لەیلا ئەحمەد - كەلار

دوو به‌دواداچونی ماڵپەڕی (كەركوك ناو)، دەبنە‌ خاوەنی خەڵاتی یەكەم لە نێو چەندین بابەتی تری رۆژنامەوانیدا، ئەوەش لە پێشبڕكێیەكی رادیۆی دەنگ بۆ باشترین راپۆرتەكانی پەیوەست بە مافەكانی مرۆڤ.

پێشبڕكێیەكە تایبەت بوو بە باشترین راپۆرتە رۆژنامەوانییەكانی پەیوەست بە مافەكانی مرۆڤ لە ساڵی 2021ـدا، دوای هەڵسەنگاندنی دەیان بابەتی پێشكەشكراو لەلایەن رۆژنامەنوسانەوە، دوانیوەڕۆی ئەمڕۆ هەینی 10ـی كانونی یه‌كه‌م لە مەراسیمێكدا لە قەزای كەلار؛ براوەكانی یەكەم، دووەم ‌و سێیەم خەڵاتكران.

مەراسیمەكە سێ بڕگە بوو؛ لە بەشی یەكەمدا پانێڵ لەسەر مافەكانی مرۆڤ بەڕێوەچوو، دواتر چالاكییەكی هونەری و پاشان ناوی براوەكانی پێشبڕكێیەكە ئاشكراكران.

ڤیدیۆ: ئازاد عوسمان، بەڕێوەبەری رادیۆی دەنگ ناوی براوەكانی پێشبڕكێی رۆژنامەوانی مافەكانی مرۆڤ ئاشكرادەكات

ئازاد عوسمان، بەڕێوەبەری رادیۆی دەنگ كە سەرپەرشتی پێشبڕكێیەكە دەكەن وتی لەبەر ئەوەی دوو بەدواداچون لەكاتی هەڵسەنگاندا وەك یەك خاڵیان بەدەستهێناوە، ناچاربون خەڵاتی یەكەم بە هاوبەشی بە دوو كەس بدەن.

بەپێی دەرەنجامی ئەو پێشبڕكێیە، دوو بەدواداچونی (كەركوك ناو)، بە هاوبەشی خەڵاتی یەكەمیان بەدەستهێنا.

به‌دواداچونی یەكەم بە ناونیشانی (تۆماس لە دۆزەخی داعش دەگەڕێتەوە... بە نۆ ساڵی دەیڕفێنن، چەکداری دەکەن و لە تەنگانەدا پشتی تێدەکەن) لە ئامادەكردنی كاروان حاجی.

ئەو بەدواداچونە، مامەڵەی توندوتیژی و پێشێلكارییەكانی داعش دژ بە مافەكانی مرۆڤ دەگێڕێتەوە لەڕێگەی چیرۆكی تۆماس_ـەوە، ئەو منداڵە ئێزیدییەی دوای رفاندنی فێری بەكارهێنانی چەك دەكرێت، بێ ئیرادەی خۆی وەك قەڵغان رەوانەی بەرەكانی شەڕ دەكرێت و دواتر بە برینداری جێیدەهڵێن، تا دەگاتەوە ناو خێزانەكەیی و جارێكیتر دیكە تێكەڵ بە كۆمەڵگەی ئێزیدی و ژیانی ئاسایی دەكرێتەوە.

بەدواداچونەكەی دیكەی (كەركوك ناو) بە ناونیشانی (یاسای ژمارە 21؛ مۆتەكەی سەر ئازادی رۆژنامەوانی... دژی کورد بەکاردەهات و ئێستا کورد دژی خۆی پیادەی دەکات) لە ئامادەكردنی فەرمان سادق بوو.

ئەو بابەتە باس لە دۆسیەی دەستگیركردنی زیاتر لە 50 چالاكوان، رۆژنامەنوس، مامۆستا و کەسی دیكە لەلایەن حكومەتی هەرێمی كوردستانەوە دەكات بەپێی یاسای ژمارە 21ی ساڵی  2003، كە ئەوەش هەمان ئەو ماددەیە یاساییەیە، بەر لە 2003، بە گۆڕانكارییەكی كەمەوە سەدام حسێن، وەك سەرۆكی ئەنجومەنی سەركردایەتی شۆڕش بەسەر پێشمەرگە و ئۆپۆزسیۆنی رژێمەكەیدا جێبەجێیدەکرد.

بەدواداچونەكە چیرۆكی سەختییەكانی ماڵی شێروان تەها، یەكێك لە دەستگیركراوان دەگێڕێتەوە بەهۆی لێكەوتەكانی یاسای ژمارە 21ـەوە و ئەو نەهامەتییانەی روبەڕوی هاوسەر و منداڵەكانی بۆتەوە.

خەڵاتی دوەمی پێشبڕكێیەكە، بۆ غەمگین محەمەد بوو بە راپۆرتی (دۆسیە هەستیارەكە؛ چیرۆكی دەستدرێژیی سێكسی بۆ سەر منداڵان لە هەرێمی كوردستان) لە ماڵپەڕی پەرەگراف.

هەر لەو پێشبڕكێیەدا خەڵاتی سێیەم بە شەهێن وەهاب بەخشرا بۆ راپۆرتێك لەسەر ژیانی خێزانێكی كەمدەرامەت لە تۆڕی میدیایی ئێستا.

پێشبڕكێی رۆژنامەوانی مافەكانی مرۆڤ‌ شەش ساڵە بەردەوامە و له‌مساڵدا، 25 رۆژنامەنوس له‌ میدیا جیاوازه‌كانه‌وه‌ بە 25 بابەتی رۆژنامه‌وانی نوسین و ڤیدیۆیی و مەڵتی میدیا به‌شداربون، كە چواریان لە (كەركوك ناو)ەوە بوو، له‌رێی لیژنه‌یه‌كی سێ كه‌سییه‌وه‌ هه‌ڵسه‌نگاندن بۆ راپۆرته‌كانیان كرا و براوەكان دیاریكران.

لەنێو رۆژنامەنوسە بەشداربوەكاندا نۆ خانم هەبون و لە كۆی بابەتە پێشكەشكراوەكانیش 10یان راپۆرتی نوسراو، 13ـیان راپۆرتی ڤیدیۆیی و دوو بابەتیان مەڵتی میدیا بووە.

بەڕێوەبەری رادیۆی دەنگ بە (كەركوك ناو)ـی وت "ساڵانە ژمارەیەكی زۆر لە رۆژنامەنوسان بەشداری پێشبڕكێكە دەكەن، ئەمەش دەرخەری ئەوەیە گرنگیپێدانی زۆری رۆژنامەنوسان بۆ بابەتی مافەكانی مرۆڤ زیادیكردووە و ئاماژەیەكی دڵخۆشكەرە، هیوادارین ڕۆڵیشی هەبێت كە بابەتی ڕۆژنامەوانی مافەكانی مرۆڤ ببێتە بابەتێكی جددی".

پیشبڕكێیەكە لەلایەن رادیۆی دەنگ ـ رادیۆیەكی سەربەخۆیە لە شاری كەلارـ بە پاڵپشتی سندوقی نیشتیمانی بۆ پاڵپشتی دیموكراسیی NED رێكخرابوو، كە دامەزراوەیەكی قازانج نەویستە و ساڵی  1983 دامەزراوە، ئامانجی سەرەكی گەشەپێدانی دیموكراسییە لە سەرتاسەری جیهاندا.

پێشتریش راپۆرت و بەدواداچونەكانی پەیامنێرانی (كەركوك ناو) بۆ ساڵانی 2017، 2019 و 2020 توانیویانە ببنە براوەی خەڵاتەكانی یەكەم تا سێیەم، له‌ هه‌مان پێشبڕكێی باشترین راپۆرتەكانی پەیوەست بە مافەكانی مرۆڤ.

ڤیدیۆ: بەخشینی خەڵاتی یەكەمی پێشبڕكێی رۆژنامەوانی مافەكانی مرۆڤ بە فەرمان سادق و كاروان حاجی لە (كەركوك ناو)

 ماڵپەڕی (كەركوك ناو)، لە ساڵی رابردوشدا توانی خەڵاتی باشترین راگەیاندنی گەشەکردوو بەدەستبهێنێت، لە پێشبڕكێیەكی رێكخراوی ئینتەرنیوز-ـی نێودەوڵەتی بۆ ئەو دەزگا راگەیاندنانەی عیراق، كە بایەخیان بە روماڵی پرسەکانی ژن و پرسە جێندەرییەکانی کۆمەڵگە داوە.

(كەركوك ناو) ماڵپەڕێكی ئەلكترۆنیی هەواڵییە، بایەخ بە بڵاوكردنەوەی ئەو رووداو و بابەتانە دەدات كە لە سنووری جوگرافیی "ناوچەی جێناكۆك"دا ڕوودەدەن، یان پەیوەندییان بەو سنورە جوگرافییەوە هەیە، ئەمەش بە ئاڕاستەی پێكەوەژیانی ئاشتییانە لەم سنورەدا و ئاسانی دەستڕاگەیشتن بە زانیاریی.

لە نیسانی 2011دا ماڵپەڕی (كەركوك ناو) دامەزراوە، بابەتەكانی بە چوار زمانی عەرەبی، كوردی، توركمانی‌ و ئینگلیزی بڵاودەكاتەوە.