"من ناچمە سوڕی مانگانە چی بكەم"، پەیجێك لە تۆڕی كۆمەڵایەتی فەیسبوك، بەناوی سەنتەری سروشتی رانییە، ڤیدیۆیەكی لە 16ی شوباتی 2025 بڵاوكردۆتەوە بۆ ئەوانەی ناچنە سوڕی مانگانەوە.
ڤیدیۆكە 9.600 كەس بینیویەتی و 120 كەس شەیری كردووە، تیایدا ئامۆژگاریی ژنان دەكات مێخەك و كەرەوز تێكەڵ بكەن و ئاوی كوڵاوی بەسەردا بكەن، دوای پاڵاوتنی ئاوەكەی بخۆنەوە، ئەوەش وەك چارەسەر بۆ ئەوانەی ناچنە سوڕی مانگانەوە.
راستی هەواڵەكە:
دكتۆر بەناز جەلیل، پسپۆڕی نەخۆشییەكانی ژنان و منداڵبون و نەزۆكی، بە (كەركوك ناو)ی وت "ئەو گیراوەیەی باسكراوە هیچ سودێكی نییە بۆ رێكخستنەوەی سوڕی مانگانە، هیچ بەڵگەیەكی زانستی پزیشكی نییە راستی زانیارییەكانی ناو ڤیدیۆكە بیسەلمێنێت، تێكەڵكردنی كەرەوز و مێخەك بە ئاوی كوڵاو بۆ رێكخستنی سوڕی مانگانە، تەنیا قسەی سەر زاری خەڵك و سۆشیال میدیان و راست نین".
دكتۆر بەناز وتی "داوا لە كچان و ژنان دەكەم ئەگەر نەچونەتە سوڕی مانگانەوە لە وادەی خۆیاندا، یان سوڕی مانگانەیان وەستاوە، یان هەر گرفتێكی تریان هەیە، چارەسەری پزیشكی وەربگرن، ئەوەش بە سەردان و رێنمایی پزیشك و لەخۆیانەوە هیچ شتێك نەخۆن و بەكارنەهێنن كە لە سۆشیال میدیا و بازاڕ و هەر شوێنێكی تردا بەرچاویان دەكەوێت، چونكە هیچ بەڵگەیەكی زانستی نییە".
