لە سێ مانگی ئەمساڵدا 130 كەیسی توندوتیژیی خێزانی لە كەركوك تۆماركراون، لە نێویاندا دەستدرێژی سێكسی باوكێك بۆ سەر كچە 10 ساڵانەكەی، بەو هۆیەوە پۆلیسی كۆمەڵگەیی داوای هاوكاریی دەكات بۆ هۆشیاركردنەوەی تاكەكانی كۆمەڵگە و خێزانەكان.
غالب عەلی ساڵح، بەڕێوەبەری هۆبەی پۆلیسی كۆمەڵگەیی، لە بەڕێوەبەرایەتی پۆلیسی كەركوك، بە (كەركوك ناو)ی وت "تۆماركردنی 130 كەسی توندوتیژی خێزانی بۆ سێ مانگی ئەمساڵ زۆرە، چونكە تەواوی ساڵی رابردوو تەنیا 394 كەیسمان هەبوو، ئەمە بۆ ئێمە مایەی نیگەرانییە و لە چاوەڕوانی ئەو ئامارەدا نەبوین".
وتیشی "ژنان پشكی شێری كەیسەكانیان بەركەوتووە و قوربانی یەكەمن، بەشێك لەو كەیسانەش پەنایان بردۆتە بەر خۆكوشتن و خۆسوتاندن".
بەپێی وتەی غالب عەلی، قەیرانە ئابوریی و کۆمەڵایەتییەكان، خراپ بەکارهێنانی تۆڕە کۆمەڵایەتییەکان و نەخۆشی دەرونی لە هۆکارە دیارەکانی هەڵکشانی ئەو ئامارانەن.
لەنێو ئەو 130 حاڵەتەدا، كەیسێكی دەستدرێژی سێكسی باوكێك بۆ سەر كچە 10 ساڵانەكەی تۆماركراوە (لەكۆتایی ئاداری ئەمساڵ)، ئەوەش لەژێر كاریگەری ماددە كهولییەكاندا بووە. وەك غالب عەلی وتی "منداڵەكە لە ئێستادا خێزانێك لە خۆیان گرتووە و كەیسی باوكیشی دراوەتە دەست دادگا".
ئەوەش دووەم حاڵەتی تۆماركراوی كەیسی دەستدرێژی سێكسی باوكە بۆ سەر كچەكەی لە ئەیلولی 2020ەوە.
لە ئەیلولی 2020، پۆلیسی كەركوك باوكێكیان دەستگیركرد و روبەڕوی دادگایان كردەوە، لەسەر كەیسێكی هاوشێوە بۆ سەر كچە 18 ساڵانەكەی.
بەو هۆیەوە پۆلیسی كۆمەڵگەیی كەركوك داوا لە رێکخراوەکانی کۆمەڵی مەدەنی، پەروەرەدە و خێزانەكان دەكات هاوكاریان بكەن لە هۆشیاركردنەوی كۆمەڵگە و خێزانەكان.
هەروەها داوا لە هەردوو دیوانی وەقفی سونیی و شیعی دەكەن ئەو پرسانە باس بكەن كە دەبنەهۆی ناكۆكیی و پشێوی نێوان خێزانەكان.
پۆلیسی کۆمەڵگەیی هۆبەیەكی سەر بە بەڕێوەبەرایەتی پۆلیسی كەركوكە و ئەندامی لیژنەی رێگریکردنە لە توندوتیژی خێزانی لە ئیدارەی پارێزگای كەركوك.
"ئەرکی ئێمە بڵاوکردنەوەی هۆشیارییە بۆ رێگریكردن لە توندوتیژی خێزانی، هەروەها رێگریكردن لە حاڵەتەكانی هەوڵدان بۆ خۆكوشتن و خۆسوتاندن، زۆرجار توانیومانە پێش ئەنجامدانی تاوانەکان چارەسەری كێشەكان بكەین، چەندین کەس کە هەوڵی خۆسوتاندن یان خۆکوشتنیان داوە رێگریمان لێكردون و بەشێكیان بۆ چارەسەر رەوانەی لیژنەكانی پزیشکیی و دەرونیمان كردون، لەو پێناوەدا هەموو ئاسانكارییەك بۆ خێزان و تاكەكان دەكەین"، غالب عەلی وایوت.
ئەرکی ئێمە بڵاوکردنەوەی هۆشیارییە بۆ رێگریكردن لە توندوتیژی خێزانی، هەروەها رێگریكردن لە حاڵەتەكانی هەوڵدان بۆ خۆكوشتن و خۆسوتاندن
تۆماركردنی 130 حاڵەتی توندوتیژی خێزانی لەكاتێكدا ناكۆكی نێوان فراكسیۆنە جیاوازەكانی پەرلەمانی عیراق هۆكاربووە بۆ پەسەندنەكردنی پڕۆژە یاسای بەرەنگاربونەوەی توندوتیژی خێزانی.
ئەو پڕۆژەیە یاسایە لە 4ی ئابی رابردووەوە، لەلایەن ئه‌نجومه‌نی وه‌زیرانی عیراقەوە ئامادەكراوە و ره‌وانه‌ی په‌رله‌مان كراوە، تیایدا دروستكردنی پەناگەی تایبەت بۆ ژنانی هەڕەشەلێكرا، دامەزراندنی دادگای تایبەت بۆ كەیسی توندوتیژیی و دیاریكردنی سزادانی ئەوانەی توندوتیژی دەكەن بەشێكی گرنگیەتی.
هەر به‌پێی پڕۆژەكە لیژنه‌یه‌كی باڵا له‌لایه‌ن ئه‌نجومه‌نی وه‌زیرانه‌وه پێكده‌هێنرێت به‌ناوی "لیژنه‌ی باڵا بۆ به‌ره‌نگاربونه‌وه‌ی توندوتیژی خێزانی" به سه‌رۆكایه‌تی وه‌زیری كارو كاروباری كۆمه‌ڵایه‌تی. هه‌روه‌ها فه‌رمانگه‌یه‌ك به‌ناوی "به‌ڕێوه‌به‌رایه‌تی پاراستنی خێزان" له وه‌زاره‌تی ناوخۆ دادەمەزرێت، له‌گه‌ڵ پێكهێنانی دادگایه‌كی تایبه‌تمه‌ند بۆ لێكۆڵینه‌وه له دۆسیه‌كانی توندوتیژی خێزانی.
سرود ئەحمەد، لێپرسراوی لقی كەركوكی كۆمەڵەی هیوای عیراقی بۆ داكۆكیكردن لە مافەكانی مرۆڤ، پێشتر لەبارەی ئەو پڕۆژە یاسایەوە بە (كەركوك ناو)ی وت "بە پەسەندكردنی ئاشتەوایی دەهێنێتە ناو خێزانەوە، پێمانوایە کە خێزان بە هەبونی یاسایەکی لەم جۆرە لە دەوری یەکتر کۆدەبنەوە و دەتوانن هەست بە سەلامەتی بکەن بەرامبەر یەکتر".
