پڕۆژەی ریسایكلینی پلاستیك و دەبەی ئاو لە كەمپی ئاوارەكانی كەبەرتوو لە پارێزگای دهۆك بۆ یەكەمجار دانرا، ئامانجەكە لە ئێستادا پاككردنەوەی ژینگەی كەمپەكانە لە پلاستیك و دوبارە بەكارهێنانەوەیەتی بۆ خشڵی جۆراوجۆر، گوڵدان، كورسی و یاریی منداڵان.
بۆ دورمەودا ئامانجەكە گەورەترە، وەك ئەوەی ستافی پڕۆژەكە دەڵێن، لەوانە فراوانكردنی بۆ ناوچەكانی تر و لەو رێیەوە بڵاوكردنەوەی هۆشیاریی ژینگەیی و ئاگاداركردنەوەی هاوڵاتیان لە مەترسییەكانی پیسبونی ژینگە و ئاوی ژێرزەوی بەهۆی پلاستیكی فڕێدراوەوە.
كارگەی دهۆك بۆ ریسایكلینی پلاستیك، لەلایەن رێکخراوى ژیندا بە هاوکارى رێکخراوى وادى ئەڵمانى لە كەمپەكە دانراوە، دوای سەركەوتنی هەمان پڕۆژە لە هەردوو شاری كفری و هەڵەبجە.
چیمەن رەشید، بەڕێوەبەرى رێکخراوى ژیندا لە دهۆک، بە (كەركوك ناو)ی وت "لە سەرەتادا لە هەردوو كەمپی كەبەرتوی یەك و دوو دانراوە، دەمانەوێت دواتر فراوانی بكەین".
ئەوەش دوای ئەوە دێت لە ماوەی ساڵی رابردودا، رێكخراوی ژیندا لەڕێی شەش كچی رزگاربوی ئێزیدی بەشێوەی خۆبەخش و لەڕێی سیمینارەوە خەڵكی كەمپەكانیان لە مەترسییەكانی پیسبونی ژینگە ئاگاداركردەوە، ئەمە وەك قۆناغی یەكەمی پڕۆژەكە.
ئەو شەش كچە لە ئابی 2014ەو لەلایەن چەكدارانی دەوڵەتی ئیسلامی لە عیراق و شام (داعش) رفێنراون و ساڵانی دواتر رزگاركران و گەڕانەوە ناو كۆمەڵگەی ئێزیدی.
چیمەن وتی "ماڵ بە ماڵ لەگەڵ ئاوارەكان كۆدەبونەوە و كیسەی كۆكردنەوەی پلاستیكیان بەسەردا دابەشدەكردن و هۆشیاری ژینگەییان پێدەدرا".
لەپاڵئەوەدا رێكخراوی ژیندا پێنج سندوقی تایبەتی بۆ دانانی پلاستیك لەچەند شوێنێكی كەمپەكە جێگیركرد و دواتر دوو كۆگایان هەر لەناو كەمپەكە بۆ كۆكردنەوەی پلاستیكەكان جێگیركرد، وەك قۆناغی دووەم.
لە هەردوو كەمپەكەدا كە دەكەوێتە قەزای سێمێل لە پارێزگای دهۆك زیاتر لە 20 هەزار ئاوارەی تیایە، بەپێی ئاماری بەڕێوەبەرایەتی كۆچ و كۆچبەران لە پارێزگای دهۆك – سەر بە حكومەتی هەرێمی كوردستان-.
هەفتەكانی رابردوو ئەو تیمەی كار لەسەر پڕۆژەكە دەكەن راهێنانی پێویستیان وەرگرت و پڕۆژەكە جێگیركرا.
پڕۆژەكە پێكدێت لە سێ ئامێر، كە هەریەكە و كارێكی تایبەت دەكات لە وردكردن و هاڕینی پلاستیكەكان و دواتر دروستكردنی پێداویستی تر لە پلاستیكەكان.
تیمی پڕۆژەكە نمونەی 40 رۆژیان بۆ (كەركوك ناو) هێنایەوە، لەو ماوەیەدا 925 كیلۆ پلاستیك كۆكراوەتەوە و لە كۆگایەكدا هەڵگیراون.
"لەگەڵ ئەوەی پڕۆژەكە دۆستی ژینگەیە، هاوكات دەرفەتی كار بۆ هەندێك كەس دەڕەخسێنێت"، چیمەن رەشید زیاتر وتی "ئەوانەی لە كارگەكە ئیشدەكەن راستە پارەیەكی كەمیان پێدەدرێت، بەڵام ئەمە سەرەتاییە و دواتر دەتوانرێت بەرهەمەكانی كارگەكە بچێتە بازاڕەوە".
وتیشی "خۆی ئامانجەكە ئێستا ئەوەیە دەبەی ئاو و بابەتە پلاستیكییەكان فڕێنەدرێن و ژینگە پیسنەكرێت، هۆشیاریی لێرەدا ئامانجی یەكەمە... لە پلانماندایە پڕۆژەکە فراوانتر بكەین".
لەسەدا 10ی كۆی پلاستیكە كۆكراوەكان دەبەی رۆنی چێشتلێنانە، ئەوەی تر دەبەی ئاو و خواردنەوە گازییەكانە، وەك ئەحمەد سەنەد کالى، سەرپەرشتیارى کارگەکە جەختیلێكردەوە. "لێرە چوار كەس كاردەكەین، سیانیان كچن و راهێنانی پێویستیان وەرگرتووە و چەند نمونەیەكی بەرهەمەكانیان خستەبازاڕەوە".
بەڵام هێشتا رون نییە بازاڕی بەرهەمەكانی كارگەكە لە بازاڕدا چۆن دەبێت.
نەجلا زەگرو (28ساڵ)، كە خۆی لە كەمپی كەبەرتوو دەژیت، وتی "لەوەتەی هۆشیاریی خەڵك بۆ فڕێنەدانی پلاستیك دەستیپێكردووە، كەمپەكە لە جاران پاكترە و خەڵكی دەبەی ئاوەكانیان فڕێنادەن و پلاستیكەكان كۆدەكەنەوە... ئاوارەكان ئێستا تێدەگەن فڕێدانی پلاستیك چەند زیانی هەیە".
"ئاوارەکان و خەڵكی تریش زۆر پێویستییان بەم جۆرە پڕۆژانە و هۆشیاركردنەوەیان هەیە... ئێستا من زۆر حەزدەكەم لە بواری ژینگەدا كاربكەم، هیوادارم پڕۆژەكە فروانتربێت".
