دوایین قسه‌ی سه‌راب له‌گه‌ڵ دایكیدایه، له‌رێی ته‌له‌فۆنه‌وه سكاڵا له توندوتیژی و لێدانی هاوسه‌ره‌كه‌ی ده‌كات، تا ده‌ستبه‌جێ فریای بكه‌ون و بیگه‌ڕێننه‌وه بۆ ماڵی باوكی، به‌ڵام دواتر له نه‌خۆشخانه كچه‌كه‌یان ده‌بیننه‌وه و به‌رله‌وه‌ی هیچ پرسیارێكی لێبكه‌ن گیانله‌ده‌ستده‌دات.
سه‌راب نیوه‌ڕۆی 15ی ئاب به‌هۆی سوتانه‌وه ره‌وانه‌ی نه‌خۆشخانه‌یه‌كی شاری كه‌ركوك ده‌كرێت، واته دوو كاتژمێر دوای په‌یوه‌ندییه ته‌له‌فۆنییه‌كه‌ی له‌گه‌ڵ دایكی.
"سه‌عات 10ی به‌یانی ته‌له‌فۆنی كرد، وتی مێرده‌كه‌ی زۆری لێداوه و چیتر نایه‌وێت له‌گه‌ڵیدا بژی، بۆیه با كه‌سێك بچێت به‌دوایدا بیهێنێته‌وه" قەسون حەمادی كازم، دایكی سەراب وای وت.
سه‌راب ته‌نیا 20 خوله‌ك له نه‌خۆشخانه مایه‌وه و به‌هۆی سوتاوییه‌كه‌یه‌وه گیانیله‌ده‌ستدا
دوای مشتومڕێكی كورتی ماڵی باوكی سه‌راب، زیاد له جارێك ته‌له‌فۆنی بۆ ده‌كه‌نه‌وه و وه‌ڵامناداته‌وه، پاش كاتژمێرێك خوشكی هاوسه‌ره‌كه‌ی وه‌ڵامده‌داته‌وه و ده‌ڵێت سه‌راب له حه‌مامه بۆیه په‌یوه‌ندییه‌كه وه‌رناگرێت، ئیتر ته‌له‌فۆنه‌كه‌ی به یه‌كجاری داده‌خرێت.
له‌و سه‌روبه‌نده‌دا، كاتژمێرێكی دیكه به‌سه‌ر یه‌كه‌م ته‌له‌فۆنی سه‌راب بۆ دایكی تێده‌په‌ڕێت، هێشتا كه‌سیان نه‌چون به شوێنیدا، له ژماره‌یه‌كی نادیاره‌وه ته‌له‌فۆنێك بۆ دایكی دێت و ته‌نیا ئه‌وه‌نده ده‌ڵێت "كچه‌كه‌تان سوتاوه و له نه‌خۆشخانه‌ی ئازادی كه‌ركوكه".
"به په‌له گه‌یشتینه نه‌خۆشخانه و بینیمان به ته‌واوی سوتاوه، پزیشكه‌كان وتیان رێژه‌ی سوتاوییه‌كه‌ی سه‌دا 100ـه" به‌وته‌ی دایكی سه‌راب بۆ (كه‌ركوك ناو).
سه‌راب محه‌مه‌د (18 ساڵ)، نۆ مانگ پێش ئێستا به خۆشه‌ویستی هاوسه‌رگیری له‌گه‌ڵ (ئ، ر – 23 ساڵ) كردووه و منداڵی نییه.
"له‌و نۆ مانگه‌ی هاوسه‌رگیرییه‌كه‌یاندا، سه‌راب 12 جار له‌گه‌ڵ هاوسه‌ره‌كه‌ی كێشه‌یان هه‌بووه و گه‌ڕاوه‌ته‌وه ماڵه باوانی" محه‌مه‌د حه‌مه‌لاو، باوكی سه‌راب بۆ (كه‌ركوك ناو) واده‌ڵێت.
"سه‌راب له نه‌خۆشخانه ته‌نیا بوو، خه‌ڵك و دراوسێ هێنابویان بۆ نه‌خۆشخانه، نه مێرده‌كه‌ی نه كه‌سوكاری مێرده‌كه‌ی لێ نه‌بوو، دوای ته‌نیا 20 خوله‌ك مانه‌وه‌ی له نه‌خۆشخانه‌ش گیانیله‌ده‌ستدا".
باوكی سه‌راب په‌نجه‌ی تۆمه‌ت ئاراسته‌ی زاواكه‌یی و كه‌سوكاره‌كه‌ی ده‌كات، بۆیه له بنكه‌ی پۆلیسی دۆمیز سكاڵای یاسایی تۆماركردووه.
كاتی روداوه‌كه هاوسه‌ره‌كه‌ی له‌ماڵه‌وه بوه و هه‌وڵی نه‌داوه ئاگری جه‌سته‌ی سه‌راب بكوژێنێته‌وه
ماڵی سه‌راب له گه‌ڕه‌كی عه‌سكه‌ری شاری كه‌ركوكه.
سه‌رچاوه‌یه‌ك له پۆلیسی كه‌ركوك كه به‌هۆی نه‌بونی مۆڵه‌تی لێدوانه‌وه ئاماده‌نه‌بوو ناوی بهێنرێت به (كه‌ركوك ناو)ی وت "روداوه‌كه هه‌ر له ماڵه‌كه‌ی خۆیاندا بووه، له‌وكاته‌دا هاوسه‌ره‌كه‌ی له ماڵ بووه، به‌ڵام هیچ هه‌وڵێكی نه‌داوه ئاگری جه‌سته‌ی سه‌راب بكوژێنێته‌وه".
چه‌ند رۆژێك دواتر و له شه‌وی 19ی ئاب، پۆلیسی كه‌ركوك (ئ، ر) هاوسه‌ری سه‌راب وه‌ك تۆمه‌تبارێكی سه‌ره‌كی روداوه‌كه ده‌ستگیرده‌كات.
"له‌كاتی لێكۆڵینه‌وه‌كاندا هاوسه‌ری سه‌راب ده‌ڵێت په‌یوه‌ندی به ئۆتۆمبێلی فریاكه‌وتنه‌وه كردووه تا هاوسه‌ره‌كه‌ی بگه‌یه‌ننه نه‌خۆشخانه به‌ڵام خوشكێكی رێگه‌ی نه‌داوه له‌گه‌ڵیدا بڕوات و وتویه‌تی توشی كێشه ده‌بیت" به‌وته‌ی سه‌رچاوه‌كه.
ئێستا ئه‌و خوشكه‌ی هاوسه‌ره‌كه‌ی سه‌راب بۆته یه‌كێك له تۆمه‌تبارانی روداوه‌كه و فه‌رمانی ده‌ستگیركردنی هه‌یه.
سه‌رچاوه‌كه‌ی پۆلیس وتیشی هاوسه‌ره‌كه‌ی سه‌راب له‌كاتێكدا په‌یوه‌ندی به ئۆتۆمبێلی فریاكه‌وتنه‌وه كردووه، "ئۆتۆمبێلی تایبه‌تی خۆی له‌به‌ر ده‌رگا بووه و ده‌یتوانی به په‌له بیگه‌یه‌نێته نه‌خۆشخانه"، هه‌روه‌ها ده‌ڵێت "هاوسه‌ری سه‌راب له لێكۆڵینه‌وه‌دا وتویه‌تی چه‌كداری حه‌شدی شه‌عبییه به‌ڵام دوای به‌دواداچون ده‌ركه‌وتووه راستناكات و كرێكاری ده‌كات".
روداوی سوتانی سه‌راب، یه‌كێكه له ده‌یان دۆسیه‌ی تری توندوتیژی خێزانی، ته‌نیا له چه‌ند مانگی رابردوی كه‌ره‌نتینه و سه‌رده‌می بڵاوبونه‌وه‌ی ڤایرۆسی كۆرۆنا.
به‌پێی ئاماره‌كانی وه‌زاره‌تی ناوخۆی عیراق، له شه‌ش مانگی سه‌ره‌تای ئه‌مساڵدا زیاتر له پێنج هه‌زار دۆسیه‌ی توندوتیژی خێزانی هه‌بون؛ له‌و ژماره‌یه توندوتیژی مێرد به‌رانبه‌ر هاوسه‌ره‌كه‌ی زیاتر له سێ هه‌زار و 600 دۆسیه و توندوتیژی ژن به‌رانبه‌ر به مێردیش زیاتر له 450 دۆسیه بون.
سەجاد جومعە، لێپرسراوی نوسینگەی كەركوكی كۆمسیۆنی مافەكانی مرۆڤ لە عیراق به (كه‌ركوك ناو)ی وت "لە سەرەتای 2020ـه‌وه تائێستا زیاتر له 150 كێشه و دۆسیه‌ی توندوتیژی خێزانی له كه‌ركوك هه‌بون و لای ئێمه تۆماركراون، دڵنیاین ده‌یان دۆسیه‌ی دیكه‌ش هه‌ن و لایه‌نی په‌یوه‌ندیداری لێئاگادارنه‌كراونه‌ته‌وه، به‌ڵكو په‌رده‌پۆش كراون".
به‌وته‌ی جومعه هۆكاری زۆرینه‌ی كێشه‌كان "خراپی باری دارایی و گرفته‌كانی په‌روه‌رده‌ی ناو خێزانن".
له‌مساڵدا زیاتر له 150 دۆسیه‌ی توندوتیژی خێزانی له كه‌ركوك تۆماركراون
لە كەركوك و ناوچەكانی تری جێناكۆك هیچ پەناگەیەك بۆ ژنە هەڕەشەلێكراوەكان نییە، له كاتێكیشدا ده‌ستور هه‌موو جۆره توندوتیژییه‌كی خێزانی قه‌ده‌غه كردووه، به‌ڵام هێشتا یاسایه‌كی تایبه‌ت به‌و دۆسیه‌یانه په‌سه‌ند نه‌كراوه.
ئێستا پرۆژه‌یاسای به‌ره‌نگاربونه‌وه‌ی توندوتیژی خێزانی، ره‌وانه‌ی په‌رله‌مان كراوه و بڕیاره دوای په‌سه‌ندكردنی، زنجیره‌یه‌ك رێكار بۆ كه‌مكردنه‌وه‌ی توندوتیژی دابنێت و دادگای تایبه‌ت بۆ یه‌كلایكردنه‌وه‌ی دۆسیه‌كان دابمه‌زرێنێت له‌گه‌ڵ كردنه‌وه‌ی چه‌ندین په‌ناگه‌دا.
