هەموو گڵۆپ و روناكییەكی هۆڵەكە كوژێنرابونەوە، تەنیا یەك بازنەیەكی بچوكی روناكی نەبێت، كە تیایدا كچ و كوڕێك لەگەڵ میوزیكێكی هێواش سەمایان دەكرد.
كەشێكی تەواو بێدەنگ و رۆمانسی باڵی بەسەر هۆڵەكەدا كێشابوو، لەو تاریكییەدا سەرنجی لانیكەم 700 كەس تەنیا لەسەر یەك بازنەیەكی بچوكی روناكی بوو كە بە گوڵ و وردە گڵۆپ رازێنرابۆوە.
سەجا ئیسماعیل و هاوژینەكەی دواین كەس بوون گەیشتبوونە هۆڵەكە، شیكپۆش و دەم بەخەندە دەستیان یەكیانگرتووە و هەر بە پێوە و لەگەڵ ئەو 700 كەسەدا بە عیشقەوە لەو دیمەنەیان دەڕوانی.
ئەوان لە دەرگایەكی بچوكی هۆڵەكەوە چونە ژورەوە، لەگەڵ چونە ژورەوەیان گڵۆپەكان كوژێنرانەوە، گفتوگۆیەكی كورتیان لەگەڵ خۆیاندا كرد، هاوسەرەكەی بە سەجا دەڵێت "با بچین دابنیشین"، بەڵام سەجا وتی "زۆر جوانن دەمەوێت ئەم سەمایە ببینم".
هەموو ئەو دیمەنە بۆ سەجا و هاوژینەكەی دوو دەقە بوو، لە پڕ لە 20 چركەدا هەموو شت گۆڕا. سەجا وتی "قیامەتم بینی". قیامەتێك بە مردنی 125 كەس كۆتایی هات. ئێرە هۆڵێكی ئاهەنگگێڕانە لە قەزای حەمدانیەی سەر بە پارێزگای نەینەوا، سەجا و هاوژینەكەی لە دهۆكەوە بۆ ئەو ئاهەنگە رۆیشتون، لە 26ی ئەیلولی 2023.
گەڕانەوەیەك بۆ سەرەتای چیرۆكەكە
لە 22ی ئەیلولی 2023، كە دەكاتە چوار رۆژ پێش ئاهەنگەكە، كاتێك سەجا لە چێشتخانەی ماڵەكەی خۆیدا لە دهۆك سەرقاڵی خواردن دروستكردن بوو، زەنگێكی تەلەفون بۆ هاوژینەكەی دێت، "هاوژینەكەم دوای وەڵامدانەوە هاتە سەر مێزی نانخواردن و بە پێكەنینەوە لەسەر كورسییەكەی دانیشت"، سەجا دەپرسێت چی بووە؟ ئەو تەلەفونە دڵخۆشی كردی؟ هاوژینەكەی لە وەڵامدا دەڵێت "ئارمانی برام بوو، دەڵێت داوەتنامەیەكتان بۆ 26ی مانگ بۆ هاتووە، داوەتی ئاهەنگێكن لە حەمدانییە".
سەجا بە دەنگی بەرزتر دەڵێت "وای كە خۆشە ریڤیان و حەنین دەگوازنەوە، دەچین بۆ ئاهەنگ".
هەردوو بنەماڵەی ریڤیان و سەجا، هیچ خزمایەتییەكیان لە نێواندا نییە، ئەوەی ئەوانی كردە دۆستی یەكتر ئاوارەیی بوو.
هەردولا لە سەردەمی هێرشی چەكدارانی داعش بۆ عیراق لە حوزەیرانی 2014دا موسڵ و دەشتی نەینەوا بەجێدەهێڵن و ئاوارەی دهۆك بون، لەو شارە بونە دراوسێی یەكتر. لەڕاستیدا بنەماڵەی سەجا موسوڵمان و بنەماڵەی ریڤیان كریستیانن، بەڵام پەیوەندی نێوان هەردوو دراوسێ زۆر بەهێز بوو، هاتوچۆیان هەبوو.
دوای ئەوەی پارێزگای نەینەوا لە كۆتایی 2017 كۆنترۆڵكرایەوە، بنەماڵەی ریڤیان گەڕانەوە بۆ حەمدانییە و سەجا و هاوژینەكەی هێشتا لە دهۆك ماون، بەڵام پەیوەندیی نێوانیان هەر بەردەوامبوو.
ئامادەكاریی سەجا و هاوژینەكەی بۆ ئەو ئاهەنگە
سەجا ئەوەندە بە جۆش بوو بۆ ئەو ئاهەنگە هەر رۆژی دوای داوەتنامەكە لەگەڵ هاوژینەكەی كەوتە گفتوگۆی ئەوەی جوانترین جل بپۆشن.
"لە کەنتۆری جلەکوردییەکانم تاقمێكی شینی كاڵم هەڵبژارد، دوو هەفتە بوو كڕی بوم، بەڵام هاوسەرەكەم وتی جوان نییە، بەتایبەت ئاهەنگەكە شەوە و ئەم جلەش كاڵە، بۆ وێنە جوان دەرناكەوێت"، سەجا وایوت.
لەو گفتوگۆیەدا سەجا هەرچەندە دەڵێت پیاوان لە رەنگ نازانن، بەڵام بڕیاریدا جلێكی نوێی كوردی بكڕێت، هەر لەڕێی واتسئەپەوە قوماشی هەڵبژارد و بە دورینیدا، بەیانی رۆژی ئاهەنگەكە دورینی جلەكانی تەواو بوو.
هاوژینەكەی سەجا، بەیانیی 26ی ئەیلول قات و پانتۆڵێكی بۆ ئاهەنگەكە كڕی، سەجا وتی "ئەوەندە دڵخۆش بوم و خەریكی خۆ ئامادەكردن بوم، نەمتوانی نانی نیوەڕۆ ئامادە بكەم، لە دەرەوە خواردنمان داوا كرد".
دوای نانی نێوەڕۆ بەرەو قەزای ئاكرێ بەڕێكەوتن، ماڵی خوشكێكی سەجا لەو قەزایەیە، قەزای ئاكرێ بەراورد بە دهۆك زۆر نزیكترە لە حەمدانییەوە.
هەردوكیان بڕیاریاندا تا كاتژمێر 9ی شەو لە ئاكرێ بن و دواتر بەرەو حەمدانییە بەڕێبكەون.
هاوسەرەكەی سەجا قات و بۆینباخێكی رەش و كراسێكی سپی لەبەركرد، سەجاش بۆ یەكەمجار لە ماڵی خوشكەكەی جلە كوردییە نوێیەكانی تاقیكردەوە، ئەویش رەنگی رەش، هەموی بە كریستیاڵی زەردی بچوك داپۆشرابوو كەواكەشی تولی رەش و بە کریستاڵی رەشی بریقەدار نەخشێنرابوو، سەجا بەڕادەیەك دڵخۆش بوو نەیدەزانی چۆن خۆی ئامادە بكات، لەوەدا خوشكەكەی هاوكاریی دەكرد، هەر جارناجارێك وێنەیەكی دەگرت و دەچووە بەردەم ئاوێنە.
كچە خوشكەكەی سەجا كە تەمەنی 11 ساڵە، ئەویش خۆی گۆڕی و داوایكرد لەگەڵیان بڕوات بۆ ئەو ئاهەنگە، بەڵام دایكی رێگەی نەدا، وتی درەنگ دێنەوە و تۆ زوو دەخەویت.
كاتێك كاتژمێر 8:50 دەقە لە ئاكرێ بەڕێكەوتن، سەجا دەڵێت "دڵم پڕبوو كە لە ئاوینەی ئۆتۆمبێلەكەمەوە بینیم كچی خوشكەكەم بەدواماندا دەگیرێت"، بەڵام ئێستا دەڵێت ئەوە خێرێكی گەورەی پێوەبوو، "رەنگە ئەگەر لەگەڵماندا بهاتایە جارێكی تر دایك و باوكی نەیانبینیایەتەوە".
سەجا لەڕێگا گۆرانییەكی بادینی لەگەڵ هاوسەرەكەی دەوتەوە، هەر لەناو ئۆتۆمبێلەكە چەپڵەی لێدەدا و سەمای دەكرد و هەلھەلەی لێدەدا، ئەو شەوە بە یەكێك لە رۆژە خۆشەكانی خۆی دادەنێت.
دواتر گۆرانییەكی خێرای هونەرمەندی میللی رومی هەركی-یان خستەسەر و بەرێگایەكی پڕ چاڵ و بەرز و نزم بەرەو حەمدانییە بەڕێكەوتن، بەڵام بە جۆش بونی ئەوان بۆ گەیشتن بە ئاهەنگەكە رێگا ناخۆشەكەی لە بیر بردبونەوە، لەوكاتەدا هاوسەرەكەی بە سەجا دەڵێت "وابزانم خوشکی زاوا ئەوەندەی تۆ خۆی ئامادە نەكردووە، هەندێك وزەت بۆ ئاهەنگەكە بهێڵەرەوە".
قیامەت لە هۆڵی هەیسەم
سەجا و هاوژینەكەی كاتژمێر 10ەو 20 خولەك گەیشتنە بەردەم هۆڵی هەیسەم لە حەمدانییە، دەوروبەری هۆڵەكە بەڕادەیەك ئۆتۆمبێلی لێ بوو، ناچاربون لە دوری 200 مەتر ئۆتۆمبێلەكەیان رابگرن و بەرەو هۆڵەكە بچن.
سەرەتا ویستیان لە دەرگای سەرەكییەوە بچنە ژورەوە، بەڵام لای راستی هۆڵەكە لانیكەم 15 منداڵ كە یارییان دەكرد، بە هاوژینەكەی سەجایان وت "مامە ئەم دەرگایە داخراوە، بچن لای دەرگای چێشتخانەكەوە بچنە ژورەوە". منداڵەكان وتیان كاتژمێر 11 نانی ئێوارە دەخورێت، سەجا سەیرێكی هاوسەرەكەی كرد و وتی "كاتێكی باش گەیشتین".
چركەساتی روداوەكەی حەمدانییە، ڤیدیۆكە لەلایەن وەزارەتی ناوخۆی عیراقەوە بڵاوكراوەتەوە.
دەرگای چێشتخانەكە دەكەوێتە بەشی پشتەوە هۆڵەكە، بەڵام گەورە نییە و تەنیا یەك كەس دەیتوانی لەیەككاتدا پێیدا هاتوچۆ بكات.
سەجا ئەو ساتەی بیرناچێتەوە كە بە ئاراستەی هۆڵەكە دەڕۆیشت، دەنگی گۆرانییەكی هێمن تێكەڵ بە تەقەی پێڵاوەكانی و خشەخشی جلە كوردییەكانی بوو بوون، هەوایەكی فێنك رووە و دەرەوەی هۆڵەكە دەڕۆیشت.
لەگەڵ چونە ژورەوەی ئەو دوو میوانە، گڵۆپ و تەواوی روناكی هۆڵەكە كوژێنرانەوە، تەنیا یەك بازنەی روناكی نەبێت كە ریڤیان و حەنین سەمایان لێدەكرد و وێنەگرێكیش وێنەی دەگرتن.
"كەشێكی ئێجگار رۆمانسی و ئارام باڵی بەسەر هۆڵەكەدا كێشابوو، هاوژینەكەم وتی با بڕۆین دابنیشین، وتم نا دەمەوێت ئەو سەما جوانە ببینم، جارێ هۆڵەكە تاریكە و نازانین لە كوێ دابنیشین"، سەجا وایوت.
هەروەها دەڵێت "یارییە ئاگرینەكانیان داگیرساند و تێكەل بە میوزیك و سەما بوو، زۆر جوان و سەرنجڕاكیش بوو، لوتكەی جوانی و رۆمانسییەت تەنیا 20 چركە بوو".
یارییە ئاگرینەكان لە زەوییەوە بەرەو بنمیچی هۆڵەكە هەڵچون، لەپڕ بنمیچی هەموو هۆڵەكە بۆ بە یەك پارچە ئاگر و بەش بەش بەسەر خەڵكەكەدا كەوتەخوارەوە.
بەپێی خەمڵاندنی بەرگری شارستانی نەینەوا، لەو شەوەدا لانیكەم 700 كەس لەناو هۆڵەكەدا بون، لەكاتێكدا هۆڵەكە بۆ 500 كەس دروستكراوە.
سەجا وتی "لەگەڵ كەوتنەخوارەوەی بنمچی هۆڵەكە، بە مایكی گۆرانیبێژەكە هاوار كرا هەمووان هۆڵەكە بەجێبهێڵن، ژیانتان لە مەترسیدایە".
لەگەڵ كەوتنەخوارەوەی بنمچی هۆڵەكە، بە مایكی گۆرانیبێژەكە هاوار كرا هەمووان هۆڵەكە بەجێبهێڵن
ئەو هیچكات ئەو چركەیەی بیرناچێت، كە ئاگركەوتنەوە و هاواری چۆڵكردنی هۆڵەكە و قیژەی ژن و گریانی منداڵ تێكەڵ بە یەك بون.
"لەبەر زۆری مێز و کورسییەکان، بچوكی دەرگاكە و پێڵاوی پاژنە بەرزی ژنان، هەموو خەڵكەكە بەسەر یەكدا كەوتن، كەس نەیدەتوانی بەباشی رابكات، ئاگری بنمیچی هۆڵەكەش بەسەریاندا دەكەوت، دوكەڵ هۆڵەكەی پڕكرد و كارەبا پچڕا".
سەجا و هاوژینەكەی لەبەرئەوەی تازە هاتبونە هۆڵەكەوە و تەنیا سێ مەترێك لە دەرگاكەوە دوربون، هاوژینەكەی دەستیگرت و لە كەسە یەكەمەكان بون كە رزگاریان بوو.
"هەر لە هۆڵەكە دەرچوم ئاوەڕی دواوەم دایەوە، وتم ئەمە رۆژی قیامەتە، منداڵ و ژن و پیاو هەمویان كەوتبون بەسەر یەكدا و ئاگریان بەسەردا دەكەوت، قیژە و هاوار و دوكەڵ و ئاگر تێكەڵ بەیەك بون، بەڕادەیەك ترسناك بوو پێم زەوی نەدەگرت، منیش هەر هاوارم دەكرد".
لەو ساتەدا ریڤیان بوكەكەی لە باوەش كردبوو بەرلەوەی لە دەرگای سەرەكی بێنە دەرەوە هەردوكیان كەوتن، "ئەو دیمەنەم بە چاوی خۆم بینی كاتێك كەوتنە ژێر پێی خەڵكەوە"، زیاتر وتی "زاوا هەستایەوە چاكەتەكەی فڕێدا و هاواریكرد یارمەتی یارمەتی... گەڕایەوە بۆ بوك، ناچار جلەكانی بوكی دڕاند بۆ ئەوەی بتوانێت لەژێر پێی خەڵك دەریبهێنێت و بەو شێوەیە رزگاریان بوو".
ئەوانەی لە هۆڵەكە رزگاریان بوو لە پشتەوە پەلاماری دەرگای سەرەكییاندا و شكاندیان، بۆ ئەوەی لەوێشەوە خەڵك رزگار بكرێت.
لەوكاتەدا هاوژینی سەجا داوا لە سەجا دەكات بچێتە ناو ئۆتۆمبێلەكەوە، سویچی ئۆتۆمبێلەكی پێدەدات و دەڵێت "من دەچم خەڵك رزگار دەكەم".
سەجا دەڵێت بە ترس و گریانەوە لەناو ئۆتۆمبێلەكەیدا دانیشتبوو، بەڵام هەر ئۆقرەی نەگرتووە، هاتۆتە خوارەوە و گوێی لە گریانی منداڵێك بووە.
"نزیکبومەوە لێی بینیم تەمەنی كەمتر بوو لە دوو ساڵ، منداڵێكی قژلولی ئەسمەر بوو، زۆر خوێن شیرین، تشێرتێكی سپی و كابۆیەكی شینی لەبەردا بوو، رەنگە رزگاركرابێت و لە دەرەوە دانرابێت".
سەجا منداڵەكە لە ئامێز دەگرێت و دەیباتە ناو ئۆتۆمبێلەكەی، هەموو گیانی تۆز بووە، بەشێك لە جلەكانی تەڕ بووە، بۆیە جلەكانی دادەكەنێت، دەبینێت بەشێك لە سك و پێیەكی سوتاوە و پێستی بە كابۆكەیەوە لكاوە.
"خەریك بوو دڵم بۆی ببێت بە ئاو، دەبەیەك ئاوی سارد لەناو ئۆتۆمبێلەكەدا بوو، بە هێواشی بەسەر سوتاوییەكەمدا كرد، تەماشای كردم و پێدەكەنی، دیاربوو ئازارەكەی كەمتر دەكردەوە، زۆر گەرمابوو تەبریدی سەیارەكەم داگیرساند، شكولاتەیەكم پێدا، دەیخوارد، دواتر دەستی كردەوە بە گریان ژیر نەدەبۆوە".
سەجا دەڵێت دوای 15 خولەك كاتێك هاوار و گریان خەڵك "دەگەیشتە كەشكەڵانی فەلەك"، پۆلیس و بەرگری شارستانی و ئەمبوڵانس گەیشتنە سەر روداوەكە و خەڵكیان دەبرد بۆ نەخۆشخانەی حەمدانییە و موسڵ، هەر لەوێ ئەویش منداڵەكەیان رادەستدەكات.
لەوكاتەدا هاوژینەكەی سەجا تەلەفونی بۆ دەكات و دەڵێت ئۆتۆمبێلەكە لە دەرگاكە نزیك بكەرەوە، بۆ ئەوەی چەند بریندارێك بگەیەنێتە نەخۆشخانە، بەڵام بەردەم دەرگاكە زۆر قەرەباڵغ بووە، بۆیە هاوژینەكەی خۆی دوو كچی برینداری 13 ساڵان و پیاوێكی هێنا و بەرەو نەخۆشخانە بردیانن.
كە دەگەنە بەردەم نەخۆشخانەی حەمدانییە هەمان هاوار و قەرەباڵغی هەبوو، پڕ بوو لە ئۆتۆمبێلی فریاكەوتن و پۆلیس، دوو كوڕی گەنج هاوكاری سەجا و هاوژینەكەی دەكەن لە گواستنەوەی بریندارەكان.
لەناو نەخۆشخانە كاتێك سەجا دەیەوێت بچێتە دەرەوە، تەرمی دوو كەس دەبینیت، ئەوە زۆر ئازاری دەدات، بەتایبەت كاتێك زانی یەكێك لە تەرمەكان ئەو منداڵە قژلولە بووە كە پێشتر لە باوەشی كردبوو. "تێر ماچم كرد، هێشتا شكولاتەكە بە رومەتییەوە بوو، دەستم لە قژە لولەكەیدا، هێشتا دوایین پێكەنین لەسەر روخساری مابوو، زۆر گریام بۆی".
سەجا بە دكتۆرەكان دەڵێت بۆ مردووە؟ ئەوانیش دەڵێن "سوتاوییەكەی گەیشبتووە گورچیلەی".
بەرگری شارستانی نەینەوا رۆژی دوای روداوەكە، لێكۆڵینەوەكانی لەبارەی كەوتنەوەی ئاگرەكەی حەمدانییە بڵاوكردەوە و جەختیكردەوە "هۆڵی ئاهەنگگێڕانەكە بە ماددەی ئیکۆبۆند روپۆشكراوە، ماددەیەكی زۆر سوتێنەرە و پێچەوانەی رێنماییەكانی سەلامەتییە، هۆڵەكە مەرجەكانی سەلامەتی تێدا رچاونەكراوە".
زیاتر هاتبوو "كەوتنەوەی ئاگرەكە بۆتەهۆی داڕمانی بەشێك لە هۆڵەكە، بەهۆی ئەوەی كەرەستەی بیناسازی تێچوی كەم و سوتێنەری تێدا بەكارهاتووە، بەوهۆیەوە لە ماوەی چەند خولەكێكی كەمی كەوتنەوەی ئاگرەكەدا سەقفەكە دەڕوخێت".
هەروەها رازاندنەوەی بنمیچی هۆڵەكە بۆ ئاهەنگەكە بە کەرەستەی زوو گڕگرتوو بووە.
بەگشتی تا شوباتی ئەمساڵ ئەوانەی بەهۆی كەوتنەوەی ئاگرەكە گیانیانلەدەستدا گەیشتنە 125 كەس، لانیكەم دوو هێندەش برینداربون. بەڵام تەنانەت تا مانگی 9ی ئەمساڵیش بەردەوام حاڵەتی گیانلەدەستدانی بریندارانی ئەو روداوە هەبوو، زۆرینەیان لە ئایینی كریستیانی بون.
وەزارەتی ناوخۆی عیراق لیژنەیەكی لێكۆڵینەوەی لەسەر روداوەكە پێكهێنا، لە یەكی تشرینی یەكەم ئەنجامەكەی بڵاوكردەوە و جەختیكردەوە روداوەكە بە "ئەنقەست نەبووە"، بەڵام كەمتەرخەمی لە خاوەنی هۆڵەكە هەبووە، لەگەڵ ئەوانەی لێپرسراوێتی یارییە ئاگرینەكانیان لە ئەستۆگرتووە.
هەروەها هاتووە "كوژانەوەی كارەبا لەوكاتەدا ترسێكی زۆر گەورەی لەناو خەڵكەكە دروستكردووە".
هۆڵەكە وەك ئەوەی وەزارەتی ناوخۆ ئاماژەی پێدەكات "فرە دەرگا نەبووە، پێداویستییەكانی سەلامەتی لەناودا نەبووە، زۆر زیاتر لەوە خەڵكی تیابووە كە دەیگرێت".
خاوەنی هۆڵەكە تەواوی تۆماری كامێراكانی چاودێری لەگەڵ خۆی بردووە و بەپێی وەزارەتی ناوخۆ "رایكردووە بۆ هەولێر".
وەزارەتی ناوخۆ بەو هۆیەوە فەرمانی دەستگیركردنی بۆ 14 كەس دەركرد، خاوەنی هۆتێلەكە، 10 كرێكار و سێ تێوەگلاو لە یارییە ئاگرینەكان.
بەڵام ئەنجامی لیژنەكە، ناڕەزایی فراوانی كریستیانەكانی حەمدانییەی بەدواداهات، داوای لێكۆڵینەوە نێودەوڵەتییان كرد، چونكە گومانیان كرد روداوەكە بە "ئەنقەست" بێت.
دەیان برینداری روداوەكە بۆ وەرگرتنی چارەسەر لەسەر ئەركی حكومەت رەوانەی دەرەوە كران.
لە روداوەكەدا 10 كەس لە خزمی هەرە نزیكی حەنین (بوك) گیانیان سپارد، لەوانە دایك، خوشك و خوشكەزا.
هەرچەندە ساڵێك بەسەر ئەم روداوەدا تێپەڕ بووە، بەڵام هێشتا روداوەكەی حەمدانییە شۆكێكی گەورەیە بۆ قەزاكە و پارێزگای نەینەوا، بریندارەكان لە دۆخی دەرونی خراپدان، تەنانەت ئەوانەشی وەكو سەجا روداوەكەیان بە چاوی خۆیان بینیوە.
