ئادەما جاوارا؛ ئەو ئافرەتە كارگوزارەی دوو هەفتە لەمەوبەر لە شەقامێكی كەركوك لەلایەن پۆلیسەوە هەڵگیرایەوە و پارە، پاسپۆرت و بەڵگەنامەكانی لێسەندرابوو، بۆ شاری بەغدا گەڕێنرایەوە، ئەوەش دوای ئەوەی لیژنەیەكی وەزارەتی كۆچ و كۆچبەران سەردانیان كرد.
ئادەما (27ساڵ)، خه‌ڵكی كۆماری سیرالیۆنه له باشوری خۆرئاوای کیشوەری ئه‌فریقا؛ له‌ڕێی كۆمپانیایه‌كه‌وه هاتۆتە عیراق و چه‌ند مانگێك له‌مه‌وبه‌ر له ماڵێكی به‌غداد وه‌ك كارگوزار كاریكردووه تا دواجار گه‌یشتۆتە كه‌ركوك.
ئەو خانمە كە دوو كچی لە سیرالیۆن لەپێناو كاركردن بەجێهێشووە، پێشتر بە (كەركوك ناو)ی وت "هاوڕێیەکی خاوه‌نی ماڵه‌كه و دوو كه‌سی تر زۆر ئه‌شكه‌نجه‌یاندام، دواتر به ئۆتۆمبێل هێنایانم بۆ ئه‌م شاره‌ی ئێوه و لێره دایانبه‌زاندم".
یاوەر ئاڵاوێردى، موختاری گەڕەكی خاسە، كە لەسەر داوای پۆلیس 18 رۆژ ئەو خانمە لەماڵیان بوو، بە (كەركوك ناو)ی وت "شاندێکى وەزارەتى کۆچ و کۆچبەرانى عێراق سەردانى ماڵەکەمیان کرد ویستیان لەگەڵ خۆیان بیبنەوە بەغدا، بەڵام دادوەر رەزامەندى لەسەر نەدا، ئەوەش بەهۆى ئەوەى فەرمانى وەزارەتیان پێ نەبوو".
وتیشی "دواتر جارێکى دیکە گەڕانەوە بۆ بەغدا و رەزامەندى وەزارەتییان لەگەڵ خۆیان هێنا، ئەوە بوو دادوەرى دادگای کەرکوک رادەستی كردن و بردیانەوە بۆ بەغدا". یاوەر زیاتر وتی "هیچ کەسێک یارمەتى نەدا، هەمووان سەردانیان دەکرد و بەڵێنیان پێدەدا و هیچ کەسێکیش بەڵێنەکەى نەبردە سەر".
ئەو خانمە پێشتر بە گریانەوە لە چاوپێكەوتنێكی (كەركوك ناو)دا، وتی "له‌به‌رانبه‌ر 240 دۆلاری مانگانه‌دا كارم بۆ ئه‌و ماڵه ده‌كرد، ئه‌وه‌ش بۆ بژێوی ژیانمان بوو، بەڵام هه‌رچی پاره‌م هه‌بوو بردیان، ته‌نانه‌ت پاسپۆرته‌كه‌شیان بردوم".
هه‌رچی پاره‌م هه‌بوو بردیان، ته‌نانه‌ت پاسپۆرته‌كه‌شیان بردوم
عەمار سەباح، بەڕێوەبەرى نوسینگەى کەرکوکى فەرمانگەى کۆچ و کۆچبەرانی عیراق، بە (كەركوك ناو)ی وت "دوای بڵاوبونەوەی چیرۆكەكەی لە دەزگاكانی راگەیاندن، وەزیرى کۆچ و کۆچبەرانی عیراق داواى کرد لێکۆڵینەوە لە دۆسییەكەی بکرێت و بۆ بەغدا بگەڕێنرێتەوە".
"وەزارەت وتیان لە بەغدا شوێنی حەوانەی بۆ دابین دەكەن و هەلی كاری بۆ دەڕەخسێنن، بۆ پاسپۆرتەكەشی لەگەڵ باڵیۆزی ئەو وڵاتە قسە دەكەن...". عەمار وایوت.
سەجاد جومعە، لێپرسراوی نوسینگەی كەركوكی كۆمسیۆنی مافەكانی مرۆڤ لە عیراق به (كه‌ركوك ناو)ی وت "له‌م شاره‌دا زۆر كه‌سی بیانی له ئه‌فریقا و وڵاتانی تره‌وه بۆ كاركردن هاتون، هیچ شوێنێك نییه سه‌رپه‌رشتییان بكات"، سه‌جاد ده‌شپرسێت "ئه‌م كه‌سانه چۆن و به چ رێگا و شێوازێك هاتون و كارده‌كه‌ن؟".
ئه‌و ده‌ڵێت نه‌بونی هیچ شوێنێكیش بۆ داڵده‌دانی كه‌سانی بێده‌ره‌تان، هه‌ڕه‌شه‌لێكراو و منداڵانی بێسه‌رپه‌رشت بۆته مایەی داخ و نیگه‌رانی.
