لە كۆڵانێكی تەنگیی بەری راستی موسڵ، خاچێكی بەدار دروستكراو لە بەرزاییەوە دەردەكەوێت؛ كاتێك زیاتر لێی نزیكدەبیتەوە دەردەكەوێت كڵێسا نییە، بەڵكو خانویەكی دێرین و ئاسایی داڕوخاوە.
دیزاینی دەرگای خانوەكە؛ مۆدێلێكی كۆنی بیناسازی نیشاندەدات، لەو دەرگایەوە بە راڕەوێكی باریک و كورتدا دەچێتە ناو حەوشەیەكی چوارگۆشەی گەورە، كە دەرگا و پەنجەرەی چەندین ژووری لەسەرە، لەوێ رونتر دەبێتەوە كە بنیاتنانی ئەو خانووە بەشێوازی خۆرهەڵاتییە یان وەك ئەوەی لەناو خەڵكدا بە شەرقیی ناسراوە.
دیوار، پەنجەرە و ناوەوەی ژورەكانی خانووەكە، نمایشیی شوێنەواری جەنگێكی وێرانكەر دەكەن، كە هێشتا دەستیی ئاوەدانیی پێنەگەیشتبێتەوە.
خاچەكە لە بەشی سەرەوەی دەرگای سەرەكیی خانووەكەدا دانراوە، بەستراوەتەوە بە پارچە ئاسنێكیی جێگیرەوە، كە رەنگە پێشتر بۆ دانانیی ئارێلی تەلەفزیۆن لە چیمەتتۆ چەقێنرابێت.
لە كۆڵانە باریكەكانی گەڕەكیی ساعە-ـی شاری موسڵ، تەنیا بە سەربانیی ئەو خانووەوە خاچ دەبینرێت، ئەوەش لەنێو ناوچەیەكی وێرانەی شەڕدا، كە بەشێك لە داروپەردوی باڵەخانە و خانوە روخاوەكانیشیی هەڵنەگیراونەتەوە.
لەو خانووەدا، تەنیا هاوڵاتییەک نیشتەجێیە؛ كریستیانێكی رەسەنی ئەو گەڕەكەیە و دوای گەڕانەوەی لە ئاوارەیی، خاچێكی بەرز كردۆتەوە و دەیەوێت لەوڕێگەیەوە بە هەموو دنیا بڵێت "كریستیانەكان لە نیشتمانیی خۆیان دەمێننەوە و بەجێیناھێڵن" وەك خۆی دەڵێت.
مەجدی حەمید نقاش بە (كەركوك ناو)ـی وت كاتێك گەڕاوەتەوە بۆ گەڕەكیی ساعە و خانووە روخاوەكەی، بڕیاریداوە خاچێك دابنێت، تا هەموان بزانن هاوڵاتییەكی كریستیانیی گەڕاوەتەوە و لەوێ دەژیت.
ئەو لەكاتی هێرشەكانیی حوزەیرانی 2014ـی "دەوڵەتی ئیسلامی لە عیراق و شام – داعش" بە ناچاری موسڵ بەرەو شاری هەولێر و بە دیاریكراویی ناحیەی عەنكاوەی زۆرینە كریستیاننشین بەجێدەهڵێت، دوای چەند ساڵێك ژیانی ئاوارەیی و تێپەڕینیی ساڵێك بەسەر كۆنتڕۆڵكردنەوەی شارەكەدا، لە 2018ـدا دەگەڕێتەوە.
داعش دوای دەستبەسەرداگرتنیی زۆرینەی ناوچەكانی پارێزگای نەینەوا؛ سێ بژاردەی خستە بەردەم كریستیانەکان ئەوانیش بوون بە ئیسلام، پێدانی جزیە یان بەجێهێشتنی ماڵ و حاڵیان، بۆیە زۆرینه به ناچاری ئاواره‌بون.
"ئەم خانووەی منی تێدا دەژیم لە باوباپیرانمەوە ماوەتەوە، تەمەنیی ئەم خانووە 150 ساڵ دەبێت، تەنیا گۆڕانكارییەكی كەم كراوە و هەر شێوازە كۆنەكەی بنیاتنانی ماوەتەوە، بەڵام بەهۆی شەڕەوە زیانیی زۆری بەركەوت و داڕوخا" بەوتەی مەجدی.
بە هاوكاریی رێكخراوێكی نێودەوڵەتیی كەمتر لە سەدا 15ـی خانووەكە نۆژەنكراوەتەوە، ئەوەش تەنیا ژورێك و حەمام و توالێتە، تەواوی ژورەكانیی دیكە وێرانەن.
"پێنج ساڵە بە تەنیا لەم خانوەدا دەژیم و تائێستا هیچ لایەنێكی حكومی ئامادەیی دەرنەبڕیووە لانیكەم خانووەكەم نۆژەنبكاتەوە".
مەجدی (45 ساڵ)، دایك و باوكی لە ژیاندا نەماون، برا و خوشێكیكی هەیە كە یەكێكیان لە ئۆسترالیا و ئەویتر لە پارێزگای دهۆكە، خزمەكانیی دیكەشی لە مام و پور و خاڵ بەسەر بەغدا و پارێزگاكانی تری عیراقدا دابەشبون و زۆرینەشیان بەرەو دەرەوەی وڵات كۆچیان كردووە.
به‌پێی ئاماره‌كانی هه‌ردوو حكومه‌تی فیدراڵی عیراق و هه‌رێمی كوردستان، ده‌یان هه‌زار خانه‌واده‌ی كریستیان هێشتا نه‌گه‌ڕاونه‌ته‌وه زێدی خۆیان و له ئاواره‌ییدا ده‌ژین، جگه له‌وه‌ی هه‌زاران خێزانی تر – ته‌نیا له نه‌ینه‌وا زیاتر له 24 هه‌زار خێزان- به‌ره‌و وڵاتانی تر كۆچیانكردووه.
"كریستیانەكان پێیانوایە ئەگەر بگەڕێنەوە دوبارە روبەڕوی كوشتن و ئاوارەیی دەبنەوە، باوەڕیان بە دەسەڵاتدارانیی ناوچەكە نەماوە، بۆیە زۆرینە وڵاتیان بەجێهێشت".
مەجدی دەڵێت ئەو تەنیا كریستیانە كە گەڕاوەتەوە بۆ گەڕەكی ساعە و ژمارەی ئەو خێزانانەی بۆ تەواوی بەری راستیی شارەكەش گەڕاونەتەوە لە ژمارەكانی پەنجەكانی هەردوو دەستی تێناپەڕن، لەكاتێكدا پێشتر هەزاران كریستیان لەو بەشەی شار و دەیان خێزانیش لە گەڕەكیی ساعە هەبوون.
"هەموو ئەو خێزانانەی گەڕاونەتەوە بۆ گەڕەكەكەی ئێمە موسڵمانن، پێش داعش و ئێستاش پێكەوە وەك خوشک و برا دەژین".
دانانی خاچەكەی مەجدی پێش كڵێساكەش كەوت؛ لەو گەڕەكەی ئەو كڵێسای ساعە هەیە، كە كاری نۆژەنكردنەوەی تێدایە و هێشتا تەواو نەكراوە.
زیاتر له 80 كڵێسا و شوێنی ئایینی كریستیانی له‌لایه‌ن داعشه‌وه ته‌قێنرانه‌وه یان خاپور كراون و هێشتا زۆرینه‌یان نۆژه‌ننه‌كراونه‌ته‌وه.
مەجدی بۆ پەرستش لە ماڵەكەی دوردەكەوێتەوە و دەگاتە كڵێسای مارپوڵس لە بەری چەپی شاری موسڵ.
زۆرینەی كاتەكانی دیكە هەر لە ماڵەوەیە؛ پێشتر كاری دانانی كاشی ماڵانی دەكرد و لە شەڕی داعشەوە هیچ كارێكی نەكردووە، پێیوایە دەرفەتی كار نییە و لەسەر هاوكاری دارایی جاربەجاری رێكخراوەكان دەژی، زۆربەی جاریش لە دراوسێ موسڵمانەكانیەوە خواردنی پێدەگات.
نەبون یاخود خراپی خزمەتگوزارییەكان، لە نێویاندا كارەبا و ئاو، بەلای ئەوەوە هۆكاری نیگەرانیی و بەربەستێكی سەرەكییە لە بەردەم گەڕانەوەی ئاوارەكاندا، "نازانین داوای خزمەتگوزاری و نۆژەنكردنەوەی خانوەكانمان لە كێ بكەین، بۆیە تەنیا تكا و داوامان لە خودایە".
ئاوارەی كریستیان سەدا 7ـی كۆی 664 هەزار ئاوارەی نیشتەجێی هەرێمی كوردستان پێكدەهێنن كە سەدا 40ـی ئاوارەكانیش خەڵكی موسڵ و ناوچەكانی تری نەینەوان.
مەجدی بە سروشتی خۆی حەزی بە دەركەوت لە میدیادا نییە؛ قایل نەبوو پەیامنێری (كەركوك ناو) وێنەی بگرێت و نەیویست لەبارەی ژیانی هاوسەرگیریی و وردەكاریی دیكەی ژیانیی كۆمەڵایەتییەوە قسەبكات.
"قسەیەك هەیە دەڵێت؛ بەرد لە شوێنی خۆی سەنگینە، جگە لەمەش خۆشەویستی من بۆ موسڵ و گەڕەكەكەی خۆمان وایكرد بگەڕێمەوە و لە موسڵ درێژە بە ژیان بدەم" مەجدی حەمید، وای وت.
.jpg)
.jpg)
.jpg)
