە مافەكانی بگات.
پێكهاتەی توركمان لە بایكۆت بەردەوام دەبێت، لەگەڵ ئەوەشدا، سەرۆكی كوتلەكانمان بەردەوامن لە گفتوگۆ و كۆبوونەوە تا بە چارەسەرێكی یەكلاییكەرەوە دەگەن.
كەركوك ناو: سروشتی كاری ئەنجومەن و ئەركەكانی ئێوە بە دیاریكراو چییە؟
سەوسەن جەدوع: ئێمە لە ئەنجومەن ژمارەیەك ئەرك و كاری سەرەكیمان لە ئەستۆدا هەیە، لە نێویاندا:
- وەرگرتنی سكاڵای هاوڵاتیان و گوێگرتن لە بۆچوون و پێشنیازەكانیان.
- پێشوازی لە فەرمانبەرانی ئەنجومەن، خەڵك، یەكە ئیدارییەكان بۆ گوێگرتن لە كێشەكانیان و تۆماركردنی.
- سەردانمان هەیە بۆ فەرمانگە خزمەتگوزارییەكان.
هەروەها بەردەوام لە ئامادەباشیداین بۆ راپەڕاندنی ئەركەكانمان وەكو ئەندام لە ئەنجومەنی پارێزگا.
كەركوك ناو: بایكۆتی دانیشتنەكانی ئەنجومەن لەلایەن بەرەی توركمانییەوە كاریگەری لەسەر كەرتی خزمەتگوزاری لە پارێزگاكە دانانێت؟
سەوسەن جەدوع: مافی هاوڵاتیانە دەرەنجامی كاری ئەنجومەنی پارێزگا ببینن، بەڵام پێمانوایە هەموو درەنگكەوتنێك خێری تێدایە، وەكو نوێنەرانی توركمان هەوڵدەدەین بە رێكوپێكی كارەكانمان بكەین پاڵپشت بە یاسا و رێنماییەكان، تا دەرەنجامێكی دورمەودا و باشی لێبكەوێتەوە، لەگەڵ ئەوەشدا چەندین خزمەتگوزاری و پرۆژەكانی بودجەی وەبەرهێنان بەردەوامن، لە نێویاندا سەرژمێری گشتی دانیشتوان، دامەزراندن، پرۆژەكانی ئاو، كارەبا، قیرتاو و بۆ نمونە پرۆژەی ئاوەڕۆی كەركوك، هەندێك پرۆژەی دیكەی دوو ساڵ لەمەوبەر یان پێشتر هەن و كاركردن تیایاندا بەردەوامە، واتە كار و پرۆژە خزمەتگوزارییەكان وەستاون.
شارەكە ئارامە و خەڵكەكەی پێكەوە دەژین، ئەو ئاڵۆزی و ناكۆكییەكەی هەیە تەنیا لەرووی سیاسییەوەیە تا ئەوكاتەی دۆسیەكە بە بڕیاری دادگای فیدراڵی یەكلاییدەكرێتەوە.
كەركوك ناو: بەرەی توركمانی ستراتیژییەكی دیاریكراوی هەیە بۆ كاتێك ئەگەر بەشداری حكومەتی خۆجێیی كرد؟
سەوسەن جەدوع: ناسنامەی توركمانی لەڕێی خزمەتكردنی كەركوكەوە جێگیر دەكرێت، توركمان گرنگی زۆر بە دۆسیەی ئەمنی و ئیدارەدانی هاوبەش دەدەن، هەوڵدەدەین بۆ بەدیهێنانی سەقامگیری و ئاسایش، نامانەوێت بگەڕێینەوە بۆ سەردەمی ترس و پشێوی، هەروەها سەرنج دەخەینە سەر جێبەجێكردنی سادەترین پرۆژەكانی وەكو دابینكردنی ئاو و كارەبا و قیرتاوكردنی شەقامەكان، لەگەڵ چاندنی دار و زیادكردنی روبەڕی سەوزایی و بنیاتنانی نەخۆشخانە.
وەك شارەزایەكی پەروەردەیی، تێبینیم لە قوتابخانەدا بۆشایی گەورەیان لە ژمارەی كارمەنددا (مامۆستا و فەرمانبەر) هەیە، گرنگیش بە بنیاتنانی هۆتێل و هانی وەبەرهێنان دەدەین لە كەرتی گەشتیاری و گەشەپێدانی شوێنەوارەكانی وەكو قەڵا و قشڵە، بەهەمانشێوە گرنگی بە قەزا و ناحیەكان دەدەین، هەوڵدەدەین بۆ هاندانی كشتوكاڵ لە چەندین ناوچە.
دەربارەی مافەكانی توركمان لە دۆسیەی ململانێی موڵكایەتی، كە روبەڕوی غەدر بوونەتەوە لە سەردەمی رژێمی پێشوی عیراق و زەوییەكانیان زەوت كراو و نەگەڕێنراوەتەوە، ئەو دۆسیەیە لە پێشەنگی ئەو كارانەدایە كە بەدوایاندا دەچین.
هەروەها هەوڵ بۆ بەدیهێنانی هاوسەنگی لە ئیدارەداندا دەدەین بەڕێژەی سەدا 32 بۆ هەر پێكهاتەیەك تا گرەنتی ئەوە بكەین كەركوك ئیدارەیەكی هاوبەشی هەبێت بەبێ ئەوەی هیچ پێكهاتەیەك پەراوێز بخرێت.
