ئاواتم بوو خوێندن تەواو بكەم و ببم بە ئەفسەر لە سوپادا
ئاواتم بوو خوێندن تەواو بكەم و ببم بە ئەفسەر لە سوپادا
مەروە كاكەیی زۆر بە گەرموگوڕییەوە باسی پرۆژەكە دەكات؛ هیچ كاتێك بیر لە شكست ناكاتەوە و پێیوایە سەركەوتنیان مسۆگەرە، چونكە تەنیا نییە و 34 خانمە جوتیاری دیكەی لەگەڵدایە.
ئەو پرۆژەیە بۆ كشتوكاڵە لە خانوی پلاستیكیدا؛ ئەوەش ئەزمونێكی نوێیە بۆ كاری جوتیاری لە گوندی مەجیدییەی دەشتی نەینەوا، كە كچان و ژنان لە چوارچێوەی كۆمەڵەیەكدا سەرپەرشتی دەكەن.
"ئەمە یەكێك بوو لە خەونەكانم و هاتەدی، هەمیشە دەمویست سەركردایەتی كۆمەڵەیەكی وابكەم بۆ هاریكاری ژنانی گوندەكەم، ئێستا كۆمەڵەكەی من 34 كچ و ژنە جوتیاری تێدایە، هەموان وەك یەك تیم كاردەكەین" مەروە ئەحمەد كاكەیی (24 ساڵ) وای وت.
كچان و ژنانی ئەو كۆمەڵەیە خەڵكی هەمان گوندن؛ لە تەمەنی مەروە بچوكتر تا تەمەنی 35 ساڵانی تیادایە، هەمویان كاری كشتوكاڵی دەكەن و شارەزان.
"كارەكانمان خەریكە سەرپێ دەكەون، خانووە پلاستیكییەكان دانراون، كەرەستەی پێویست بۆ چاندن وەرگیراون و ئیتر كاتی ئەوەیە دەستپێبكەین"، مەروە بە (كەركوك ناو)ـی وت "ئێستا تاقیكردنەوەیەكە بۆ سەركەوتنی پرۆژەكە، بەردەوامی و فراوانكردنی ئەو پرۆژەیەش كەوتۆتە سەر ئێمە، بۆیە لەم قۆناغەدا ئەركەكەمان قورسە".
ئەو پرۆژەیە و دامەزراندنی كۆمەڵەكەی مەروە كاكەیی لە یەككاتدا بون؛ ئەوەش كاتێك رێكخراوی فریاكەوتنی میللی (PAO) –رێكخراوێكی ناحكومییە- دوو ساڵ لەمەوبەر دەچێتە گوندەكانی دەشتی نەینەوا، لەوێ بیرۆكەكە دەبیستن و بڕیاردەدەن هاوكارییان بكەن.
مەروە دەڵێت ئەو رێكخراوە خولی راهێنانیان بۆ جوتیارانی گوندەكە هەبووە، دوای پێشكەشكردنی بیرۆكەكانی، یەكەم هەنگاوی پێكهێنانی كۆمەڵەی ژنانی جوتیار و ئەو پرۆژە كشتوكاڵییەش هەر لەوێ بووە.
گوندی مەجیدییە لە قەزای حەمدانییەیە (باشوری خۆرهەڵاتی موسڵ)؛ ژمارەی دانیشتوانی زیاتر لە هەزار و 200 كەسن، هەمویان كاكەیین، كاری سەرەكییان كشتوكاڵە و بە بەرهەمهێنانی تەماتە، خەیار، بامیە و دانەوێڵە بەناوبانگن.
"كراوەیی خەڵكی گوندەكە هۆكار بوو بۆ دروستكردنی كۆمەڵەی ژنانی جوتیار و هاوكاری ئەو رێكخراوە لە كاری كشتوكاڵیدا" مەروە وادەڵێت.
هەمیشە دەمویست سەركردایەتی كۆمەڵەیەكی وابكەم بۆ هاریكاری ژنانی گوندەكەم
كاكەییەكانی دەشتی نەینەوا هێشتا سەرقاڵی بەگەڕخستنەوەی كەرتی كشتوكاڵیین، بەهۆی ئەو زیانانەی لە هێرشەكانی حوزەیرانی 2014ـی "دەوڵەتی ئیسلامی لە عیراق و شام - داعش" و ئۆپەراسیۆنە سەربازییەكاندا بەر گوندەكانیان كەوت، ئەوانیش وەك كه‌مینه‌كانی تر روبه‌ڕوی پێشێلكاریی و راوه‌دونان بونه‌وه، بەپێی ئامارەكانی قایمقامیەتی حەمدانییە بۆ (كەركوك ناو) هێشتا سەدا 10ـیان ئاوارەن.
خێزانەكەی مەروە ئەوكات دەچنە هەولێر، بەڵام ماوەیەكی كەم دەمێننەوە و دەگەڕێنەوە بۆ گوندی زەنگەل لە حەمدانییە، كە تاكە گوندی كاكەییە داعش دەستی پێیناگات و حەوت كیلۆمەتر لە گوندی مەجیدییەوە دورە، تا كۆنتڕۆڵكردنەوەی تەواوی ناوچەكە لە تەمموزی 2017ـدا لەوێ دەبن و پاشان دەچنەوە بۆ مەجیدییە.
"دەستمانكردەوە بە كاری كشتوكاڵی؛ ئەو كارانە بۆ كچان و ژنانی گوند نامۆ نین، ئەوانیش هاوشانی پیاوان كاردەكەن، وەك چۆن تەواوی خێزانەكەی من سەرقاڵی كشتوكاڵ بون" مەروە وای وت.
رێكخراوی (PAO) بۆ هاندانی زیاتری كاری كشتوكاڵی و نەهێشتنی زیانەكانی شەڕ لە گوندەكانی كاكەیی، قەرزی بچوك بە جوتیاران دەدات و كەرەستەیان بۆ دابیندەكات، خولی راهێنانیان لەبارەی شێوازی نوێی كشتوكاڵییەوە بۆ دەكاتەوە، تا لە ناوچەكانی خۆیاندا بمێننەوە و بەردەوامبن.
"پێش ئەو خولەش كاری چاندمان كردبوو، بۆیە بابەتەكە بۆ ئێمە زەحمەت نەبوو، بەڵام ئەوان زیاتر وردەكاری چۆنییەتی چاندنیان لەناو خانوی پلاستیكیدا فێركردین" مەروە دەڵێت خولەكان هاوكاربون تا خەڵكی دیكە بناسن، ئەزمونی زیاتر ببینن و لەگەڵ لێپرسراوانی كشتوكاڵی لە موسڵ و حەمدانییە و ناوچەكانی تر پەیوەندییان هەبێت.
ئەو تائێستا شەش خولی راهێنانی بینیووە؛ هەمویان لە بارەی خانوی پلاستیكییەوە بون و دوای هەر خولێكیش دەگەڕێتەوە بۆ گوند، تا ئەو زانیارییانەی وەریگرتووە بە كچان و ژنانی دیكەی كۆمەڵەكەی بگەیەنێت.
مەروە بچوكترین كچی خێزانەكەیەتی؛ دوو خوشكی گەورەتری هەیە لەگەڵ پێنج برا، تازە هاوسەرگیری كردووە و هێشتا منداڵی نییە، بۆیە زۆرینەی كاتەكانی بۆ كشتوكاڵ تەرخانكردووە.
"بە ناچاری لە پۆلی دوی ناوەندی وازم لە خوێندن هێنا، چونكە قوتابخانەی ناوەندی و ئامادەیی لە گوندێكی تر بوو، رێگایەكی حەوت كیلۆمەتری زەحمەت بوو هەموو رۆژێك بەپێ بڕۆم، بە سەرما و گەرما، لەكاتێكدا هیچ ئۆتۆمبێلێكیش نەبوو، هەر ئۆتۆمبێلێكیش بەو رێگایەدا تێدەپەڕی كوڕان دەیانتوانی سەربكەون و بۆ كچان قورس بوو بە تەنیا لەگەڵ خەڵكی نەناسراو هاتوچۆ بكەن".
مەروە وتی "ئاواتم بوو خوێندن تەواو بكەم و ببم بە ئەفسەر لە سوپادا، حەزدەكەم ببم بە ئەفسەر".
دوای وازهێنانی لە خوێندن؛ مەروە كاكەیی دەبێتە جوتیار و لەوكاتەوە دانەبڕاوە، وەك خەڵكی گوندی مەجیدییە، كە لە وەرزی چاندندا كاتژمێر 4ـی بەیانی لە خەو هەڵدەستن و دەستبەكاركردن دەكەن، بە تایبەت ئاودانی بامیە، بەڵام كەمتر رویان لە بەخێوكردنی ئاژەڵە، هەر بەشی دابینكردنی پێداویستی رۆژانە لە شیرەمەنی، مەڕو ماڵاتیان هەیە.
كاری كشتوكاڵی بۆ كچان و ژنانی گوند نامۆ نییە
"ئەم مانگە (شوبات) لە خانوە پلاستیكییەكاندا و وەك دەستپێكی پرۆژەكە دەست بە چاندنی خەیار و پەتاتە دەكەین".
رێكخراوی (PAO) بە دیاری 20 خانوی پلاستیكی بە ژنانی جوتیاری گوندی مەجیدییە دەبەخشێت، بە سێ ژنە جوتیار لە خانویەكی پلاستیكدایە كاردەكەن؛ درێژی هەر خانویەكی پلاستیكی 55 مەتر و پانییەكەی 12 مەترە، روبەری هەر یەكێكیان 660 مەتر دوجایە و بە هەمویان زیاتر لە پێنج دۆنم زەوییان بۆ تەرخانكراوە.
مەروە دەڵێت چەندین رێكخراوی دیكە لە مەجدییە و گوندەكانی تری دەشتی نەینەوا لە بوارە جیاوازەكاندا هاوكاری خەڵك دەكەن.
له ده‌شتی نه‌ینه‌وا، كاكه‌ییه‌كان ده‌كه‌ونه قه‌ره‌قوش-ـی سه‌نته‌ری قه‌زای حه‌مدانییه و گونده‌كانی مەجیدییە، زه‌نگڵ، توله‌به‌ند، وه‌رده‌ك، گه‌زه‌كان و كه‌به‌رلی.
كۆمەڵەكەی مەروە پلانی فراوانبونیان هەیە؛ دوای سەركەوتنی یەكەم پرۆژە، هەوڵدەدەن كاری زیاتر بكەن و ژنانی دیكەش لە خۆبگرن و خانوی پلاستیكیان بۆ دابینبكرێت، كە وەك ئەو دەڵێت ژمارەی هەمویان دەگاتە زیاتر لە 150 ژنە جوتیار، لەوەش زیاتر دەیانەوێت ئەو ئەزمونە ببنە گوندەكانی دیكە.
"ئامانجی من ئەوەیە خزمەت بكەم و پرۆژەكە سەربكەوێت، دوای ئەوەش بیر لەوەدەكەمەوە بەدوای خەونەكانی دیكەمدا بچم و خوێندن تەواو بكەم" مەروە كاكەیی وای وت.
فەرمان سادق
