مامۆستایانی ئایینی هەرسێ نەتەوە سەرەكییەكەی كەركوك، داوا لە شانەی قەیران دەكەن پەلەبكات لە كردنەوەی دەرگای مزگەوتەكان بە رچاوكردنی رێنماییە تەندروستییەكان. لەگەڵ جەختكردنەوە لەسەر ئەوەی بۆ ئەو پرسە فشاری موسڵمانیان لەسەرە.
ئەو داواكارییە لە لە راگەیەنراوێكدا هات كە تیایدا مامۆستایانی ئایینی بە هەرسێ زمانی عەرەبی، كوردی و توركمانی لە كۆنگرەیەكی رۆژنامەوانیدا خوێندیانەوە.
لە راگەیەنراوەكەدا هاتووە "ئێستا لە زۆرێك لە سێكتەرەكان ژیان ئاسایی بۆتەوە و شوێنە گشتییەكان كراونەتەوە، ئێمەی مامۆستایانی ئایینی و پێشنوێژ و وتارخوێنان، داوا لە شانەی قەیران دەكەین دەرگای مزگەوتەكان بكرێنەوە، هەروەك ئەوەی لە زۆرێك لە شارەكانی تر كراونەتەوە و بەشیوەیەك هەمووان پابەندی رێنماییە تەندروستییەكان بین".
لە زۆرێك لە سێكتەرەكان ژیان ئاسایی بۆتەوە، ئێمەش داوا لە شانەی قەیران دەكەین دەرگای مزگەوتەكان بكرێنەوە
"پێشتریش لەڕێی وەقفی سوننی كەركوكەوە چوار جار بە فەرمی پێشنیارەكانمان لەوبارەیەوە پێشكەشی تەندروستی و شانەی قەیران كردووە. بەڵام زۆر بەداخەوە هەر وەڵامیان نەداوەتینەوە"، بەپێی راگەیەنراوەكە.
ئەو داواكارییە لەكاتێكدایە هەر لە كۆنگرەكەدا كە چوارشەممە 22ی تەمموز بەڕێوەچوو، مامۆستایانی ئایینی جەختیانكردەوە لەوەی "لەژێر فشارێكی زۆری موسڵمانانداین بۆ كردنەوەی مزگەوت و پێویستە چیتر بە داخراوی نەمێنێتەوە".
شانەی قەیران لە كەركوك لە دواین كۆبونەوەكانیاندا جگە لە كەمكردنەوەی ماوەی قەدەغەی هاتوچۆ، هیچ بڕیارێكیان نەدا لەبارەی كردنەوەی دەرگای مزگەتەكان.
مامۆستایانی ئایینی جەختدەكەنەوە لەوەی ئەوان رۆڵیان هەبووە لە ماوەی بڵاوبونەوەی ڤایرۆسی كۆرۆنادا، بە دەركردنی فەتوا و داخستنی مزگەوت لە پێناو سەلامەتی گیانی هاوڵاتییان، پاشان رێنماییكردن و هاندانی خەڵكی تا پابەندبن بە رێنماییەكانی شانەی قەیران.
"لە ماوەی كەرنتینەدا بە هاوكاریی خێرخوازان 20 هەزار بەشە خۆراكمان بەسەر هەژاراندا دابەشكردووە، جگە لە بەخشینەوەی سەدان هەزار دۆلار و هاندانی خاوەن موڵكەكان بە كەمكردنەوەی كرێی موڵك و هاندان ئەوانەی چاكبونەتەوە بە بەخشینی پلازما بە توشبوان... ئەوانە ئەركی ئێمە بووە و هەر ئەوە هۆكارانەش وایكردووە هەمیشە ئەو چینە رابەری كۆمەڵگە و چاوساغی خەڵكی بن"، بەپێی راگەیەنراوەكە.
