دەنگی بەرزی گۆرانیی و گفتوگۆی گەرمی سیاسیی شۆفێران لەوسەری كۆڵانەكەوە دەبیسترێت؛ لەكاتێكدا نیوەی شەوە و خەڵكی گەڕەك لە شیرینیی خەودایە.
ئەو شۆفێرانە لە سەرەی دورودرێژی وەرگرتنی بەنزیندا رادەوەستن، هەندێكیان بۆ بەسەربردنیی كاتەكانیان گۆرانییە شادەكانی عەزیز وەیسی یان گۆرانیی غەمگینەكانیی خالید كەركوكیی لێدەدەن، بەپێی بەدواداچونی پەیامنێری (كەركوك ناو).
لە نێویشاندا هەیە هەر لەو كاتە درەنگەی شەودا؛ تەسجیلی ئۆتۆمبێلەكەی دەخاتە سەر قورئانیی پیرۆز.
"بەدەنگیی قورئانخوێن وەلید ئیبراهیم خەبەرم بۆوە، كاتژمێر 3:15 خولەكی شەو بوو، خۆم پێنەگیرا، چومە دەرەوە و بە شۆفێرەكەم وت قوربانی ئەو چاوانەت بم ئەمە ناوجەرگەی ماڵانە تكایە دەنگی تەسجیلەكەت كەمبكەرەوە، یان حامی ئۆتۆمبێلەكەت بەرزبكەرەوە و خۆت گوێی لێبگرە، بەڵام ئەو وتی دیارە حەزت بە دەنگی قورئانی پیرۆز نییە" مەریوان تاهیر وای وت.
ماڵی مەریوان لە كۆڵانەكانی فولكەی ئیخوانە لە گەڕەكی رەحیماوەی ناوەندی شاری كەركوك.
بەردەم ماڵەكەم وەك بارەگای یونامی لێهاتووە، هەرچی كێشەیەك هەیە لەوێ باسدەكرێت و هەوڵی چارەسەری دەدرێت
سەرەی وەرگرتنی بەنزین لە بەنزینخانەی ئەندەلوس بەرەو فولكەی ئیخوان و زۆرجار دەگاتە ناو كۆڵانەكان و درێژ دەبێتەوە تا جوتسایدی فەرمانگەی دابەشكردنی كارەبا، كە ئەوەش بە درێژایی نزیكەی دوو كیلۆمەترە و دەیان شۆفێر ئۆتۆمبێلەكانیان تا بەرەبەیان لە كۆڵان و بەردەم ماڵەكاندا رادەگرن.
پەیامنێری (كەركوك ناو) كە بەدواداچونی مەیدانی كردووە دەڵێت جگە لە گفتوگۆی گەرمیی شۆفێران لەسەر بابەتیی سیاسی و كێشەكانی رۆژانە، هەندێكجار هەر لەوێ دەیانجار شۆفێران حكومەتیی نوێی عیراق پێكدەهێنن و چارەسەر بۆ كێشەكانی حوكمڕانیی دەدۆزنەوە.
"بەردەم ماڵەكەم وەك بارەگای یونامی لێهاتووە –یونامی، نێردەی نەتەوە یەكگرتوەكان بۆ عیراق-، هەرچی كێشەیەك هەیە لەوێ باسدەكرێت و هەوڵی چارەسەری دەدرێت؛ بەردەوام سێ بۆ چوار شۆفێر لەوێ رادەوەستن و بە دەنگی بەرز باسی پێكهێنانی حكومەت دەكەن، دوای چەند خولەكێك دەچنە سەر باسی كێشەی بەنزین و چارەسەری بۆ دەدۆزنەوە" ئاكۆ فەرهاد، دانیشتوی كۆڵانەكانی نزیكی فلكەی ئیخوان وای وت.
بەشێكیش لە شۆفێران كە كەمتر تاقەتیی گفتوگۆیان هەیە؛ لەناو ئۆتۆمبێلەكەیدا دەمێنێتەوە و گۆرانی لێدەدات، زۆرترینیشیان حەزیان بە دەنگی عەزیز وەیسی –وەیسی گۆرانیبێژی میللی كوردە و گۆرانییەكانی شادن- و خالید كەركوكییە –خالید گۆرانیبێژی توركمانییە و گۆرانییەكانی خاو و زیاتر غەمگینن-.
هەر ناتوانین حەوشە و بەر دەرگا بشۆین لەبەر ئۆتۆمبێل
"سەرباری ئەوەی لەبەردەم ماڵەكەمدا رادەوەستن، كە دوو سێ مەتر دورە، دەنگی تەسجیلی ئۆتۆمبێلەكەی بەرزدەكاتەوە، یەكێك گۆرانی توركمانی خالید كەركوكی و یەكێك گۆرانی عەزیز وەیسی لێدەدات، ئەوەی من باسی دەكەم نیوەڕوان و كاتەكانی تر نییە، بەڵكو باسی كاتژمێر 2 بۆ 3ـی بەرەبەیان دەكەم" بەوتەی ماجد ئەحمەد، یەكێك لە دانیشتوانی كۆڵانەكانی نزیك فولكەی ئیخوان.
ئەو بە (كەركوك ناو)ـی وت هەركاتێك لە كەركوك كێشەی كەمی بەنزین هەبێت، ئیتر ئەوان ترسیان لێدەنیشێت، چونكە سەرە دەگاتە كۆڵانەكانی ئەوان، هەرچەندە زیاد لە جارێك ناڕەزاییان بە شۆفێران گەیاندووە بەڵام سودی نەبوە.
بەنزینخانەی ئەندەلوس 24 كاتژمێر كراوەیە و بەنزینی 450 دیناری حكومی بەپێی كۆبۆن بەسەر شۆفێراندا دابەشدەكات كە بەردەوام قەرەباڵغە.
نەجات ئەنوەر، ئافرەتێكی نیشتەجێی نزیكی ئەو بەنزینخانەیە و دادوبێدادیەتی، "هەر ناتوانین حەوشە و بەر دەرگا بشۆین لەبەر ئۆتۆمبێل، زۆر بێزار بوین".
لە كەركوك 27 بەنزینخانەی حكومی و 68 بەنزینخانەی ئەهلی -كە مۆڵەتیان هەیە و لەكاردان- بەنزینی حكومی 450 دیناری بەپێی كۆبۆن دابەشدەكەن، لەو ژمارەیەش دوو بۆ سێ بەنزینخانەیان بەنزینی حكومی بە نرخی بازرگانی بۆ هەر لیترێك بە هەزار دینار و بەبێ كۆبۆن دەفرۆشن.
پارێزگای كەركوك (ژمارەی خەمڵێنراوی دانیشتوانەكەی زیاتر لە ملیۆنێك و 700 هەزار كەسە)، رۆژانە بڕی ملیۆنێك و 500 هەزار لیتر بەنزینی حكومی بۆ دابیندەكرێت.
