ژمارەیەك لە چالاكوانانی بواری جینۆساید، بۆ یەكەمجار گۆڕستانێك لە ناوچەیەکی دورەدەستی كەركوك دەستنیشاندەكەن كە بەپێی بە دواداچونەكانیان لانیكەم هەزار روفاتی ئەنفالكراوانی بەشێوەی تاك تێدایە.
ئەو چالاكوانانە ئەمڕۆ شەممە 12ی نیسان لە كۆنگرەیەكی رۆژنامەوانیدا لە سەربازگەی تۆپزاوا لە كەركوك، بەرهەمی هەوڵی سێ مانگی بەدواداچونی خۆیان بۆ ئەو پرسە ئاشكراكرد و جەختیانكردەوە لەوەی "گۆڕستانەكە شوێنی روفاتی لانیكەم هەزار ئەنفالكراوی سەردەمی حزبی بەعسە".
هێمن حەسیب، نوسەر و چالاكوانی بواری جینۆساید، بە (كەركوك ناو)ی وت "لە سەربازگەی تۆپزاوا كە ناوەندی كۆكردنەوەی ئەنفالكراوانی هەموو ناوچە كوردییەكان بوو جگە لە ئەنفالی بادینان، رۆژانە لەم سەربازگەیە حاڵەتی مردنی تاك هەبووە، بە هۆكاری نەخۆشی، یان برسێتی و ئەشكەنجەدان، رۆژانە دووان و سیان مردون و ئیدارەی سەربازگەی تۆپزاواش مردووەكانیان رەوانەی پزیشكی دادوەری كەركوك دەكرد، تا وایلێهاتووە ژمارەكان زۆر زۆر بون و لە توانای پزیشكی دادوەریدا نەبووە لە خۆیان بگرێت".
ئەو چیرۆكەی هێمن حەسیب پشتبەستووە بە نوسراوێكی پزیشكی دادوەری كەركوك كە لە ئابی 1988 داوا لە پارێزگاری ئەوكاتی كەركوك و فەرمانگەی تەندروستی دەكات كە بەفرگرەكانیان چیتر توانای هەڵگرتنی روفاتی خێزانە كوردەكانیان نەماوە و شوێنیان نییە و داوای چارەسەر دەكات.
هێمن وتی "پارێزگاری ئەوكاتی كەركوك لە هەمان مانگدا داوا لە شارەوانی دەكات بیاننێژێت"، هێمن كە خۆی یاساناسە جەختدەكاتەوە لەوەی "بەپێی یاسا شارەوانی تەنیا دەتوانێت ئەو كەسانە بنێژێت كە ناسنامەیان دیار نییە، یان نەناسراونەتەوە، بەڵام ئەنفالكراوان ناسنامە و شوێن و تەمەنیان دیارە، بۆیە ئەو كارە زۆر نامرۆڤانە بووە و ئامانج لێی شاردنەوەی تاوانەكە بووە".
دوابەدوای نوسراوەكەی پارێزگار، شارەوانی لە گۆڕستانی تایبەت بە خۆیان روفاتەكانی ناشتووە، بەگشتی گۆڕستانەكە كە لە ساڵی 1994ەوە شارەوانی چیتر بەكارینەهێناوە و بەپێی بەدواداچونی چالاكوانانی بوار جینۆساید لە نێوان 1000 بۆ 1500 گۆڕی تیایە. هێمن جەختیكردەوە "بەپێی بەدواداچونی ئێمە لەسەدا 80ی گۆڕەكان گۆڕی ئەنفالكراوانن".
گۆڕستانەكە نزیكە لە سەربازگەی تۆپزاوا، هاوكات بەدوری كیلۆمەترێك دەكەوێتە نزیك ماڵی عەلی حەسەن مەجید، گەورە بەرپرسی حزبی بەعس و ئامۆزای سەدام حسێن، سەرۆك كۆماری پێشوی عیراق، لە پشت ناوچەی پیشەسازی كۆنی كەركوك.
گۆڕستانەكە بەگشتی 100 دۆنم زەوی دەبێت، بەپێی بەدواداچونی ئەو چالاكوانانە، كە لەگەڵ خەڵكی دەوروبەری گۆڕستانەكە قسەیان كردووە، تا ساڵی 1987 كەمتر لە 50 گۆڕی لێ بووە، ئەوەش بەلای چالاكوانەكانەوە بەڵگەیەكی ترە كە گۆڕەكان هی ئەنفالكراوانن و لەوێ نێژراون.
هێمن وتی "ئەو گۆڕانە هەموی هی ئەنفال نین، بەڵكو بەشێكیان كەیسی سیاسین، بەڵام ئەوەی دەیزانین تا ساڵی 1993 بۆ 1994 شارەوانی بەكاریهێناوە... هەموو گۆڕەکان بەبێ کێلن و بە ئەستەم دیارە کە گۆڕن... لەئەمڕۆوە كە زانیارییەكانمان راگەیاندووە، دەستدەكەین بە گفتوگۆ لەگەڵ شارەوانی و پزیشكی دادوەری و فەرمانگەی هەڵدانەوەی گۆڕە بە كۆمەڵەكان".
تاوانی ئەنفال لەلایەن رژێمی بەعس بە سەرۆكایەتی سەدام حسێن، لە ساڵی 1988 دژ بە دانیشتوانی ناوچە جیاوازەكانی هەرێمی كوردستان و پارێزگای كەركوك ئەنجامدرا، بەپێی ئامارەكانی حكومەتی هەرێم 182 هەزار كورد لەلایەن ئەو رژێمەوە لە شوێنی خۆیان گوازرانەوە و بە كۆمەڵ لەبیابانەكانی رۆژئاوای عیراق زیندەبەچاڵكران، هەر بەو هۆیەوە حكومەتی هەرێم 14ی نیسانی وەكو رۆژی یادكردنەوەی ئەنفال دیاریكردووە.
سەربازگەی تۆپزاوە لە ساڵی 1981ـدا دروستكراوە و كراوەتە بنكەی جەیش ئەلشەعبی، لە ساڵی 1987 گوندی تۆپزاوا تەختكرا و خەڵكەكەی بە زۆر راگوێزراون بو سنوری پارێزگای هەولێر، بەپێی گێڕانەوەی شایەتحاڵ و بەڵگەنامەكان؛ هەزاران هاوڵاتی كورد لەو سەربازگەیەدا زیندانیكراون پێش ئەوەی بەرەو بیابانەكانی سەماوە و زیندانی نوگرە سەلمان بگوازرێنەوە و كۆمەڵكوژ بكرێن.
