گوماندەكرێت هێشتا ژمارەیەك روفات لەنێو چاڵی عەللۆ عەنتەر لە تەلەعفەر مابێتنەوە، لەكاتێكدا فەرمانگەی گۆڕە بە كۆمەڵەكانی عیراق كۆتایی بە كاری دەرهێنان و هەڵگرتنەوەی روفاتەكانی نێو ئەو چاڵە هێناوە.
فەرمانگەكە لە 28ی ئایاری 2024، پرۆسەی هەڵدانەوەی روفاتەكانی نێو چاڵی عەللۆ عەنتەری دەستپێكرد، كە بەدوری شەش كیلۆمەتر دەكەوێتە باكوری قەزای تەلەعفەر لە پارێزگای نەینەوا.
خەیری عەلی، بەڕێوەبەری رێكخراوی پەتریکور کە تایبه‌تە مافه‌كانی مرۆڤ له شنگال، بە (كەركوك ناو)ی وت "چەند روفاتێکمان لەناو چاڵەكە بینیوە، لەڕاستیدا نازانین بە تەواوی چەند روفاتن، بەڵام فەرامۆشكراون و كاری فەرمانگەكەش كۆتایی بەكارەكاتنی هێناوە".
خەیری 8ی ئەیلول لەگەڵ تیمێكی رێكخراوەكە سەردانێكی مەیدانیان بۆ چاڵی عەللۆ عەنتەر كرد.
فەرمانگەی گۆڕە بە كۆمەڵەكانی عیراق لە ماوەی كاركردنیان لەو چاڵە 158 روفاتیان دەرهێنا، لەگەڵ ئێسك و پروسكی 39 كەسی تر.
ئەوەش لەكاتێكدایە به‌پێی لێكۆڵینه‌وه‌كانی پێشوتری كۆمسیۆنی باڵای مافه‌كانی مرۆڤی عیراق، چاڵی عه‌للۆ عه‌نته‌ر روفاتی "زیاتر له هه‌زار" هاوڵاتی توركمان و ئێزیدی تێدایه، دوای گولـله‌بارانكردنیان له‌لایه‌ن چەكدارانی دەوڵەتی ئیسلامی لە عیراق و شام ناسراو بە (داعش)ـ، فڕێدراونەتە ئەو چاڵەوە.
خەیری وتی "پێشتریش فەرامۆشكردنی هاوشێوە هەبووە لە گۆڕە بە كۆمەڵەكانی شنگال"، بۆیە وتی "داوامان لە دەزگا پەیوەندیدارەکان کردووە جارێکی تر سەردانی ئەو گۆڕە بكەنەوە و ئەو روفاتانە هەڵبگرنەوە كە بەجێهێڵدراون".
"نیگەرانین لە دوبارەبونەوەی ئەم جۆرە حاڵەتە، ئەو كارانە کاریگەریی زۆر خراپ دەکاتە سەر لایەنی دەرونی كەسوكاری قوربانیان، بۆیە دەبێت بە وریاییەوە کارەکە بکرێت".
لەكاتی پرۆسەی هەڵدانەوەی روفاتەكانی چاڵی عەللۆ عەنتەر، زيا كەریم، بەڕێوەبەری فەرمانگەی پاراستنی گۆڕە بە كۆمەڵەكان لە دەزگای شەهیدان سەر بە حكومەتی فیدراڵی وتی "چاڵی عەللۆ عەنتەر شوێنی تاوانێكی قێزەونی داعش و تەحەدایەكی گەورەیە لە دۆسیەی هەڵدانەوەی گۆڕی بە كۆمەڵ و دۆزینەوەی ناسمانەی قوربانیاندا".
زیا وتی كە كاركردنی ئەوان لە گۆڕەكەدا، لەسەر روبەری 20 تا 30 مەتر و بە قوڵی 10 تا 25 مەتر دەبێت، وەك قۆناغی یەكەم، كە بە هاوكاری چەندین لایەنی دیكە لەوانە پزیشكی دادی بەغدا، هێزە ئەمنییەكان، بەرگری شارستانی و تەندروستی و رێكخراوی نێودەوڵەتی بەڕێوەدەچێت.
توركمانەكانی تەلەعفەریش هاوشێوەی ئێزیدی بەدەستی داعش روبەڕوی كوشتن، رفاندن و ئاوارەیی بونەوە، تائێستاش چارەنوسی ده‌وروبه‌ری هه‌زار و 300 هاوڵاتی نادیارە لە نێویاندا سەدان كچ و ژن، گوماندەكرێت زۆرینەیان لە چاڵی "عەللۆ عەنتەر" ـ بن.
چاڵی عەللۆ عەنتەر، لە بنەڕەتدا بە بیری کۆترەکان (بئر الحمائم)یش ناسراوە، بەو پێیەی زۆرجار پۆلی کۆتری بەسەرەوە بینراوە، بەڵام تورکمانەکان پێی دەڵێن (عەللو عەنتەر).
چاڵەکە بە سروشتی دروستبووە و دەستی مرۆڤی تیادا نییە، بە وتەی بەشێک لە دانیشتوانی تەلەعفەر سەدان ساڵ لەمەوبەر نەیزەکێکی گەورە لەو ناوچەیە کەوتووە و بۆتەهۆی دروستبونی.
تیرەی چاڵەکە نزیکەی 50 مەتر دەبێت و قوڵییەکەی 100 مەترە، بەڵام بەهۆی فڕێدانی تەرم و داپۆشینیان بەگڵ لەلایەن چەكدارانی داعشەوە قوڵییەکەی کەمتر بووەتەوە.
