ژنانی دووگیان لە ناحیەی ئەلقوش تووشی ناڕەحەتی زۆر دەبنەوە لەكاتی لەدایكبونی كۆرپەلەكانیان، بەهۆی داخستنی هۆڵی لەدایكبووان لە ناحییەكە.
بە نزیكەیی 10 ساڵە هۆڵی لەدایكبوون لە مەڵبەندی تەندروستی ئەلقوش داخراوە، وەك گرنگترین یەكەی خزمەتگوزاریی بۆ ژنانی دووگیان، لەكاتێكدا حكومەتی فیدراڵی عیراق، ستراتيژی نیشتیمانی بۆ رێكخستنی خێزان و ماوەی -دوورى- نێوان منداڵبوون بۆ ساڵانی 2020 – 2025 هەیە و ئێستا لە كۆتاییەكانی جێبەجێكردنیدایە.
پرۆژەكە نەخشەڕێگایەكە بۆ باشكردنی تەندروستی دایكان و منداڵان، كەمكردنەوەی رێژەی مردن و بەرەنگاربونەوەی هەژاری.
سەمیرا یونان، ژنێكی كریستیانی نیشتەجێی ئەلقوش، چیرۆكێكی ناڕەحەتی خێزانەكەی دەگێڕێتەوە كە بەهۆی داخستنی هۆڵی لەدایكبونەوە توشیان بووە، ئەو وتی "پێش دوو ساڵ خوشكێكم دووگیان بوو، رۆژێكیان بردمان بۆ دهۆك تاوەكو منداڵەكەی لەدایك بێت، بەڵام پێشئەوەی بگەینە دهۆك منداڵەكە لە رێگادا لەدایكبوو، ئەوە روداوێكی زۆر ناخۆش بوو، ئەمە حاڵی زۆربەی ژنانی دووگیانە بەدەست داخستنی هۆڵی لەدایكبون لە ئەلقوش".
بەگشتی ژنانی دووگیان ئەگەر بیانەوێت لەژێر چاودێریدا و لە هۆڵی لەدایكبون منداڵیان ببێت، پێویستە بەنزیكەیی كاتژمێرێك ببڕن تادەگەنە نەخۆشخانەیەك لە دەرەوەی شار، كە زۆربەی كات دەبێت بچنە شاری دهۆك.
لە ساڵی 2016دا رێكخراوێكی نێودەوڵەتی هەموو پێداویستییەكانی هۆڵی لەدایكبونی بۆ مەڵبەندی تەندروستی ئەلقوش دابینكرد، لەپێناو پێشكەشكردنی خزمەتگوزاریی بۆ ژنانی دووگیان.
رێكخراوەكە هەروەها بڕیاریدا بۆ ماوەی شەش مانگ موچەی پزیشك و كارمەندانی هۆڵەكە دابینبكات، بەڵام لەگەڵ كۆتاییهاتنی ئەو شەش مانگە، پزیشك و كارمەندەكان چیتر بەردەوام نەبون و حكومەتیش دەستگیرۆیی نەكردن، بەهۆیەوە هۆڵەكە داخرا.
"تاكە شت كە هەموو خەڵك پێی دڵخۆشبوو بونی هۆڵی لەدایكبون بوو لە ناوەندی ئەلقوش، چونكە لەبری ئەوەی ژنانی دووگیان بچنە دهۆك و تلكێف یان موسڵ لە ئەلقوش كۆرپەلەكانیان لەدایك دەبوو"، سەمیرا یونان وایوت.
ناحیه‌ی ئه‌لقوش، ده‌كه‌وێته قه‌زای تلكێف لە پارێزگای نەینەوا به دوری 40كم له باكوری موسڵ.
ناحیەكە له 42 گوند و سێ كۆمه‌ڵگه پێكهاتووە، ژمارەی دانیشتوانی زیاتر لە 50 هەزار كەسە و زۆرینە كریستیانن، لەگەڵ ئایینەكانی تر وەكو موسوڵمان، ئێزیدی، شەبەك و كاكەیی.
سەمیرا وتی "ئەوەی بۆ ئێمە پرسیارە ئەوەیە حكومەتێك نەتوانێت پزیشكێك و یەك و دوو كارمەند بۆ ئەم هۆڵە دابینبكات كە هەموو پێداویستیی و ئامێرێكی هەیە... دەیانجار داوامان كردووە جارێكی تر بكرێتەوە، بەڵام سودی نەبوو".
رائید قەیا مەنسور، موختاری ناحیەی ئەلقوش بە (كەركوك ناو )ی وت "پێشتر كردنەوەی هۆڵی لەدایكبون خزمەتی باشی ژنانی ئەلقوش و گوندەكانی دەوروبەری دەكرد، داخستنی مەترسی تەندروستی بۆ ژنانی دووگیان و كۆرپەلەكانیان هەیە بەتایبەت كاتێك ناچاردەبن لەكاتی لەدایكبوندا بەرەو شارەكانی تر ببرێن".
ستراتیژی رێكخستنی خێزان و ماوەی نێوان منداڵبون وەك لە بنەماكانیدا جەختی لێكراوەتەوە، دەوڵەت لایەنی بەرپرسی یەكەمە تیایدا، لەڕێی پێشكەشكردنی خزمەتگوزارییەكانی رێكخستنی خێزان وەكو بەشێك لە پاكێجی تەندروستی دوگیانی بەپێی پێوەرەكانی كواڵیتی جیهانی.
خزمەتگوزارییەكانی پەیوەست بە رێكخستنی خێزان لە نەخۆشخانە حكومییەكانی گشتی موسڵ و بەتول لە بەری راست، سەلام و خەنساء لە بەری چەپ و چەندین نەخۆشخانەی دیكەی بەعاج و شنگال لە پارێزگای نەینەوا هەن، بەڵام ئەلقوش لە یەكێك لە گرنگترین ئەو خزمەتگوزارییانە بێبەشە كە هۆڵی لەدایكبونە.
دڵشاد عەلی، كە وەكو بەڕێوەبەری گشتی تەندروستی نەینەوا دەوام دەكات، بە (كەركوك ناو)ی وت "لە پلانیاندایە جارێكی تر هۆبەی لەدایكبون لە ئەلقوش بكەنەوە ئەوەش بە دابینكردنی پزیشك و كارمەندی پێویست"، هەروەها جەختیكردەوە كە ئاگاداری كێشەكەیە و داواكاریی كردنەوەی هۆڵەكەی پێگەیشتووە.
