وەزارەتی بازرگانی عیراق ناوی 10 هەزار خێزانی ئاوارە لە لیستی بەشەخۆراكی مانگانە دەردەهێنێت، ئەوەش بەپێی وتەی ئاوارەكان بە پاساو و هۆكاری جیاواز.
ئەو 10 هەزار خێزانە كە هەمویان لە سەردەمی شەڕی داعش-دا ئاوارەی سنوری پارێزگای دهۆك بون و لە كەمپەكانی ئاوارەیدا دەژین، بۆ بەدەستهێنانەوەی بەشەخۆراكی مانگانە لە نێوان هەردوو پارێزگای دهۆك و نەینەوا لە هاتوچۆدان.
جیهاد رەڤو، یەكێكە لەو خێزانانەی دوو مانگە بەشەخۆراكی مانگانەی پێنادەن، وتی "كاتێك چوم بۆ لای بریكاری خۆراكەكە لە دهۆك، پێیوتم ناوت لە لیستەكە دەرهێنراوە، لەوكاتەوە لەنێوان هەردوو پارێزگای دهۆك و نەینەوا هاتوچۆ دەكەم، بەڵام كێشەكەم چارەسەر نەبووە".
لەبارەی هۆكاری دەرهێنانی ناوەكەی لە بەشەخۆراكی مانگانەی دهۆك، وتی "وا هەژماركراوین كە ئێمە چیتر ئاوارە نەماوین و گوایا گەڕاوینەتەوە زێدی خۆمان".
حكومەتی عیراق ناوبەناو بەشەخۆراكی مانگانەی ئەو ئاوارانەی دەگەڕێنەوە زێدی خۆیان لەسەر پارێزگای دهۆك لادەبات، هەندێك كات كاتی پێدەچێت تا ناوەكانیان بۆ بریكارەكانی ناوچەكانی پێشوی خۆیان دەگوازرێتەوە.
جیهاد رەڤو، كە لە كەمپی شاریا دەژی، شەش مانگ لەمەوبەر كەمپەكەیان بەجێهێشت و چونە سەنتەری شاریا، وتی "ئێمە هەر لە ئاوارەییدا دەژین، بەڵام لە كەمپ شوێنەكەمان خراپ بوو بۆیە چوینە سەنتەری شاریا و خانوویەكمان بە كرێێ مانگانەی 170 هەزار دینار گرت، بەڵام وا هەژماركراوین گوایا گەڕاوینەتەوە شنگال".
قەیس وەیسی، لێپرسراوی راگەیاندنی كۆمپانیای دابەشكردنی خۆراكی دهۆك، وتی "لە سەرەتای هاتنی ئاوارەكان ناوی تەواوی ئاوارەكانمان داخل كرد، بۆ ئەوەی بەشەخۆراكی مانگانە لە دهۆك وەربگرن، لەگەڵ گەڕانەوەی ورد وردەی ئاوارەكانیش مانگانە چەندین ناو لە لیستەكەدا نامێنن، بەبێ ئەوەی هیچ رونكردنەوەیەك بە ئێمە بدەن".
وتیشی "لە ئەمساڵدا نزیكەی 10 هەزار خێزان ناویان لە لیستی كۆمپانیای خۆراكی دهۆكدا نەماوە، بۆیە ئێمە ناتوانین خۆراكیان پێبدەین، لەڕاستیدا ئێمەش هۆكارەكەی نازانین".
هەفتەكانی رابردوو لیژنەیەكی وەزارەتی بارزگانی عیراق بۆ ئەو مەبەستە سەردانی كەمپەكانی كرد، تا لێكۆڵینەوە بكەن لەبارەی ئەوەی ئەو ناوانەی لابراون لە كەمپەكاندا ماون یاخود نا. تا بزانن كۆچیان كردووە بەرەو دەرەوەی وڵات یاخو هەر لە عیراق ماون، بەوتەی قەیس وەیسی.
بەپێی زانیارییەكانی (كەركوك ناو)، هەر خێزانێكی ئاوارە مامەڵەی گەڕانەوە بۆ زێدی خۆی تەواوبكات، راستەوخۆ وەزارەتی بازرگانی ناوەكەی لە لیستی بەشەخۆراكی مانگانەی پارێزگای دهۆك لادەبات.
حكومەتی عیراق لە ساڵی 2022دا بڕیاریدا ئەو خێزانانەی بۆ دەرەوەی وڵات كۆچ دەكەن، بەشەخۆراكی تا سێ مانگ رادەگیرێت، دوای ئەوە ئەگەر توانی بیسەلمێنێت گەڕاوەتەوە عیراق ئەوكات بەشەخۆراكەكەی بۆ دەگەڕێنرێتەوە.
جیهاد رەڤۆ، كە خاوەنی پێنج منداڵە و سێ برازاشی بەخێودەكات كە دایك و باوكیان بەهۆی هێرشی داعش بۆ شنگال لە ئابی 2014دا بێسەروشوێنبون، وتی "سەردانی كۆمپانیانی دابەشكردنی خۆراكی دهۆكم كرد، وتیان چارەسەری لە نەینەوایە، لە كۆمپانیانی دابەشكردنی خۆراكی نەینەواش وتم من هێشتا ئاوارەم و نەگەڕاومەتەوە شنگال، لەوێش وتیان لەوانەیە بەشەخۆراكی مانگانەت بگوازرێتەوە بۆ شنگال بۆیە ناوت لە دهۆك نەماوە، ماوەیەك چاوەڕێی بكە بزانین چی دەبێت".
جیهاد وتی "داواكارم بەشەخۆراكی مانگانەم نەگوازرێتەوە بۆ شنگال، چونكە ناتوانم مانگانە هاتوچۆ بكەم".
سەرچاوەیەك لە لقی دهۆكی بەڕێوەبەرایەتی كۆچ و كۆچبەرانی عیراق بە (كەركوك ناو )ی وت "ئاگاداری ئەو بابەتەین، ئاگاداری ئەوەشین لیژنەیەكی وەزارەتی بارزرگانی عیراق بۆ دڵنیابونەوە لەوەی بزانن ئاوارەكان لە كەمپ ماون یان كۆچییان كردووە، سەردانی هەموو كەمپەكانیان كرد و زۆر بەوردی داتایان كۆدەكردەوە، هەندێك لە ئاوارەكان راستەوخۆ بەشەخۆراكیان بۆ شنگال و موسڵ گوازراوەتەوە لەكاتێكدا خۆیان هێشتا لە كەمپەكان دەژین. هەندێكیش راگیراوە".
وتیشی "دەمەوێت دڵنیاییان پێبدەین كە مافی كەس ناخورێت، هەندێك رێكاری یاسایی هەیە دەگیرێتەبەر".
