عەبدولقادر دەخیل، پارێزگاری نەینەوا موژدەی تەرخانكردنی پارەی قەرەبووكردنەوە و چەندین پرۆژە بە خەڵك دەدات و ئەنجومەنی پارێزگاش، گلەیی لە پەككەوتنی كارەكانی هەیە كە بەهۆیەوە دەیان دۆسیەی "گرنگ" لە چاوەڕوانیدا ماونەتەوە.
دەخیل ئەمڕۆ دوشەممە 7ـی تشرینی یەكەمی 2024 لە كۆنگرەیەكی رۆژنامەوانیدا، كە پەیامنێری (كەركوك ناو) ئامادەی بوو ئاشكرایكرد، لە چوارچێوەی سەردانێكیدا بۆ بەغدا رەزامەندی خەرجكردنی بڕی 100 ملیار دیناری وەرگرتووە بۆ قەرەبووی زیانلێكەوتوانی نەینەوا.
"زیاتر لە 11 هەزار زیانلێكەوتوو لەو بڕە پارەیە قەرەبووی زیانەكانیان وەردەگرنەوە كە بڕیارە بەمنزیكانە پارەكە بگات و ناوەكانیان بڵاوبكرێتەوە" پارێزگاری نەینەوا وای وت. ئەوەش زیانلێكەوتوانی شەڕی داعش دەگرێـتەوە، لە نێویاندا ئەوانەی ماڵ و سامانیان لەناوچووە.
هەروەها ئاماژەی بەوەدا نەینەوا لە رابردودا روبەڕوی "غەدر"ـی زۆر بۆتەوە لەو دۆسیەیەدا، لەكاتێكدا مافێكی دەستوری و ئاسایی خەڵكە، لە بەرانبەر وێرانكاریی و زیانەكانیاندا قەرەبوو بكرێنەوە، ئەو بودجەیەش كە دەنێردرێت بۆ پارێزگاكە، زۆربەی بۆ ناوچەكانی خۆرئاوا دەڕوات، لە نێویاندا تەلەعفەر و شنگال.
داعش لە شنگال و تەلەعفەر جگە لە وێرانكاری، هەزاران هاوڵاتی روبەڕوی كوشتن، رفاندن و ئاوارەیی كردەوە لە ناوەڕاستی 2014ـەوە تا كۆتاییهاتنی دەسەڵاتی لە ناوەڕاستی 2017ـدا.
پارێزگاری نەینەوا لە كۆنگرە رۆژنامەوانییەكەیدا، كە نزیكەی كاتژمێرێكی خایاند، باسی لە چەندین پرۆژەی خزمەتگوزاری بۆ پارێزگاكە كرد، لە نێویاندا ئەوانەی رەزامەندی لەسەر دراوە لەگەڵ ئەو پرۆژانەی هێشتا لە گفتوگۆدان، جەختیكردەوە لە كۆی زیاتر لە 100 پرۆژەی سست و پەككەوتوو ئێستا تەنیا 20 پرۆژەیەك بە سستی بەڕێوەدەچێت و ئەوانیتر چالاكانە كاریان تێدا دەكرێت، "ئامانجمان ئەوەیە لەڕێی خزمەت و پرۆژەكانەوە هانی هاوڵاتیانی ئاوارە بدەین بگەڕێینەوە بۆ ناوچەكانیان.. بە تایبەت پێكهاتەكانی كریستیان و ئێزیدی و ئەوانیتر".
ڤیدیۆ: كۆنگرەی رۆژنامەوانی محەمەد جبوری، جێگری سەرۆكی ئەنجومەنی پارێزگای نەینەوا / 6ـی تشرینی یەكەمی 2024
عەبدولقادر دەخیل لە وەڵامی پرسیارێكدا رەتیكردەوە پەككەوتنی ئەنجومەنی پارێزگا كاریگەری راستەوخۆی لەسەر كاری حكومەتی خۆجێیی نەینەوا هەبێـت، بەوپێیەی "هەموو لیژنەكان و ئەندامان وەكو یەك تیم كاردەكەین.. ناكۆكی تەنیا لەسەر سەرۆكی یەكە ئیدارییەكان هەیە و وەكوتر ئەنجومەن كاری خۆی دەكات".
ئەنجومەنی پارێزگای نەینەوا چەندین هەفتەیە نەیتوانیووە دانیشتنی ئاسایی بكات، بەهۆی ناكۆكی كوتلەكانەوە لەسەر دابەشكاری پلە و پۆست.
محەمەد عەبدوڵا جبوری، جێگری سەرۆكی ئەنجومەنی پارێزگای نەینەوا لە كۆنگرەیەكی رۆژنامەوانیدا كە (كەركوك ناو) ئامادەی بوو، وتی لە 20 لیژنەی هەمیشەیی ئەنجومەن، هێشتا پێنج ئەنجومەن تەنیا سەرۆكیان هەیە و ئەندامانیان دیارینەكراون، لە نێویاندا "لیژنە گرنگەكانی ئەمنی، دارایی، خزمەتگوزاری و تەندروستی".
"15 بابەتی گرنگ و دۆسیەی هەستیار چاوەڕێی گفتوگۆی ئەنجومەن و پەسەندكردن دەكات" جبوری لەو كۆنگرەیەدا دوای كۆبونەوەی سەرۆكی لیژنەكان لە 6ـی تشرینی یەكەمی 2024 ئاماژەی بەوەدا، پێویستە ئەنجومەن دانیشتنەكانی دەستپێبكاتەوە، لیژنەكانی بە تەواوی پێكبهێنێت تا بتوانێت ئەركەكانی یاسادانان و چاودێری جێبەجێبكات.
جێگری سەرۆكی ئەنجومەن دەڵێت لیژنەكان ئەركێكیان بەرزكردنەوەی راپۆرتی بەدواداچونەكانیانە، تا ئەنجومەن بڕیاری لەبارەوە بدات و دەنگی پێبدات، "چونكە زۆر دۆسیەی گرنگ هەن كە هەندێكیان دارایین و نابێت درەنگ بكەون".
ئەو قەیرانەی ئەنجومەنی نەینەوا دوای ئەوەهات، هاوپەیمانی نەینەوا موستەقبەل بە 16 كورسییەوە لە كۆی 29 كورسی، پرۆسەی هەڵبژاردنی بۆ حەوت قایمقام و 13 بەڕێوەبەری ناحیە ئەنجامدا، لە بەرانبەردا فراكسیۆنەكانی پارتی و هاوپەیمانی نەینەوا موەحەدە بە 13 كورسییەوە بایكۆتی دانیشتنەكان دەكەن و سكاڵایان بردۆتە دادگای فیدراڵی.
ئەنجومەنی نەینەوا و حكومەتی خۆجێیی، لە نێویاندا پۆستەكانی سەرۆكی ئەنجومەن و پارێزگار و جێگرەكانیان، لە شوباتی ئەمساڵدا بە تەوافوق و رێككەوتنی هەموو كوتلەكانی ئەنجومەن دانران.
