دگەل نێزیکبوونا ڤایرۆسێ کۆڕۆنا لسەر هەرێما کوردستانێ، تڕس ژ ئەوی ڤایرۆسی زێدەتر خەلك ئاڵۆزکر، ئەڤێ چەندێ ژی زێدەتر ئەرکێ ڕۆژنامەڤانان ب زەحمەتر لێکربوو، پێدڤیبوو زێدەتر چاڤ ڤەکری بن و زانیاریێن ڕاست دروست بڤەگۆهێزن .

سڵاڤ و ڕێز، ئەز ئۆمێد حاجی بەڕۆشکی، بۆ ماوێ چار ساڵانە کارێ ڕۆژنامەڤانیێ ل پارێزگەها دهۆکێ دکەم، و ل چەندین دەزگەهان من پێشکێشکاری، پەیامنێری و نووچەسازی کریە، دئەڤێ چیڕۆکێ دا، دێ بەحس ل پێشلکاریێن ل بەرامبەر من هاتینە کرن، لدور بابەتەکێ ڕۆژنامەڤانی کەم .

ل ڕێککەفتی 19ێ ئازارا 2020ێ، ژلایێ چەند کەسێن باوەرپێکری ڤە، زانیاری گەهشتنە من کو پەڕلەمانتارەکێ کوردستانێ لسەر لیستا پارتی دیموکراتی کوردستان، ب ناڤێ ( مەڵا ئیحسان ڕێکانی )، ژ دەرڤەی وەڵاتی هاتیە کوردستانێ، و بێ کو بهێتە پشکنینکرن و کەرەنتینەکرن، ژ فڕۆکخانا هەولێرێ دەڕبازی باژێڕێ دهۆکێ بوویە، هەر چەندە لدویڤ ڕێنمایێن وەزارەتا تەندروستی و ناڤخۆ، پێدڤیبوو هەر کەسەکێ ژ دەرڤەی وەڵاتی بهێت، بۆ ماوێ 14 ڕۆژان بهێتە کەرەنتینە کرن .

وەك هەستکرن ب بەرپرسیارەتیێ بەرامبەر باژێڕێ خۆ کو ئەڤ نەخۆشیە لێ بەڵاڤ نەبیت، کو ل وی دەمی بتنێ ئێك حالەتێ کۆڕۆنا ل پارێزگەها دهۆکێ هاتبوو تۆمارکرن ( ئەو حالەت ژی بەرپرسەك بوو ب هەمان شێوە ب نەیاسایی دەڕبازی ناڤ باژێڕی ببوو )، لەوا ژی وەك ئەرکەکێ ڕۆژنامەڤانی و مرۆڤایەتی من دەست ب دۆیڤچوونێ کر، هەر چەندە من نەدخاست ئەو بابەتە ڕاست بیت، بەلێ ب مخابنی ڤە ئەو زانیاری هاتنە دۆپاتکرن کو بەلێ ڕاستە، و ژلایێ چەندین ژێدەرێن باوەرپێکری هەم بەڵگە و هەم زانیاری لدور بابەتی دانە من .

ئەڤ بابەتە من دهەژمارا خۆ یا تایبەتا فەسیبۆکی دا بەڵاڤکر، هەر زۆی کارڤەدانێن هاوڵاتیان لدۆیڤ خۆدا ئینان و بابەت ب شێوەکێ بەرچاڤ ل توڕێن کۆمەڵایەتی دەنگڤەدا و بەڵاڤبوو، پشتی بوورینا نێزیکی دەمژمێرەکێ، پەڕلەمانتارێ ناڤبری، پەیوەندی بمن کر و بێ هیچ بەڵگەیەکی بدەتە دەستێ من، ڕەتکر کو بابەتەکێ بڤی شێوەی هەبیت و گەلەك داخازکر کو ئەز بابەتی ڕەشکەم، بەلێ ئەز لسەر بابەتێ خۆ پشت ڕاستبووم، لەوا ژی من بابەتێ خۆ ڕەشنەکر و من پێداگیری لسەر کر، پاشان کەسەکێ دی بناڤێ ( محەمەد ئیحسان ڕێکانی ) کۆڕێ پەرلەمانتارێ ناڤبری، پەیوەندی بمن کر، وی ژی بهەمان شێوە گەلەك داخازکر کو بابەتێ من بهێتە ڕەشکرن، بەلێ دوبارە من پێداگیری لسەر بابەتێ خۆ کر .

"ئەوی پەڕلەمانتاری گەف لمن کرن، کو دێ چەند کەسەکان هنێریتە سەر ماڵا من و لمن دەن"

پشتی کو بێ هیڤی بووین ئەز بابەتی ڕەشبکەم، ب ڕێکێن عەشائیری و دوستان هەوڵێن خۆ دان، بەلێ من هەر بابەت ڕەشنەکر، بۆ دوماهی جار ئەوی پەڕلەمانتاری ب ڕێکا نیاسەکێ من ( گەف ) لمن کرن، کو دێ چەند کەسەکان هنێریتە سەر ماڵا من بۆ لێدان لمن، پاشان ژی کۆڕێ وی ب تەلەفونێ گەف لمن کرن، کو دێ من دەستەسەرکەن، پاشان ژی کۆڕێ وی ب ڕێکا هەژمارا خۆ یا فەیسبۆکی ناڤزراندن ب کەسایەتیا من کر .

ڕۆژا دوویڤ دا، نێزیکی دەمێ نیڤرۆ، هێزەکا پۆلیسان لسەر ماڵا من دا گرت، بێ هیچ ئاگەهدارکرنەك و بێ هیچ بڕیارەکا دادگەهێ، ئەز دەستەسەرکرم و بۆ چاکسازیا مەزنان ل دهۆکێ ( زیندانا زڕکا ) هاتمە برن، بێ کو هیچ دانپێدانەك ژمن بهێتە وەرگرتن، هەر چەندە من ژی گەلەك داخازکر، کو من ژی سکاڵا هەنە، لسەر ئەوی پەڕلەمانتاری و لسەر کۆڕێ وی چونکە گەف و ناڤزراندنا من کریە، بەلێ ڕێك نەدا ئەز سکاڵایێن خۆ بکەم .

شەش ڕۆژان دزیندانێ دا مام کو من هەموو ڕۆژێن نەورۆزێ و سەرساڵا کوردی ژپێناڤ وەڵاتێ خۆ دزیندانێ دا بووراندن !

دڕۆژێن نەورۆزێ دا ل زیندانێ، من هزرا ئەوێ خەباتا باب و باپیران دکر، کو لسەر دەمێ ڕژێما بەعس، ژ ئەگەرێ هەلکرنا ئاگرێ نەورۆزێ یان ساخکرنا ئەوێ هەلکەفتێ، یان ژبەر کوردبوونێ، بێ گونەهـ دهاتنە زیندانکرن و ئێشاندن، نها ژی ب هەمان شێوە بسەرێ من دهێت بەلێ نە لسەر دەستێن ڕژێما بەعس بەلکو لسەر دەستێ دەستهەڵاتا کوردی ! ئەڤە ژی شەرمزاریە بۆ ڤێ دەستهەڵاتێ .

"ئەز بێ هیچ سکاڵایەك هاتمە دەستەسەرکرن"

هەر چەندە وەکو ئەوێ هێزا پۆلیسان گوتی، سکاڵا لدور ئەڤی بابەتی لسەر من هاتیە تۆمارکرن، بەلێ پشتی ئازادکرنا من، و دۆیڤچوونا من و گڕۆپێ پارێزەرێن خۆبەخش ل دهۆکێ، دیاربوو کو هیچ سکاڵایەك نەهاتیە تۆمارکرن، بتنێ ئەڤە دەستەسەرکرنەکا نەیاسایی بوو و ب ڕێکا تەلەفونەکا ئەوی پەڕلەمانتاری بوویە .

ئەو ماددێ یاسایی کو ئەز لسەر هاتیمە گرتن هەر چەندە پێدڤی بوو کۆڕێ ئەوی پەڕلەمانتاری لسەر ئەوی ماددەی هاتبایە گرتن، بەلێ هەر چاوابیت ئەو ماددە ب تەمامی ڕێکە پێدایە ئەو کەسێ لسەر هاتیە گرتن پشتی دوو ڕۆژان ب کەفالەت بهێتە ئازادکرن، بەلێ ب مخابنی ڤە لژێر فشار و کاریگەریا ئەوی پەڕلەمانتاری دادگەهێ و دادوەری بڕیارا ب کەفالەت ئازادکرنا من گەلەك گیرووکر .

دهەر شەش ڕۆژێن زیندانێ دا، ب ڕێکا زێرەڤانێن زیندانێ داخازیا ئەوی پەڕلەمانتاری دگەهشتە من، کو ئەگەر ( ئەز بابەتێ خۆ ڕەشبکەم و داخازا لێبورینێ بکەم ) دماوێ بتنێ دەمژمێرەکێ دا دێ هێمە ئازادکرن، بەلێ من ئازادکرنەکا ب وی شێوەی ڕەتکر، و ل وی دەمی و تا نها ژی لسەر بابەتێ خۆ پێداگیرم .

ئەز نزانم یاسا لڤی وەڵاتی ب چ شێوە کەتیە دەستێن ئەڤان بەرپرس و پەڕلەمانتارێن دەستهەڵاتێ دا کو ب چ شێوە ڤیا دێ وەسا یاسایێ بۆ مەرەمێن خۆ یێن کەسوکی بکارئینن !

ل ڕێککەفتی 26ێ ئازارا 2020ێ،ئەز ژ زیندانێ هاتمە ئازادکرن، بێ کو ڕەگەزناما من بمن بهێتە دان، و تا نها ژی ل لایێ وایە، و ژ وێ ڕۆژێ وەرە تا نها من دانپێدانێن خۆ نەداینە هەر چەندە زێدەتر ژ 3ێ مەهان دەڕبازبووینە، ئەڤە ژی پێچەوانەی یاسایێ یە، بەلێ یا ڕوون و ئاشکرابوو کو هیچ سکاڵایەك نەبوو، بتنێ دەستەسەرکرنا ڕۆژنامەڤانەکی بوو ب تەلەفونا پەڕلەمانتارەکی!