ژن و منداڵیان تێدایە
روفاتی 41 ئێزیدی لە كۆچۆ بەخاكدەسپێردرێن

نەینەوا/ 9ـی كانونی یەكەمی 2021/ كەسوكاری قوربانیانی ئێزیدی لەسەر گۆڕی ئازیزانیان لە گوندی كۆچۆی قەزای شنگال فۆتۆ: راگەیاندنی نوسینگەی بابەشێخ

عەمار عەزیز – نەینەوا

روفاتی 41 قوربانی ئێزیدی لە بەغداوە رەوانەی نەینەوا دەكرێنەوە، تا لە مەراسیمێكدا جارێكیتر لە گوندی كۆچۆ بەخاكبسپێردرێن، ئەوەش دوای تەواوبونی پشكنین و لێكۆڵینەوە.

روفاتەكان ئەمڕۆ پێنجشەممە 9ـی كانونی یەكەمی 2021 بە فڕۆكەوە بەڕێكران، دوای گەیاندنیان بە گوندی كۆچۆی قەزای شنگال، لەلایەن كەسوكاری قوربانیانی دەستی چەكدارانی (دەوڵەتی ئیسلامی - داعش) و پیاوانی ئایینییەوە پێشوازییان لێكرا.

سەباح سەمیر، لێپرسراوی راگەیاندنی نوسینگەی بابەشێخ بە (كەركوك ناو)ـی وت "قوربانییەكان خەڵكی كۆچۆن و لە پزیشكی دادی بەغدادەوە گەڕێنراونەتەوە تا بەخاكبسپێردرێن".

لە مەراسیمەكەدا بابەشێخ و لێپرسراوانی عیراق و هەرێمی كوردستانیش بەشداربون.

"رۆژێکی ئەوەندە نەخۆشە نازانم چۆن باسی بكەم، بۆ ئێمە وەك رۆژی حەشر وایە، بەڵام لەهەمانكاتدا بەئومیدین كە جارێكیتر روفاتی ئازیزانمان لە خاكی پیرۆزی شنگال بەخاكبسپێردرێنەوە" حەمید مەحمود وای وت، ئەو خەڵكی كۆچۆیە و خاڵۆزایەكی لەناو قوربانییەكاندایە.

rufatt 9.12 (9)
نەینەوا/ 9ـی كانونی یەكەمی 2021/ ئامادەكردنی روفاتی قوربانیانی ئێزیدی لە گوندی كۆچۆ تا بەخاكبسپێردرێنەوە فۆتۆ: راگەیاندنی نوسینگەی بابەشێخ

هەڵدانەوەی یه‌که‌م گۆڕی به‌کۆمه‌ڵی ئێزیدییه‌کان له‌ گوندی کۆجۆی قه‌زای شنگال، به‌ بڕیاری حکومه‌تی عیراق له‌ 15ی ئازاری 2019 ده‌ستیپێکرد و تائێستا به‌ دوو قۆناغ، نزیكه‌ی 500 روفات له‌ 20 گۆڕدا دەرهێنراون و لە شوباتی ئەمساڵیشدا روفاتی 104 ئێزیدی بە گوندی كۆجۆ بەخاكسپێردرانەوە.

حەمید لە قۆناغی یەكەمی بەخاكسپاردنی قوربانییەكاندا، روفاتی پێنج برای هەبون، هێشتا چوار كەسی دیكەش لە خێزانەكەی بێسەروشوێنن (دایك، باوك، برایەك و خوشكێك) "تاکە داواکاریمان ئەوەیە چارەنوسی رفێنراوەكان ئاشكرابكەن، تا بزانین لە ژیاندا ماون یان كوژراون، چونكە واحەوت ساڵە چاوەڕێین".

داعش له‌ 3ی ئابی 2014دا، هێرشیكرده‌ سه‌ر شنگال و له‌ 15ی ئاب "كۆمه‌ڵكوژی" له‌ گوندی كۆجۆی ئێزیدینشین ئه‌نجامدا.

خەیری عەلی، لێپرسراوی نوسینگەی رێکخراوی ئێزیدی بۆ دۆکیۆمێنتکردنی بەڵگەنامەکان بە (کەرکوک ناو)ـی وت ئەو 41 روفاتەی بەغدا بە مەراسیمێك لەلایەن هێزەكانی فیرقەی 20ـی سوپای عیراقییەوە رەوانەی شنگال كراونەتەوە.

به‌پێی ئامارەكانی حكومەتی هەرێمی كوردستان، هێشتا زیاتر لە دوو هەزار ئێزیدی بێسەروشوێنن و زیاتر لە دوو هه‌زار كەسیشیان به‌ ده‌ستی چه‌كدارانی داعش کوژراون.

rufatt 9.12 (10)
نەینەوا/ كانونی یەكەمی 2021/ هەڵكەندی گۆڕ بە روفاتی قوربانیانی ئێزیدی لە گوندی كۆچۆی شنگال فۆتۆ: تایبەت بە كەركوك ناو

فاخر خەڵەف، سەرپەرشتیاری هەڵكەندی گۆڕەكانی گوندی كۆچۆ بە (كەركوك ناو)ـی زیاتر لە 20 هاوڵاتی بە خۆبەخش پێشتر 41 گۆڕیان بۆ روفاتەكان ئامادەكردووە و هەر گۆڕێكیش ناوی قوربانییەكەی لەسەر دەنوسرێت.

روفاتی قوربانیانی ئێزیدی دوای دەرهێنانیان لە گۆڕە بە كۆمەڵەكاندا بۆ لێكۆڵینەوە و پشكنینی ناسینەوە رەوانەی بەغدا دەكرێن.

بەوتەی لێپرسراوی راگەیاندنی نوسینگەی بابەشێخ لەو 41 روفاتەی كۆچۆ نزیكەی 15 روفاتیان ژن و منداڵن.

سەباح سەمیر وتی "نزیكەی 350 روفاتی دیكە هێشتا لە پزیشکی دادی بەغدا ماونەوتەوە هەرکاتێک پشکنینەکانیان تەواو بوون رەوانەی کۆچۆ دەکرێنەوە.. لەكۆی گۆڕە بە كۆمەڵەكانیش تائێستا 25 گۆڕ هەڵدراونەتەوە و كاركردنی تیمەكانی دەزگای شەهیدانی عیراق بۆ هەڵدانەوەی گۆڕەكانی دیكەش بەردەوامە".

له‌ قەزای شنگال، 80 گۆڕی بەکۆمەڵ دۆزراونەتەوە، جگە لە دەیان گۆڕی یەک کەسی، که‌ مێژوه‌کانیان بۆ سه‌رده‌می ده‌سه‌ڵاتدارێتی داعش ده‌گه‌ڕێتەوە، ئەوەش بەپێی ئامارەكانی حكومەتی هەرێمی كوردستان.

  • FB
  • Instagram
  • Twitter
  • YT