سەنتەری میترۆ بۆ داكۆكی لە رۆژنامەنووسان لەسەر دانانی مەرج و كەفالەت لە ئازادكردنی هەڵسورێنەرانی خۆپیشاندانەكانی سلێمانی رەخنەی هەیە و جەختدەكاتەوە "رێكخستن و بەشداریكردن لە خۆپیشاندان تاوان نییە".
ئەو رەخنەیەی میترۆ، دوای ئەوە هات كە هێزە ئەمنییەكانی سلێمانی هەڵمەتێكی دەستگیركردنی ژمارەیەك لە هەڵسوڕاوانی خۆپیشاندانەكانی سلێمانیان دەستپێكرد، كە تیایدا داوای خزمەتگوزاری بۆ بەشە ناوخۆییەكان و دەرماڵە و خزمەتگوزاری سەرەتایی تریان دەكرد.
لە ڕاگەیەنراوێكدا كە میترۆ ئاراستەی لایەنە پەیوەندیدارەكانی كردووە و وێنەی دەست (كەركوك ناو)، كەوتووە باس لەوە كراوە پاش ناڕەزایی و داواكاری زۆر ئاسایشی سلێمانی دوێنێ ئێوارە هەڵسوڕێنەران و چالاكوانانی خۆپیشاندانەكانی زانكۆی سلێمانییان ئازاد كران، لە نێویشیاندا هاوكاری خۆبەخشی سەنتەری میترۆ (زەیدان تەها) كە خوێندكاری دوا قۆناغی كۆلێژی یاسای هەمان زانكۆیە.
"بەڵام ئەوەی جێگەی نیگەرانییە ئازادكردنەكە مەرجدارە بە وەرگرتنی كەفالەتی كەسێكی نزیك، لەگەڵ پڕكردنەوەی بەڵێننامەی دەستخەت كە جاری تر بەشداری خۆپیشاندان نەكەنەوە"ة لە راگەیەنراوەكەدا هاتووە.
سەنتەرەكە كە تایبەتە بە داكۆكی لە رۆژنامەنوسان ئەوە بیری هەموو لایەك دەهێنێتەوە كە بەشداریكردن لە خۆپیشاندانی ئاشتیانە مافێكی دەستەبەركراوی ڕەهایە لە جاڕنامەی گەردوونی مافەكانی مرۆڤ (1948)، هەروەها لە مادەی (38) لە دەستووری عێراقی بەركار (2005)، لەم سۆنگەیەشەوە ڕێكخستنی خۆپیشاندانی ناڕەزایی و بەشداری تێدا كردنی تاوان نییە و بەشێكە لە ئازادی ڕا دەربڕین.
هەروەها جەخت دەكاتەوە "هیچ كەس سەرپشك نییە و دەسەڵاتی ئەوەی نییە؛ ئەم مافە بە ترساندن و كەفالەت و بەڵێننامە كۆت و بەند بكات" هەروەها دەڵێت "خوازیارین بەزوویی كۆتایی بە سەرجەم ئەو ڕێوشوێنانە بهێنرێت كە دەبنە مایەی ترس و گوشاری دەروونی و هەست بە نائارامی كردن لەلایەن ئەو چالاك و هەڵسووڕاوانەی خۆپیشاندانەكان كە بەر هەڵمەتی گرتنەكە كەوتون".
هێزە ئەمنیەیكانی سلێمانی، لەوانەش ئاسایش لەچەند رۆژی خۆپیشاندانەكاندا ژمارەیەك خوێندكاریان دەستگیركرد و بە گازی فرمێسكڕێژ بڵاویان بە هەندێكی تر كرد.
بەگشتی خۆپیشاندانەكانی خوێندكاران كە دواتر چین و توێژەكانی تری كۆمەڵگەی گرتەوە، تیایدا دژی سیستمی حوکمڕانی لە هەرێمی کوردستان وەستانەوە و داوای دادگەریی و پێداچونەوەیان كرد بە کەموکوڕییەکانی حكومەت و ئیدارەدان.
