دانیشتووانی پێنج گوندی ناحیەی مەكحول سەر بە قەزای بێجی لە پارێزگای سەڵاحەدین لەسەر "داوای هێزە ئەمنییەكان" ناوچەكانیان بەجێدەهێڵن، بەهۆیەوە تائێستا 337 خێزان ئاوارەبون و داوای هاوكاریی دەكەن.
ئاوارەبونی ئەو خێزانانە لە كۆتایی هەفتەی رابردووەوە دەستیپێكردووە، بەوتەی ئاوارەكان فەرماندەیی ئۆپەراسیۆنە هاوبەشەكانی سەڵاحەدین ئاگاداری دانیشتووانی ئەو پێنج گوندەی كردۆتەوە "ژیانتان لە مەترسیدایە و لە ناوچەكەدا بۆشایی ئەمنی هەیە و دەبێت چۆڵی بكەن".
فاتمە عەلى، خەڵكی گوندی ئوم زەیابە – یەكێكە لەو گوندانەی ناحیەی مەكحول كە چۆڵیان كردووە -، وتی "هێزە ئەمنییەكانی سەڵاحەدین پێیانوتین ناوچەكە بەجێبهێڵن و مەترسی لەسەر ژیانتان هەیە، ئێستا ماڵ و حاڵمان بەجێهێشتووە و ئەوەتا ئاوارەبوین، بارودۆخمان خراپە و پێویستمان بە هاوكاریی هەیە، منداڵی بچوكمان هەیە و ئافرەتی دوو گیانیشمان لەگەڵدایە، داوا دەكەین رێكخراوەكان و حكومەت بەزویی هاوكاریمان پێبگەیەنن".
ئاوارەكان لە ناوچەیەكی بەرامبەر ناحیەی مەكحول خێمەیان هەڵداوە و مانگی سوری عیراق هەندێك هاوكاری پێگەیاندون، لەوانە خێمە و گەیاندنی ئاوی خواردنەوە لەڕێی تانكەرەوە.
عەلى موجبل، یەكێكی تر بوو لە ئاوارەكان، وتی كە ئەوان لەسەر داوای هێزە ئەمنییەكان ناچاربون گوندەكانیان چۆڵبكەن، "هەمومان بە كاری كشتوكاڵی و ئاژەڵدارییەوە سەرقاڵبوین و ئێستا خێمەیان پێداوین و نازانین ئایندەمان چی بەسەردێت".
ئەو پێنج گوندە هەمویان عەرەبی سوننە مەزهەبن، ئەمە جاری دووەمە ئاوارەدەبن، جاری یەكەم ئەوكاتە بوو كە چەكدارانی دەوڵەتی ئیسلامی لە عیراق و شام ناسراو بە (داعش) ناوچەكەیان كۆنترۆڵكرد.
داعش لە ناوەڕاستی 2014 تا كۆتایی 2017 لە چەند ناوچەیەكی عیراق دەسەڵاتی هەبوو، لەوانەش ماوەیەك لە شاری تكریت مەڵبەندی پارێزگای سەلاحەدین مانەوە.
رەسوڵ جاسم، بەڕێوەبەرى ناحیەى مەکحول، سەر بە قەزاى بێجى لە پارێزگای سەڵاحەدین، بە (كەركوك ناو)ی وت "راستە ئەو پێنج گوندە لەسەر داواکاریى فەرماندەیی ئۆپەراسیۆنە هاوبەشەكانی سەڵاحەدین چۆڵكراون، لە ناوچەكە بۆشایی ئەمنی هەیە و مەترسی تیرۆریستانی داعشیان لەسەرە".
لە ناوچەكە بۆشایی ئەمنی هەیە و مەترسی تیرۆریستانی داعشیان لەسەرە
ئەو گوندانە دەكەونە باكوری خۆرئاوای شاری تكریت، لە بەری خۆرهەڵاتەوە هاوسنورن لەگەڵ قەزای حەویجە لە باشوری خۆرئاوای شاری كەركوك، هەروەها لە بەری خۆرئاواوە درێژدەبنەوە بۆ سنوری پارێزگای ئەنبار. بەگشتی گوندەكان دەكەونە پشتی دواین بازگەی هێزە ئەمنییەكانی سەڵاحەدینەوە و ناوچەیەكی فراوانە.
ریاز مالیكی، لێپرسراوی راگەیاندنی فەرماندەیی ئۆپەراسیۆنە هاوبەشەكانی سەڵاحەدین، هیچ زانیارییەكی لەسەر ئەو پێشهاتە نوێیە بە (كەركوك ناو) نەدا، كاتێك لەڕێی تەلەفونەوە پەیوەندی پێوەكرا.
بەپێی دواین ئاماری لقی تكریتی مانگی سوری عیراقی، تا ئێوارەی یەكشەممە 13ی شوبات، هەزار و 500 كەس لە چوارچێوەی 337 خێزاندا ئاوارەبون.
حەیدەر قاسم، بەڕێوەبەرى لقى تکریتى مانگى سورى عیراقى بە (كەركوك ناو)ی وت "زیاتر لە چوار رۆژ دەبێت ئاوارەبون، خێمەمان بۆ بردون، لە دوو رۆژی سەرەتادا كێشەی نەبونی ئاوی خورادنەوەیان هەبوو، توانیمان ئاوی خورادنەوەیان پێبگەیەنین، لەگەڵ خۆراك و بەتانی و دۆشەك".
وتیشی "رۆژانە ئاوارەی نوێ دێن، ئەوەى ئێمە ئاگادارین و پرسیارمان کردووە ئاوارەبونەكە كاتییە، بەڵام دیاریكراو نییە".
بەڵام بەڕێوەبەرى ناحیەى مەکحول وتی "بەپێی بەدواداچونی ئێمە لانیكەم چوار مانگ دەمێننەوە تا بتوانن پلان بۆ پاراستنی ئەمنییەتی ناوچەكانیان دابنرێت".
