لە تۆڕە كۆمەڵایەتییەكان رێكلام بۆ جۆرێكی كرێم دەكرێت گوایا كۆئەندامی زاوزێی پیاوان گەورە و ئەستور دەكات، لە پۆستێكی تۆڕی كۆمەڵایەتی ئینستگرام نوسراوە "زەكەری پیاو لە نێوان 4 بۆ 7 سانتیم درێژدەكات".
راستی هەواڵەكە
دکتۆر هیوا چۆمانی، پسپۆڕی نەشتەرگەریی گورچیلە و میزو میزەڕۆ و پڕۆستات و نەزۆکی پیاوان و لاوازی سێکسی، بە (كەركوك ناو)ی وت "رۆژانە دەیان رێكلامی لەو جۆرە لە تۆڕە كۆمەڵایەتییەكان بڵاودەبێتەوە و ئەو پرسیارانەش بەردەوام روبەڕوی ئێمە دەبێتەوە، راستییەكەی ئەوەیە ئەو رێكلامانە هیچ بنەمایەكی زاتسییان نییە و تەنیا بازرگانین و بۆ هەڵخەڵەتاندنی خەڵكە".
هیوا چۆمانی زیاتر وتی "هیچ دەرمانێک لە هیچ گژوگیا و روەکێک لە هیچ ناوەندێکی زانستی و پزیشکی نەسەلمێنراوە كە دەبێتەهۆی درێژکردن و ئەستورکردنی کۆئەندامی زاوزێی پیاوان... بەڵكو هەندێك بەناوی دکتۆر و پسپۆڕی كۆئەندامی زاوزێوە ئەو بازرگانییە دەكەن، پێویستە لێپێچینەوەیان لەگەڵدا بكرێت".
داواشی لە هاوڵاتیان كرد بەهیچ شێوەیەك پەنا بۆ ئەو جۆرە كرێمانە نەبەن و بنەمای زانستییان نییە.
